Mbụme Oro Mme Andikot Ẹbụpde . . .

Ndi Jesus edi Michael, Etubom Mme Angel?

▪ Ke nditịn̄ ibio ibio, ibọrọ edi ih. Edi ọsọ n̄kpọ ke ediwak ebiet mme owo ndikere ediwak enyịn̄. Kpasụk ntre ke edi ye mme enyịn̄ oro ẹdude ke Bible. Ke uwụtn̄kpọ, Jacob ekere Israel n̄ko. (Genesis 35:10) Ẹkot apostle Peter nsio nsio enyịn̄ ition—oro edi, Symeon, Simon, Peter, Cephas, ye Simon Peter. (Matthew 10:2; 16:16; John 1:42; Utom 15:7, 14) Ikeme ndisan̄a didie nnen̄ede mfiọk ke Michael edi enyịn̄ en̄wen emi ẹsikotde Jesus? Kere ban̄a se N̄wed Abasi etịn̄de mi.

Bible etịn̄ utịm ikotion aban̄a Michael okopodudu angel. Ikata odu ke n̄wed Daniel. Ẹdọhọ ke Daniel 10:13, 21 ẹte ke Michael, emi ẹkotde “akpan mbọn̄ kiet” ye “ọbọn̄ mbufo” ama anyan̄a angel kiet emi ẹkedọn̄de utom. Ekem, Daniel 12:1 asian nnyịn ke “Michael akwa ọbọn̄ emi adade aban̄a nditọ orụk fo, ayadaha ada” ke utịt ini.

Ebiet en̄wen oro ẹtịn̄de ẹban̄a Michael edi ke Ediyarade 12:7, emi etịn̄de nte “Michael ye mme angel esie” ẹken̄wanade akpan ekọn̄ emi ẹkedade ẹsio Satan kpa Devil ye ndiọi angel esie ke heaven.

N̄kọ omokụt ke kpukpru se itịn̄de iban̄a Michael mi, ke ẹwụt enye nte angel emi an̄wanade ọnọ onyụn̄ ekpemede ikọt Abasi, idem an̄wanade ye akakan asua Jehovah, kpa Satan.

Jude ufan̄ikọ 9 okot Michael “etubom mme angel.” Akananam Bible itịn̄ke iban̄a “etubom mme angel” nte ediwak. N̄kukụre ebiet en̄wen oro ẹfiakde ẹsiak “etubom mme angel” edi ke 1 Thessalonica 4:16, emi apostle Paul etịn̄de aban̄a Jesus oro ẹkenamde eset ete: “Ọbọn̄ [Jesus] ke idemesie oyoto ke heaven osụhọde ye ọkpọsọn̄ n̄kpo, ye uyo etubom mme angel ye ukotowo Abasi.” Ntre ẹdọhọ mi ke Jesus Christ ke idem esiemmọ edi etubom mme angel, m̀mê ọbọn̄ mme angel.

Nso idi ekikere nnyịn ke ima ikeneme kpukpru emi? Jesus Christ edi Michael, etubom mme angel. Enyịn̄ mbiba—Michael (emi ọwọrọde “Anie Etie nte Abasi?”) ye Jesus (emi ọwọrọde “Jehovah Edi Edinyan̄a”)—ẹnam ẹfiọk utom esie nte akpan andida nnọ ukara Abasi. Philippi 2:9 ọdọhọ ete: “Abasi ekemenede enye [Jesus oro ẹnọde ubọn̄] enịm ke itie emi okon̄de akan onyụn̄ ọnọ enye enyịn̄ oro okon̄de akan kpukpru enyịn̄.”

Ọfọn inen̄ede ifiọk ke idịghe ini oro Jesus akamanade mi ke isọn̄ ekedi ntọn̄ọ uwem esie. Mbemiso Jesus akamanade, angel ama edi edise Mary onyụn̄ asian enye ke enye oyoyomo ke edisana spirit, onyụn̄ ọdọhọ ke enye enyene ndisio eyen oro Jesus. (Luke 1:31) Ke ini Jesus akanamde utom ukwọrọikọ, enye ama esiwak nditịn̄ mban̄a ini oro enye okodude uwem mbemiso ekedide owo.—John 3:13; 8:23, 58.

Ntre, Michael, etubom mme angel, edi Jesus mbemiso ekedide isọn̄. Ke ẹma ẹkenam Jesus eset afiak ọnyọn̄ heaven, enye ama afiak ọtọn̄ọ utom esie nte Michael, kpa ọbọn̄ mme angel, ‘ọnọ Abasi Ete ubọn̄.’—Philippi 2:11.