Se Jesus Ekekpepde Mme Owo Aban̄a Obio Ubọn̄ Abasi

“Enye asan̄a ke kpukpru obio ye obio-in̄wan̄ ọkwọrọ . . . eti mbụk obio ubọn̄ Abasi.”—LUKE 8:1.

NNYỊN imesima nditịn̄ mban̄a mme n̄kpọ oro ẹbehede nnyịn ye mme n̄kpọ oro imade. Jesus ke idem esiemmọ ọkọdọhọ ete: “Oto uyọhọ esịt inua osio etịn̄.” (Matthew 12:34) Mme n̄kpọ oro Jesus ekesitịn̄de aban̄a ke ini enye ọkọkwọrọde ikọ mi ke isọn̄ ẹwụt ke Obio Ubọn̄ Abasi ekenen̄ede ebehe enye.

Nso idi Obio Ubọn̄ Abasi? Obio ubọn̄ edi ukara emi edidem akarade. Mmọdo, Obio Ubọn̄ Abasi edi ukara Abasi. Jesus ama enen̄ede etịn̄ aban̄a Obio Ubọn̄ Abasi, tutu anam enye edi ibuotikọ ukwọrọikọ esie. Ẹtịn̄ ẹban̄a Obio Ubọn̄ oro ẹbe utịm ike 110 ke Gospel mbinan̄. Edi Jesus iketịn̄ke-tịn̄ n̄kpọ kpọt iban̄a Obio Ubọn̄ Abasi. Edinam esie n̄ko ama ekpep mme owo ekese aban̄a Obio Ubọn̄ emi ye se Obio Ubọn̄ emi edinamde.

Anie edi Edidem? Idịghe mme owo ẹsịn n̄wed ẹmek owo emi edide Edidem Obio Ubọn̄ Abasi. Utu ke oro, Abasi ke idem esiemmọ emek Andikara emi. Ke ini Jesus ekekpepde mme owo n̄kpọ, enye ama asian mmọ ke imọ ke Abasi ekemek nte Edidem.

Jesus ama ọfiọk ke mme ntịn̄nnịm ikọ Bible ẹma ẹdọhọ ke Messiah oro ẹken̄wọn̄ọde edikara Obio Ubọn̄ emi edidude ke nsinsi. (2 Samuel 7:12-14; Daniel 7:13, 14; Matthew 26:63, 64) Ti ete ke Jesus ama etịn̄ an̄wan̄wa ke imọ idi Messiah oro ẹken̄wọn̄ọde. Ke ntre, Jesus ekenyịme ke imọ idi Edidem emi Abasi emekde. (John 4:25, 26) Jesus ama ọdọhọ ediwak ini ete, “obio ubọn̄ mi.”—John 18:36.

Jesus ama onyụn̄ ekpep mme owo ete ke mbon en̄wen ẹyetiene imọ ẹkara ke Obio Ubọn̄ oro. (Luke 22:28-30) Enye okokot mbon emi ẹditienede enye ẹkara mi “ekpri otuerọn̄,” sia mmọ iwakke. Enye eketịn̄ ntem aban̄a mmọ: “Ete mbufo emenyịme ndida obio ubọn̄ oro nnọ mbufo.” (Luke 12:32) Akpatre n̄wed Bible ọdọhọ ke owo 144,000 ẹdinyene ifet ndiketiene Christ n̄kara.—Ediyarade 5:9, 10; 14:1.

Obio Ubọn̄ oro odu ke m̀mọ̀n̄? Jesus ọkọdọhọ Pontius Pilate, emi ekedide owo ukara Rome, ete: “Obio ubọn̄ mi idịghe ubak ererimbot emi.” (John 18:36) Mme owo ididaha ke ibuot Obio Ubọn̄ Abasi emi Christ akarade, ikara. Jesus ama esiwak ndikot Obio Ubọn̄ Abasi, “obio ubọn̄ heaven.” * (Matthew 4:17; 5:3, 10, 19, 20) Ke ntre, Obio Ubọn̄ Abasi edi ukara eke heaven.

 Jesus ama enen̄ede odori enyịn ndifiak nnyọn̄ heaven ke enye ama okokụre utom esie mi ke isọn̄. Enye ọkọdọhọ ke imọ imọn̄ ika ‘iketịm itie’ do, man mbon oro ẹdikarade ye imọ ẹkpetiene imọ.—John 14:2, 3.

Nso ke Obio Ubọn̄ oro anam? Jesus ama ekpep mme andikpan̄ utọn̄ nnọ enye ete ẹbọn̄ akam ẹnọ Abasi ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:9, 10) Ke ẹnam uduak Abasi ke heaven. Obio Ubọn̄ oro ke ẹdida ẹnam uduak Abasi mi ke isọn̄. Man ẹnam oro, Obio Ubọn̄ oro eyenen̄ede okpụhọde mme n̄kpọ ke isọn̄ emi.

