Kpep Nditọ Fo

Jesus Ama Ekpep Nsụkibuot

NDI esisọn̄ fi ndisụk ibuot ndusụk ini?— * Ikpaha owo idem edieke esisọn̄de fi. Esisọn̄ kpukpru owo ndisụk ibuot ndusụk ini. Ndi ama ọfiọk ke idem Jesus ama ekpep ndisụk ibuot?—

Ndi ọmọfiọk owo emi kpukpru n̄kpri nditọwọn̄ ẹkpesụkde ibuot ẹnọ?— Ih, ete ye eka nnyịn. Bible ọdọhọ ete, “Ẹkop uyo ẹnọ mme ete ye eka mbufo ke ebuana ye Ọbọn̄.” (Ephesus 6:1) Anie edi ete Jesus?— Jehovah Abasi, ndien enye edi Ete nnyịn n̄ko. (Matthew 6:9, 10) Edi edieke afo ọdọhọde ke Joseph ekedi ete Jesus, ndien ke Mary ekedi eka esie, emenen n̄ko. Ndi ọmọfiọk nte mmọ ẹkesan̄ade ẹdidi ete ye eka Jesus?—

Angel Gabriel ama asian Mary ke enye oyoyomo onyụn̄ aman eyen okposụkedi emi akanam enye mîfiọkke erenowo. Jehovah akanam akwa utịben̄kpọ emi. Gabriel ọkọdọhọ Mary ete: “Odudu Ata Edikon̄ oyonyụn̄ ofụk fi. Ke ntak oro n̄ko se idimanade edikere edisana, Eyen Abasi.”—Luke 1:30-35.

Abasi ama osio uwem Eyen esie ke heaven edisịn ke idịbi Mary. Eyen oro ama ọkọri ke idịbi esie, ukem nte nseknditọ eken ẹsikọride ke idịbi eka mmọ. Ke ọfiọn̄ usụkkiet ẹma ẹkebe, Jesus ama amana. Etisịm ini emi, Joseph ama ọdọ Mary, ndien ediwak owo ẹkekere ke Joseph okobon Jesus. Edi Joseph ekedi ebe eka esie. Mmọdo, ẹkeme ndidọhọ ke Jesus ekenyene ete iba!

Ke ini Jesus ekedide isua 12 kpọt, enye ama anam n̄kpọ emi okowụtde adan̄a nte enye akamade Jehovah, emi edide Ete esie eke heaven. Ini oro ubon Jesus ẹma ẹsan̄a anyan isan̄ ẹka ndikodụk usọrọ Passover ke Jerusalem, nte ido mmọ ekedide. Ke ini mmọ ẹkefiakde ẹnyọn̄ọ Nazareth, Joseph ye Mary ikọfiọkke ke Jesus ikasan̄ake ye mmimọ. Nso ikanam mmọ ẹfre enye?—

Ọfọn, etisịm ini oro Joseph ye Mary ẹma ẹnyene nditọ en̄wen. (Matthew 13:55, 56) Onyụn̄ etie nte iman mmọ ẹma ẹsan̄a ye mmọ n̄ko, utọ nte James ye John ọkọrọ ye Zebedee ete mmọ, ye Salome eka mmọ, emi anade edi ekedi eyeneka Mary. Ntre, anaedi Mary ekekere ke Jesus akasan̄a ye iman esie oro ẹketienede ẹsan̄a ke udịm oro.—Matthew 27:56; Mark 15:40; John 19:25.

Ke ini Joseph ye Mary ẹkedide ẹdifiọk ke Jesus ikasan̄ake ye mmimọ, mmọ ẹma ẹsọsọp ẹfiak ẹka Jerusalem. Mmọ ẹma ẹyom eyen mmọ ke mbrenyịn. Mmọ ẹma ẹkụt enye ke temple ke ọyọhọ usen ita. Mary ama ọdọhọ enye ete: “Ntak emi afo anamde n̄kpọ ntem ye nnyịn? Sese ami ye usọ imasan̄a iyom fi ye mfụhọ.” Edi Jesus ọdọhọ enye ete: “Ntak emi mbufo ẹkesan̄ade ẹyom mi? Nte mbufo ikọfiọkke ite nnyene ndidu ke ufọk Ete mi?”—Luke 2:45-50.

Ndi etie fi nte ke usụn̄ oro Jesus ọkọbọrọde  eka esie ikọ ikọfọnke?— Ọfọn, ete ye eka esie ẹma ẹfiọk ke enye ama esima ndituak ibuot nnọ Abasi ke ufọk Abasi. (Psalm 122:1) Ntre, ndi ama ọdiọk Jesus ndikere ke mmọ ẹkpekebem iso ẹyom imọ ke temple Abasi?— Mary ama aka iso ekere aban̄a ikọ oro Jesus eketịn̄de do.

Jesus akanam n̄kpọ didie ye Joseph ye Mary?— Bible ọdọhọ ete: “[Jesus] asan̄a ye mmọ osụhọde edi ke Nazareth, onyụn̄ aka iso osụk ibuot ọnọ mmọ.” (Luke 2:51, 52) Nso ke nnyịn ikeme ndikpep nto Jesus?— Ih, ana isisụk ibuot inọ ete ye eka nnyịn n̄ko.

Edi ikedịghe mmemmem n̄kpọ inọ Jesus ndisụk ibuot kpukpru ini—idem ndisụk ibuot nnọ Ete esie eke heaven.

Ke okoneyo oro ekesierede usen oro ẹkewotde Jesus, enye ama obụp Jehovah m̀mê enye ekeme ndikpụhọde se enye ọkọdọn̄de imọ idinam. (Luke 22:42) Edi Jesus ama anam se Abasi ọkọdọn̄de enye okposụkedi emi mîkedịghe mmemmem n̄kpọ inọ enye. Bible ọdọhọ ke “enye ama ekpep nsụkibuot oto ke ndutụhọ oro enye okokụtde.” (Mme Hebrew 5:8) Ndi emekere ke nnyịn n̄ko imekeme ndikpebe enye?—

[Ikọ Idakisọn̄]

MBỤME:

Mary akasan̄a didie edidi eka Jesus, ndien Jesus akasan̄a didie edinyene ete iba?

▪ Ntak emi ete ye eka Jesus mîkọfiọkke ke Jesus ikasan̄ake ye mmimọ ke usụn̄ unyọn̄ọ?

▪ Jesus ekekere ke ete ye eka imọ ẹkpekeyom imọ ke m̀mọ̀n̄?

▪ Nso ke afo ekeme ndikpep nto Jesus?

[Ndise ke page 31]

Ntak emi afo ekerede ke Joseph ye Mary ẹkpekebem iso ẹyom Jesus ke temple?