Heaven Etie Didie?

NDUSỤK owo ẹkere ke owo ikemeke ndifiọk nte heaven etiede sia akanam owo ndomokiet itoho heaven iditịn̄ nte heaven etiede. Ekeme ndidi mmọ ẹfre ke Jesus ama ọdọhọ ete: ‘N̄koto heaven nsụhọde ndi.’ (John 6:38) Jesus ama onyụn̄ ọdọhọ ndusụk mme adaiso ido ukpono ete: “Mbufo ẹto ke ikpehe eke isọn̄; ami nto ke ikpehe eke enyọn̄.” (John 8:23) Nso ke Jesus eketịn̄ aban̄a heaven?

Jesus ama ọsọn̄ọ ke Jehovah odụn̄ ke heaven. Enye okokot Abasi “Ete mi emi odude ke heaven.” (Matthew 12:50) Edi Bible etịn̄ aban̄a “heaven” ke nsio nsio usụn̄. Ke uwụtn̄kpọ, Bible ọdọhọ ke ufụmenyọn̄ edi “heaven” ke ini enye ọdọhọde “ẹmenede enyịn ese heaven.” (Matthew 14:19) Edi Jehovah idụn̄ke ke ufụmenyọn̄ emi. Bible ọdọhọ ete: “Odu Enye emi odụn̄de ke enyọn̄ ekara isọn̄.”—Isaiah 40:22, NW.

Ndi ‘Ete emi odude ke heaven’ odụn̄ ke otu ntantaọfiọn̄? N̄wed Abasi okot ikpaenyọn̄ n̄ko “heaven.” Ke uwụtn̄kpọ, mbụk edibotn̄kpọ ọdọhọ ete: “Ndien Abasi okot ikpa-enyọn̄ ete, Heaven.”—Genesis 1:8.

Baba, Jehovah Abasi idụn̄ke ke esịt ekondo emi enye okobotde, ukem nte anamusọ eto mîdụn̄ke ke esịt kọbọd emi enye ọkọn̄de. Ntre, ke ini Edidem Solomon akayakde temple ke Jerusalem ọnọ Jehovah, enye ọkọdọhọ ete: “Nte Abasi oyodụn̄ ke isọn̄ ndien ke akpanikọ? Sese, enyọn̄ ye ata enyọn̄ ikemke fi, kpan̄ ọfiọk ufọk emi n̄kọbọpde.” (1 Ndidem 8:27) Edi edieke Jehovah mîdụn̄ke ke ikpaenyọn̄ emi ẹkotde heaven, ewe heaven ke enye odụn̄?

Okposụkedi emi mme owo ẹdade okopodudu ukwak usen̄kpọ ẹdụn̄ọrede ikpaenyọn̄, ndusụk owo ẹsinyụn̄ ẹkade edem ikpaenyọn̄, ikọ Bible emi osụk edi akpanikọ: “Akananam baba owo kiet ikwe Abasi.” (John 1:18) Jesus ama ọnọ ntak ete: “Abasi edi Spirit.”—John 4:24.

Spirit enen̄ede okop odudu akan obụk ye iyịp. Owo emi edide spirit inyeneke obụkidem ye iyịp emi ikemede ndikụt nnyụn̄ ntụk. Ke ntre, ke ini Jesus ọkọdọhọde ke ikesidu ye Ete imọ ke “heaven,” ikọ esie ọkọwọrọ ke imọ ikodu uwem oro ekenen̄erede enyene ubọn̄ akan uwem ekededi mi ke isọn̄. (John 17:5; Philippi 3:20, 21) Ebiet emi mme owo eke spirit ẹdụn̄de, emi Jesus okodụn̄de ye Ete esie, ke Bible okot “heaven.” Enye etie didie? Nso ke ẹsinam do?