Nso ke Obio Ubọn̄ oro edinam ke isọn̄? Jesus ama ekpep mme owo ete ke Obio Ubọn̄ Abasi eyetre idiọkido ke ndisobo mbon oro ẹsọn̄ọde ẹyịre ndinam idiọkido. (Matthew 25:31-34, 46) Oro ọwọrọ ke kpukpru ubiatibet ye idiọkido ẹyetre. Jesus ama ekpep mme owo ke mbon oro ẹnyenede “ifụre ifụre ido,” ẹdide nti, ẹtuade owo mbọm, ẹnyenede ‘edisana esịt,’ ẹnyụn̄ ẹmade ‘ndinam emem’ ẹdidụn̄ ke isọn̄.—Matthew 5:5-9.

Ndi utọ ndinen owo oro ẹdidụn̄ ke isọn̄ oro ẹsabarede? N̄wan̄ansa-o! Jesus ama ọn̄wọn̄ọ ke ẹyenen̄ede ẹkpụhọde n̄kpọ ke isọn̄ ke ini Obio Ubọn̄ Abasi edikarade. Owo emi ẹkekọn̄de ke eto ẹkpere Jesus ọkọdọhọ ete: “Jesus, ti mi ke ini afo odụkde ke obio ubọn̄ fo.” Jesus ama ọbọrọ enye ete: “Ke akpanikọ ke ndọhọ fi mfịn emi, Afo oyodu ye ami ke Paradise.” (Luke 23:42, 43) Ke akpanikọ, Obio Ubọn̄ Abasi ayanam isọn̄ emi akabade Paradise—anam etie nte eketiede ke In̄wan̄ Eden.

Nso en̄wen ke Obio Ubọn̄ oro edinam ọnọ ubonowo? Jesus iketịn̄ke-tịn̄ kpọt se Obio Ubọn̄ Abasi edinamde. Enye ama onyụn̄ ananam owụt se Obio Ubọn̄ oro edinamde.  Jesus ama ọkọk ediwak owo udọn̄ọ ke utịbe utịbe usụn̄, ke ntre, enye ama owụt esisịt se imọ idinamde ọyọhọ ọyọhọ ke ini idikarade ke Obio Ubọn̄ imọ. Gospel emi ẹkedade odudu spirit Abasi ẹwet etịn̄ ntem aban̄a Jesus: “Enye asan̄a akanade ofụri Galilee, ekpep n̄kpọ ke mme synagogue mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ ye kpukpru orụk ndiọkidem ke otu mme owo.”—Matthew 4:23.

Jesus ama ọkọk nsio nsio orụk udọn̄ọ. Enye ama “atat enyịn owo emi akamanade nnan.” (John 9:1-7, 32, 33) Jesus ama otụk owo emi ọkọdọn̄ọde akpamfia onyụn̄ ọkọk enye. (Mark 1:40-42) Ke ini ẹkemende “owo emi edide inan onyụn̄ enyenede mfịna utịn̄ikọ” ẹsọk Jesus, enye ama owụt ke imọ imekeme ndinam “mme inan ẹkop ikọ, imụm ẹnyụn̄ ẹtịn̄ ikọ.”—Mark 7:31-37.

Edidem emi Abasi emekde mi ama onyụn̄ anam mme akpan̄kpa ẹset. Jesus ama anam owo ita ke nsio nsio ebiet ẹset. Enye ama anam ikpọn̄-ikpọn̄ eyen ubuene ebeakpa eset, anam eyenan̄wan isua 12 eset, onyụn̄ anam Lazarus edima ufan esie eset.—Luke 7:11-15; 8:41-55; John 11:38-44.

Jesus ama anam apostle John etịn̄ ntịn̄nnịm ikọ aban̄a utịbe utịbe n̄kpọ oro anade ebet mbon oro Obio Ubọn̄ Abasi edikarade ete: “Sese! Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” (Ediyarade 1:1; 21:3, 4) Kam kere ban̄a ererimbot emi mmọn̄eyet mfụhọ, ubiak, ye n̄kpa mîdụhe! Adan̄a do, ẹyeyere akam emi ibọn̄de ite ẹnam uduak Abasi ke isọn̄ nte ẹnamde ke heaven ofụri ofụri.

Ini ewe ke Obio Ubọn̄ Abasi edidi? Jesus ekekpep mme owo ete ke ini emi imọ iditọn̄ọde ukara edidi ke ini emi enye okokotde ini “edidu” imọ. Jesus ama etịn̄ ediwak n̄kpọ emi ẹditịbede man ẹwụt ke imọ imọtọn̄ọ ndikara. Ediwak afanikọn̄ ẹyedu ke ofụri isọn̄ ini oro, esịnede ekọn̄, akan̄, unyekisọn̄, ndiọi udọn̄ọ, ye ukwan̄ido nditọt. (Matthew 24:3, 7-12; Luke 21:10, 11) Mme n̄kpọ emi ye ediwak n̄kpọ eken oro Jesus eketịn̄de ẹmenen̄ede ẹtịbe ọtọn̄ọde ke 1914, kpa isua emi akpa ekọn̄ ererimbot akasiahade. Ke ntre, Jesus ke akara idahaemi nte Edidem. Idibịghike, Obio Ubọn̄ oro eyedi onyụn̄ anam ẹnam uduak Abasi ke isọn̄. *

Nso ke Obio Ubọn̄ Abasi ndidi ediwọrọ ọnọ fi san̄asan̄a? Oro editiene se afo anamde aban̄a etop Jesus.

[Mme Ikọ Idakisọn̄]