Ndi Ama Ọfiọk?

Ke ẹsiode Bible ẹfep, nso en̄wen iwụt ke Jesus ekedi ata owo?

▪ Ediwak mme ewet n̄wed oro ẹkedude uwem ẹkpere ini oro Jesus okodude ẹma ẹtịn̄ ẹban̄a enye. Cornelius Tacitus, emi ekewetde mbụk Rome ke ini ikpọ ndidem ẹkekarade ekedi kiet ke otu mmọ. Tacitus ọdọhọ ke mme owo ẹma ẹdọhọ ke ikop ite ke Akwa Edidem Nero akanam ikan̄ ata Rome ke isua 64 E.N. Tacitus ọdọhọ ke Nero ama odomo ndidọhọ ke otu emi mme owo ẹkekotde Christian ẹkenam. Tacitus ewet ete: “Pontius Pilate, owo ukara Rome ama owot Christus, emi ẹdade enyịn̄ oro [Christian] ẹto, ke ini ukara Tiberius.”—Annals, XV, 44.

Flavius Josephus, eyen Jew emi ekedide ewet mbụkeset ama etịn̄ n̄ko aban̄a Jesus. Ke ini Josephus eketịn̄de aban̄a mme n̄kpọ oro ẹketịbede ke ini emi Festus, andikara Judea, akakpade ke n̄kpọ nte isua 62 E.N., ye ini emi Albinus akadade itie esie, Josephus ọdọhọ ke Ananus (Annas), Akwa Oku “ama osop mme ebiereikpe Sanhedrin onyụn̄ ada owo emi ekerede James, eyeneka Jesus emi ẹkotde Christ, ye owo ifan̄ en̄wen, ẹdida ke iso mmọ.”—Jewish Antiquities, XX, 200 (ix, 1).

Jesus, ntak emi ẹkekotde enye Christ?

▪ Mme Gospel ẹdọhọ ke ini angel Gabriel okowụtde Mary idem man asian enye ke enye oyoyomo, ke enye ama ọdọhọ ke Mary edisio eyen esie Jesus. (Luke 1:31) Enyịn̄ emi ekedi ọsọ enyịn̄ mme Jew ke eyo Bible. Josephus, eyen Jew emi ekesiwetde mbụkeset, ama ewet aban̄a owo 12 emi ẹkekerede Jesus, emi mîsịneke ke otu mbon oro ẹsiakde ke Bible. Ẹkekot eyen Mary, “eyen Nazareth,” emi akanamde ẹfiọk enye nte Jesus emi okotode Nazareth. (Mark 10:47) Ẹma ẹdi ẹdifiọk enye n̄ko nte “Christ,” m̀mê Jesus Christ. (Matthew 16:16) Nso ke emi ọwọrọ?

Ẹda Ikọmbakara emi “Christ” ẹto ikọ Greek oro Khri·stosʹ, emi edide ukem ye ikọ Hebrew oro Ma·shiʹach (Messiah). Ikọ mbiba emi ẹwọrọ ke ata ata usụn̄ “Enye Oro Ẹyetde Aran.” Ẹma ẹnọ mbon en̄wen oro ẹdotde udorienyịn̄ emi mbemiso Jesus. Ke uwụtn̄kpọ, ẹkedọhọ ke Moses, Aaron, ye Edidem David ẹkedi mbon oro ẹyetde aran, emi ọwọrọde ke Abasi ama emek mmọ ọnọ akpan utom ye odudu. (Leviticus 4:3; 8:12; 2 Samuel 22:51; Mme Hebrew 11:24-26) Jesus, kpa Messiah emi ẹken̄wọn̄ọde, ekedi akakan andida ke ibuot Jehovah. Do, ama enen̄ede odot ẹnọ Jesus udorienyịn̄ oro “Christ, Eyen odu-uwem Abasi.”—Matthew 16:16; Daniel 9:25.

[Ndise ke page 15]

Ndise Flavius Josephus