 Ebiet Emi Ẹsinamde Utom Inemesịt

Bible ọdọhọ ke heaven edi ebiet oro ẹnamde ekese n̄kpọ. Enye ọdọhọ ke ata ediwak mme angel emi ẹnamde akpanikọ ẹdụn̄ do. (Daniel 7:9, 10) Angel emi kiet kiet enyene san̄asan̄a edu mmọ. Isan̄a didie ifiọk emi? Idụhe odu-uwem n̄kpọ iba ekededi ke otu kpukpru edibotn̄kpọ oro enyịn ekemede ndikụt emi ẹdide ata ukem, ntre imenen̄ede inịm ke mbon oro ẹdude ke heaven ẹnen̄ede ẹkpụhọde n̄ko. Edi kpukpru mme angel emi ẹnen̄ede ẹdiana kiet ẹnam utom, ke ntem mmọ ẹnen̄ede ẹkpụhọde ye mme owo ke isọn̄ mfịn, emi mîwakke ndinen̄ede ndiana kiet.

Kop se Bible etịn̄de aban̄a se ẹnamde ke heaven. “Ẹtoro Jehovah, mbufo mme angel esie, emi ẹdahade uko, emi ẹnamde uyo esie, ẹnyụn̄ ẹkopde uyo ikọ esie. Ẹtoro Jehovah, mbufo ofụri udịm esie, mme asan̄autom esie, emi ẹnamde se enye amade.” (Psalm 103:20, 21) Ntre, ke ẹnam ekese utom ke heaven. Imenịm ke edi utom inemesịt.

Mme angel ẹketọn̄ọ ndinam utom inemesịt ata anyan ini ko, idem mbemiso ẹkebotde isọn̄. N̄wed Abasi ọdọhọ ke nditọ Abasi ẹma ‘ẹkwọ uyo kiet’ ẹnyụn̄ ‘ẹsio n̄kpo idara’ ke ini Jehovah okobotde isọn̄. (Job 38:4, 7) Kiet ke otu nditọ Abasi ke heaven ama akam enyene ifet nditiene Abasi mbot kpukpru n̄kpọ eken. (Colossae 1:15-17) Inem inem usụn̄ oro ẹtịn̄de ẹban̄a se ẹnamde ke heaven mi ekeme ndinam fi obụp mbụme aban̄a heaven ye ubonowo.

Ndi Ẹkebot Mme Owo Man Ẹkpeka Heaven?

Sia mme angel ẹkedude ke heaven ẹnam n̄kpọ Abasi mbemiso ẹkebotde isọn̄, ọwọrọ ke owo ikobotke akpa eren ye n̄wan man ẹtọt ẹyọhọ heaven. Utu ke oro, Abasi ọkọdọhọ akpa ebe ye n̄wan oro ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄.” (Genesis 1:28; Utom 17:26) Adam ekedi akpa owo ke isọn̄, emi ekenyenede ukeme ndifiọk Abasi nnyụn̄ nsọn̄ọ nda nnam n̄kpọ Esie. Enye ekenyene ndidi ete kpukpru owo emi ẹdidụn̄de ke isọn̄. “Enyọn̄ edi heaven Jehovah: edi enye ada isọn̄ ọnọ nditọ owo.”—Psalm 115:16.

Mme owo isiyomke ndikpa; idụhe ama n̄kpa. Abasi ọkọdọhọ ke Adam edikpa edieke enye ọsọn̄de ibuot ye imọ. Adam ikpakakpaha tutu amama edieke enye okpokokopde uyo Abasi.—Genesis 2:17; Rome 5:12.

Imosụk ise Abasi mîketịn̄ke n̄kpọ ndomokiet ye Adam iban̄a edika heaven. Ntre, isọn̄ ikedịghe ebiet emi ẹdade ẹdomo mme owo ẹse m̀mê ẹdot ndika heaven. Ẹkebot owo man odụn̄ ke isọn̄ ke nsinsi, ndien uduak Abasi oro oyosu. Bible ọn̄wọn̄ọ ke “nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ana in̄wan̄-in̄wan̄ ke Abasi ikobotke mme owo man ẹka heaven. Edi ntak emi Jesus ọkọdọhọde ke mme apostle imọ ẹyeka heaven? Ndi ikọ Jesus ọkọwọrọ ke kpukpru nti owo ẹdika heaven?