Leta South Africa

“Nso Ikpanam Owo Atuak Ada Mi?”

IDIỌN̄Ọ oro ẹwụkde ke mben mfafaha usụn̄ obio-in̄wan̄ ọtọt ete: “OBIO AFANIKỌN̄ EDI EMI—N̄WO YE USAN̄A AKPARA.” Ima iwaha usụn̄ oro obu ọyọhọde man ikosobo ye mme owo ke ubomisọn̄ eken oro ẹbetde ke idak akamba obukpọk ntọt oro owụtde usụn̄ oro ẹsan̄ade ẹka uwouwo itie udia uwem ye akwa ufọk mbre mfọniso, emi odude ke usụk usụk usụn̄ oro. Mme ọsọn̄urua ubomisọn̄ ke ẹwat ẹbe usọp usọp, ndien ima ikụt nte mme owo ẹkenyụn̄ọde ke window ẹse nnyịn ke n̄kpaidem; iso mmọ eketie nte mmọ ẹbụp ẹte: ‘Nso ikpanam owo atuak ada mi?’

Ubomisọn̄ nnyịn atuak ada, nnyịn iwọrọ itiene otuowo oro ẹsịnede ọfọn̄ ediye ediye ẹda ke mfụt akamba obukpọk ntọt oro. Mme owo emi ẹtode nsio nsio orụk ye ekpụk ẹsịne ke otu emi, kpa n̄kpọ emi owo mîsụk iwakke ndikụt ke South Africa. Nnyịn iwat ke n̄kpọ nte kilomita 100 idi obio emi, emi odude ke edere n̄kan̄ usoputịn Johannesburg mi, man idineme akpanikọ Bible ye mbon oro ẹdụn̄ọde ke mme obio-in̄wan̄ emi.

Imenịm ibio ibio mbono ke mbenusụn̄ oro, ineme itie N̄wed Abasi inyụn̄ inam akpatre ndutịm man ika ibịne mme owo ke ufọk ke ufọk. Ibọn̄ akam inyụn̄ ifiak ikodụk ubomisọn̄ nnyịn. Ufọk ye mme ataya emi ẹbọpde nte ẹmama ẹdu ko nsannsan ẹma ẹbe unaisọn̄. Mme ufọk emi ẹditie nte ẹdi ata n̄kpri ke ntak ata ikpọ mbubịt ibombom emi mme ọdọk a-platinum ẹnamde. Mme owo mi ẹnen̄ede ẹbuene, okposụkedi emi ata ekese oto-obot n̄kpọ ẹdude ke isọn̄ mmọ.

Ami ye n̄wan mi isan̄a ye isenowo iba emi ẹtode Germany, ndien nnyịn mbinan̄ itọn̄ọ usen mfịn ke ndisan̄a to ke ufọk sịm ufọk. Owo iba ke otu kpukpru owo ita oro ẹdụn̄de mi inyeneke utom, ntre ufọk mmọ idịghe ufọk mme imọ owo. Ediwak ẹdi ataya emi ẹdade utak-usụhọ obukpọk, tian, ikpọ okpukwak, ye okukịp beer ẹkọn̄.

Ima ikpere ufọk owo, iyada ke inuaotop ikọm mme enyene-ufọk, ndien iban ẹwak ndiwọrọ ndi. Mbon oro ikwọrọde ikọ inọ ẹnen̄ede ẹma ndikop etop oro idade idi, ẹnyụn̄ ẹnam n̄kpọ ye nnyịn ukpono ukpono. Ọkpọsọn̄ ufiop eyo oro amiade tian ọkọm ufọk anam ufọk ofiop nte itie utem bred ke uwemeyo. Esiwak ndidọn̄ nditọwọn̄ ẹdụk esịt ufọk ẹketan̄ akpakaha ẹdibon ke idak eto ẹnyụn̄ ẹkot nnyịn iditie ke mfụt.

Ubon oro ẹdiboho, ẹtie ke n̄kpotụk n̄kpotụk anyan ifịm, m̀mê ke ekebe mmịn oro ẹwọn̄ọrede ẹkụbi. Ẹkot idem n̄kpri nditọ ẹte ẹyak n̄kpọmbre mmọ ẹbon ẹtiene ẹdikpan̄ utọn̄.  Nnyịn ikot mme itie N̄wed Abasi inọ mmọ, inyụn̄ idọhọ nditọwọn̄ oro ẹsikade n̄wed ẹkot mme n̄wed un̄wam ukpep Bible nnyịn. Ekpere ndidi kpukpru owo oro isobode ẹnenem esịt ndibọ mme n̄wed nnyịn, ediwak mmọ ẹnyụn̄ ẹdọhọ nnyịn ifiak idi.

