Se Jesus Ekekpepde Mme Owo Aban̄a Idemesie

“Jesus ama enen̄ede ọfiọk owo emi enye ekedide, ebiet emi enye okotode edi, ntak emi enye ekedide ererimbot nnyịn, ye se iditịbede inọ enye ke ini iso.”—HERBERT LOCKYER.

OYOM ifiọk n̄kpọ iban̄a Jesus mbemiso inyịmede inyụn̄ ibuọtde idem ke se enye ekekpepde. Jesus ekenen̄ede edi anie? Enye okoto m̀mọ̀n̄ edi? Nso ke enye ekedi ndinam? Gospel Matthew, Mark, Luke, ye John ẹwụt nte Jesus ke idem esiemmọ ọbọrọde mme mbụme emi.

Enye ama ododu uwem mbemiso ekedide edimana ke isọn̄ Jesus ama ọdọhọ ini kiet ete: “Ami mma ndodu mbemiso Abraham edidu.” (John 8:58) N̄kpọ nte isua 2,000 ẹma ẹbe tọn̄ọ Abraham okodu uwem mbemiso ẹkemande Jesus. Edi Jesus ama ododu uwem mbemiso anam-akpanikọ ete-ekpụk oro akamanade. Enye okodu uwem ke m̀mọ̀n̄? Enye ọkọdọhọ ete: ‘N̄koto heaven nsụhọde ndi.’—John 6:38.

Eyen Abasi Jehovah enyene ediwak nditọ emi ẹdide mme angel. Edi Jesus edi san̄asan̄a Eyen. Enye okokot idemesie: “Ikpọn̄-ikpọn̄ edibon Eyen Abasi.” (John 3:18) Ikọ oro ọwọrọ ke Jesus ikpọn̄ edi n̄kukụre eyen emi Jehovah okobotde ke idemesie. Abasi akada ikpọn̄-ikpọn̄ edibon Eyen esie obot kpukpru n̄kpọ eken.—Colossae 1:16.

“Eyen owo” Jesus ama awak ndikot idemesie enyịn̄ emi akan enyịn̄ en̄wen ekededi. (Matthew 8:20) Ntem, enye ama owụt ke imọ ikedịghe angel emi ekemende idem eke obụk esịne, m̀mê abasi emi ekedide isọn̄ ke mbiet owo. Utu ke oro, enye ekedi ata owo. Abasi ama ada edisana spirit esie osio uwem Eyen esie ke heaven edisịn ke idịbi Mary emi mîkọfiọkke erenowo. Emi ama anam Jesus amana nte mfọnmma owo emi mînyeneke idiọkn̄kpọ ndomokiet.—Matthew 1:18; Luke 1:35; John 8:46.

Messiah oro ẹken̄wọn̄ọde N̄wan a-Samaria ọkọdọhọ Jesus ete: ‘Mmọfiọk nte ke Messiah ke edi.’ Jesus ọbọrọ enye ete: “Ami emi ntịn̄de ikọ mi ye afo ndi enye.” (John 4:25, 26) “Messiah” ye “Christ” ẹwọrọ “Enye Oro Ẹyetde Aran.” Abasi ekeyet Jesus aran, m̀mê emek enye, ọnọ akpan ifet man osu uduak Abasi.

Akpan ntak emi enye ekedide isọn̄ Jesus ọkọdọhọ inikiet ete: “Ana ntan̄a eti mbụk obio ubọn̄ Abasi . . . koro ẹkesio mi ẹdọn̄ ẹte ndinam emi.” (Luke 4:43) Okposụkedi emi Jesus akanamde ediwak nti n̄kpọ ọnọ mme ubuene, ndikwọrọ etop Obio Ubọn̄ Abasi ke enye akada ke akpan n̄kpọ akan. Ama ekem, iyeneme se enye ekekpepde mme owo aban̄a Obio Ubọn̄ oro.

Ke akpanikọ, Jesus ekedi ata a-san̄asan̄a owo. * Nte idikụtde, uwem oro enye okodude ke heaven ama enen̄ede anam ikọ emi enye eketịn̄de ke ini emi enye okodude ke isọn̄ enen̄ede esịne ifiọk. Imosụk ise nte etop esie otụkde uwem ata ediwak owo ke ererimbot!

[Ikọ Idakisọn̄]