“Jehovah Ese Esịt”
San̄a Kpere Abasi
“Jehovah Ese Esịt”
EDU isiwakke ndiye nte idem. Idịghe nte owo etiede ke enyọn̄ idem enen̄ede edi nte enye etiede ke esịtidem. Mme owo ẹsiwak ndida se mmọ ẹkụtde ke enyịn mbiere nte owo etiede. Imọkọm Abasi sia Jehovah isehe nte owo etiede ke enyọn̄ idem kpọt. Imenen̄ede ikụt emi ke se ẹbụkde ke 1 Samuel 16:1-12.
Da enyịn ikike se se iketịbede. Jehovah oyom ndiyet obufa edidem aran man akara idụt Israel. Abasi ọdọhọ prọfet Samuel ete: “Nyọdọn̄ fi utom ke ebiet Jesse eyen Bethlehem: koro mmokụt edidem mi ke otu nditọ-iren esie.” (Ufan̄ikọ 1) Jehovah isiakke owo enyịn̄, edi ọdọhọ n̄kukụre ke imọ imek kiet ke otu nditọiren Jesse. Nte Samuel asan̄ade aka Bethlehem, anaedi enye ekere ete, ‘Ndisan̄a didie mfiọk eyen Jesse emi Jehovah emekde?’
Ke ini Samuel esịmde Bethlehem, enye okot Jesse ye nditọiren esie ẹdidia uwa emem. Ke ini Eliab, akpan Jesse asan̄ade ebe, Samuel ọsọsọp ama nte enye eyede. Nte Eliab okon̄de idaha anam Samuel ekere ke enye odot ndidi edidem, onyụn̄ ọdọhọ ete: “N̄kọm enye emi Jehovah ediyetde aran odu enye ke iso.”—Ufan̄ikọ 6.
Edi Jehovah isehe ntre. Enye ọdọhọ Samuel ete: “Kûse enye iso, kûnyụn̄ use nte enye okon̄de idaha; koro mmesịn enye.” (Ufan̄ikọ 7) Idịghe idaha ye uyai Eliab ke Jehovah ekese. Enyịn Jehovah emi okụtde kpukpru n̄kpọ isehe uyai enyọn̄ idem edi ese ebiet emi ata uyai odude.
Jehovah ọkọdọhọ Samuel ete: “Koro (mmensehe) nte owo esede; koro owo esede enyịn, edi Jehovah ese esịt.” (Ufan̄ikọ 7) Ih, se ibehede Jehovah ikan edi nte esịt owo etiede—oro edi, se owo esikerede, edu ye mme ntụk esie. ‘Andidomo esịt owo’ esịn Eliab, ọkọrọ ye nditọiren Jesse itiokiet eken oro ẹsan̄ade ẹbe ke iso Samuel.—Mme N̄ke 17:3.
Eyen Jesse kiet en̄wen ke ososụhọ, ukperedem eyen emi ekerede David, emi ‘ekpemede n̄kpri ufene.’ (Ufan̄ikọ 11) Ntem ẹdọn̄ ẹkeda David ẹsọk Samuel. Ndien Jehovah ọdọhọ Samuel ete: “Daha ke enyọn̄, yet enye aran, koro edide emi edi enye.” (Ufan̄ikọ 12) Edi akpanikọ ke David edi ‘eyenọwọn̄ emi eyịbede, eye iso, onyụn̄ ọfọn ndise.’ Edi nte esịt esie etiede anam Abasi ekem esịt ye enye.—1 Samuel 13:14.
Ke ererimbot oro ẹnen̄erede ẹma uyai mi, nnyịn imekeme ndibọ ndọn̄esịt ndifiọk ke idịghe uyai ke Jehovah Abasi ese. Ibeheke enye m̀mê afo ọniọn̄ didie m̀mê mbon en̄wen ẹdọhọ ke eye didie. Se ibehede enye edi se afo enen̄erede edi, oro edi, nte esịt fo etiede. Ndi ndifiọk emi anam fi oyom ndinyene nti edu emi edinamde Abasi ama fi?