Ndi Nnyịn Idaha Aba Idiọkn̄kpọ nte Idiọk?

INEN̄EKEDE ibịghi mme aka ufọkabasi ẹketre ndikop nte mme pastọ mmọ ẹsọn̄de uyo ẹkpan mme owo ndinam se ẹsikotde “ikpọ idiọkn̄kpọ itiaba”—oro edi, ọkpọsọn̄ udọn̄ idan̄, uma udia, uma-inyene, ifu, iyatesịt, isịnenyịn, ye ntan̄idem. Mme pastọ ẹma ẹsiwak nditịn̄ mban̄a mme utịp idiọkn̄kpọ emi ẹnyụn̄ ẹsịn udọn̄ ẹnọ ikọt mmọ ẹte ẹkabade esịt. Ewet n̄wed kiet ọdọhọ ete: “Idahaemi, ata ediwak mme pastọ imaha aba nditịn̄ nte idiọkn̄kpọ ọdiọkde, edi ẹnen̄ede ẹtịn̄ ‘se mme owo ẹmade ndikop.’”

Mme ewet n̄wedmbụk n̄kpọntịbe ẹdọhọ kpa ntre n̄ko. Kop se ndusụk mmọ ẹtịn̄de mi:

▪ “Owo imaha aba nditịn̄ mban̄a idiọkn̄kpọ, edikabade esịt ye edinyan̄a, edi ẹdikwọrọ mme n̄kpọ emi ẹdinamde owo enyene uku ye nte owo akpamade idemesie.”—Star Beacon, Ashtabula ke Ohio ke U.S.A.

▪ “Etie nte mme owo ikereke aba iban̄a idiọkn̄kpọ mmọ.”—Newsweek.

▪ “Nnyịn ibụpke aba ‘Nso ke Abasi oyom nnam,’ edi idibụp ‘Nso ke Abasi ekeme ndinam nnọ mi?’”—Chicago Sun-Times.

Ke ererimbot mfịn emi mme owo ẹdide ata nsio nsio ẹnyụn̄ ẹnyịmede n̄kpọ ekededi mi, mme owo isọpke ndidọhọ ke se owo anamde ifọnke. Ẹdọhọ ke idịghe eti ido ndidọhọ ke se owo anamde ifọnke. Akam etie nte akakan idiọkn̄kpọ edi ndidọhọ ke se owo en̄wen anamde ifọnke. Ntak edi oro ẹsikerede ẹte: ‘Se afo enịmde ekeme ndifọn ye afo, edi afo ukpedehedei unyịk owo en̄wen enyịme se afo enịmde. Idahaemi, mme owo ẹda nsio nsio edumbet ẹdu uwem. Idịghe owo kiet kpọt ọfiọk se inende. Edumbet mbon en̄wen ẹfọn ukem nte okwommọ.’

Utọ ekikere emi anam ẹsion̄o ikọ ẹdi emi anamde idiọkn̄kpọ etie nte inen̄ekede idiọk. Ke uwụtn̄kpọ, owo idọhọke aba ke “owo anam use,” ẹdidọhọ ke “owo enyene ndantie.” Owo idọhọke aba ke owo “esịn efịbe,” edi ẹdidọhọ ke “owo ama owo.”

Eyịghe idụhe ke se mme owo ẹben̄ede idem ndinyịme nte “eti n̄kpọ” m̀mê se ẹdade nte “idiọkn̄kpọ” omokpụhọde. Edi ntak emi mme owo mîdaha aba idiọkn̄kpọ nte idiọk? Ndi idiọkn̄kpọ idụhe aba? Ndien ndi nte afo esede idiọkn̄kpọ enen̄ede edi akpan n̄kpọ?