Ke ufọt uwemeyo, nnyịn iduọk odudu esịt man idia udia inyụn̄ ida mbịtmbịt n̄kpọ ibịt itọn̄ mbemiso ifiakde ikese mbon oro ikakade ikese mbemiso isan̄ enye emi. Akpa owo oro ikade ikese edi Jimmy, eren Malawi emi odụn̄de mi anam utom ke itie udọk platinum. Ebịghi ikọtọn̄ọ ndisidi ndise Jimmy. Enye esinem esịt ndikụt nnyịn kpukpru ini, nnyịn imesinyụn̄ ida ini ineme Bible ye enye. Jimmy odụn̄ ke Setswana, enye ọdọ eyen obio oro, mmọ ẹnyụn̄ ẹnyene ndiye nditọ iba. Nnyịn ikekwe enye isan̄ oko ikedide, ntre enen̄ede ọdọn̄ nnyịn ndikụt nte n̄kpọ etiede ye enye.

Ke ini ikperede ekpri ufọk Jimmy, nnyịn isọsọp ikụt ke enyene se itịbede. Mbiet ọkọri ofụk ediye in̄wan̄esa esie, ibokpot oro enye ọkọtọde eyemede, nnyịn inyụn̄ ikwe unen oro ẹsisaride isọn̄ ẹyom se ẹdiade. Ẹda ata akamba n̄kpọkọbi ẹkọbi usụn̄. Mbọhọidụn̄ mmọ ọwọrọ edi ndise se itịbede. Nnyịn ibụp m̀mê Jimmy odu m̀mọ̀n̄? Enye ọnọ nnyịn etop emi obụn̄de owo esịt ete: ‘Jimmy ama akpa, ndien n̄wan ye nditọ esie ẹma ẹnyọn̄ ẹkedụn̄ ke edem mme n̄wan.’

Mme owo mi ẹsida ke idịghe eti ido ndibụp se iketịbede, edi nnyịn ibụp se ikowotde Jimmy. Mma oro ete: “Enye ama ọdọn̄ọ, ndien ekem akpa. Udọn̄ọ awak etieti idahaemi. Ata ediwak owo ẹmekpan̄a.” Enye itịn̄ke akpan n̄kpọ emi owotde Jimmy, sia owo mîsiwakke nditịn̄ mban̄a orụk n̄kpọ oro, edi editịbi mbufa udi kpukpru ini ke itie ubụkowo obio oro ọsọn̄ọ ke se Mma oro etịn̄de edi akpanikọ. Nnyịn ineme idotenyịn ediset ke n̄kpa ye enye, ndien ekem isan̄a mfụhọ mfụhọ ibe ika ebiet en̄wen.

Imodụk obio-in̄wan̄ en̄wen inyụn̄ iwat isịm mme akpatre ufọk, ke ebiet emi usiakifia udọk platinum ẹsiduọn̄ọde mbio platinum. Imawaha idụk enen ke utịt efak oro. Ẹwet ikọ emi in̄wan̄-in̄wan̄ ke itiat emi odude ke in̄wan̄esa, ẹte: “Edieke owo mîkemeke ndinam ubiere, ọwọrọ ke enye ayabiat ini.” David, * emi ekewetde n̄kpọ emi, emenede ibuot ke enyọn̄ ke edem engine ntruma edemikụt esie. Atat enyịn ufep ufep ke ntak ọkpọsọn̄ eyo, ndien ekem atuak inua imam ke ini ọfiọkde ke nnyịn ke edi, edet iso esie emi enye adiande gold esem ke un̄wana utịn. Enye ọkwọhọde ubọk edi ndikọm nnyịn.

Enye ọkọm nnyịn ete: “Ufan, ẹmedi-o! Ẹkedu m̀mọ̀n̄?” Esịt enem nnyịn ndifiak n̄kụt David. Enye ekpe nnyịn ubọk ete ke imọ idikemeke nditie ye nnyịn mbịghi mfịn koro ima inyene utom ke itie udọk platinum, ntre ke iyọsọp idaha do. Inua David etie imam imam ke ofụri ini oro inyenede edinem nneme ye enye. Enye etịn̄ ye akwa idatesịt ete: “Uwem mi ama okpụhọde toto ke akpa usen oro mbufo ẹkesobode ye ami! Ntịn̄ akpanikọ, mfiọkke m̀mê n̄kpodu m̀mọ̀n̄ idahaemi edieke mbufo mîkpekedịghe.”

Esịt enem nnyịn etieti, nnyịn ikpọn̄ ebiet David. Imọtọn̄ọ isan̄ unyọn̄ ke ini utịn ọkọhọde itọn̄. Nte iwọn̄ọrede ise unaisọn̄ oro, emi etiede mbukpọn̄ mbukpọn̄ ke ntak un̄wana utịn ye obu, nnyịn ikere m̀mê kpukpru owo emi ẹdinam didie ẹkop eti mbụk. Imenen̄ede ikụt se ikọ Jesus emi ọwọrọde: “Ke akpanikọ, idọk okpon, edi mme anamutom iwakke.”—Luke 10:2.

[Ikọ Idakisọn̄]

[Ebiet Ẹdade Ndise Ẹto ke page 17]

Post ọfis South Africa ẹnọ nnyịn unyịme