Se Bible Ekpepde Aban̄a Idiọkn̄kpọ

NDI owo udọn̄ọ ekeme ndiwụt ke imọ inyeneke ufiopidem edieke enye abiatde n̄kpọ oro ẹsidade ẹdomo ufiop idemowo? Ke akpanikọ, ikemeke! Kpasụk ntre, ediwak owo ndisịn ndinyịme se Abasi adade nte idiọkn̄kpọ iwọrọke ke idiọkn̄kpọ idụhe. Ikọ esie, kpa Bible, etịn̄ ekese aban̄a n̄kpọ emi. Nso ke Bible enen̄ede ekpep aban̄a idiọkn̄kpọ?

Kpukpru Owo Ẹnam Idiọkn̄kpọ

Ke n̄kpọ nte isua tọsịn iba emi ẹkebede, esịt ama ọdiọk apostle Paul sia ‘eti n̄kpọ oro enye okoyomde ndinam enye ikanamke, edi idiọkn̄kpọ oro enye mîkoyomke ndinam kpa oro ke enye akaka iso anam.’ (Rome 7:19) Edieke itịn̄de akpanikọ, iyenyịme ke se isitịbede inọ nnyịn edi oro n̄ko. Ekeme ndidi iyom ndinịm Ibet Duop m̀mê edumbet ido uwem en̄wen, edi m̀mê nnyịn imama m̀mê imaha, idụhe owo oro ekemede ndinịm mmọ edi iduehe. Idịghe nte ke ikokoi imek ndibiat edumbet ido uwem, edi edi sia inyenede mmeme. Asan̄a didie edi ntre? Paul ke idem esiemmọ ọbọrọ ete: “Edieke mmenamke se nyomde ndinam, idịghe aba ami nnam oro, edi edi idiọkn̄kpọ oro odụn̄de mi ke idem.”—Rome 7:20.

Ukem nte Paul, kpukpru owo ẹnyene ndammana mmeme—ndien emi owụt ke ikadada idiọkn̄kpọ ye unana mfọnmma imana. Apostle Paul ọkọdọhọ ete: “Kpukpru owo ẹma ẹnam idiọkn̄kpọ ẹnyụn̄ ẹtaba ubọn̄ Abasi.” Nso idi ntak? Paul aka iso ọdọhọ ete: “Idiọkn̄kpọ [okoto Adam] odụk ke ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”—Rome 3:23; 5:12.

Okposụkedi emi ediwak owo mînịmke ke idiọkn̄kpọ akpa ete ye eka nnyịn ama adian̄ade nnyịn ọkpọn̄ Abasi onyụn̄ anam nnyịn idi mme anana-mfọnmma owo—se Bible enen̄erede ekpep edi oro. Jesus ndikokot nto mme akpa ibuot Genesis owụt ke enye ama enịm mbụk oro aban̄ade Adam ye Eve.—Genesis 1:27; 2:24; 5:2; Matthew 19:1-5.

Kiet ke otu akpan ukpepn̄kpọ Bible edi ke Jesus ekedi isọn̄ man edifak mbon oro ẹbuọtde idem ye enye osio ke idiọkn̄kpọ mmọ. (John 3:16) Idotenyịn uwem ini iso nnyịn ọkọn̄ọ ke nnyịn ndinyịme usụn̄ emi Jehovah adade anyan̄a ubonowo oro ẹwụtde esịtekọm osio ke afanikọn̄ oro mmọ mîkemeke ndinyan̄a. Edi edieke nnyịn mînen̄ekede ifiọk se Abasi adade nte idiọkn̄kpọ, se enye anamde man anyan̄a nnyịn osio ke idiọkn̄kpọ idin̄wan̄ake nnyịn, nnyịn idinyụn̄ iwụtke esịtekọm iban̄a oro.

Uwa Jesus ye Ntak Emi Ẹkeyomde Enye

Jehovah ama ọnọ Adam idotenyịn ndidu uwem ke nsinsi. Enye ọkọdọhọ ke enye ayataba utịbe utịbe idotenyịn emi edieke enye ọsọn̄de ibuot ye imọ. Adam ama ọsọn̄ ibuot, ndien oro ama anam enye akabade anamidiọk. (Genesis 2:15-17; 3:6) Adam ikanamke n̄kpọ ikekem ye uduak Abasi, ikedịghe aba mfọnmma owo, onyụn̄ abiat itie ufan esie ye Abasi. Ke ini enye akanamde idiọkn̄kpọ ke ndibiat ibet Abasi, enye ama ọtọn̄ọ ndikọri nsọn̄, ndien ekem akpa. Ọdiọk etieti sia kpukpru mme andito ubon Adam—esịnede nnyịn—ikadada idiọkn̄kpọ imana, ndien iyakpan̄a ke ntak idiọkn̄kpọ. Ntak-a?

Ibọrọ isọn̄ke. Mme anana-mfọnmma ete ye eka ikemeke ndinyene mfọnmma nditọ. Kpukpru nditọ Adam ẹkedada idiọkn̄kpọ ẹmana, ndien nte apostle Paul ọdọhọde, “n̄kpọ eyenutom idiọkn̄kpọ edi n̄kpa.” (Rome 6:23) Edi  udiana ikpehe ufan̄ikọ oro ọnọ nnyịn idotenyịn emi: “Edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.” Oro ọwọrọ ke n̄kpa uwa ufak Jesus anam mme okopitem ubonowo emi ẹwụtde esịtekọm ẹsana ẹbọhọ utịp idiọkn̄kpọ oro Adam akanamde. * (Matthew 20:28; 1 Peter 1:18, 19) Emi akpanam etie fi didie ke idem?

Ima Christ “Onụk Nnyịn”

Edisana spirit ama anam apostle Paul etịn̄ nte Abasi ọbọrọde mbụme emi. Enye ekewet ete: “Ima Christ onụk nnyịn, koro ibiere ntem ite, owo kiet akakpa aban̄a kpukpru owo; . . . ndien enye akakpa aban̄a kpukpru owo man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.” (2 Corinth 5:14, 15) Edieke owo enịmde ke uwa Jesus ekeme ndinam imọ ibọhọ utịp idiọkn̄kpọ onyụn̄ oyom ndiwụt esịtekọm mban̄a enọ oro, do enye ekpenyene ndidomo ndidu uwem nte Abasi etemede. Emi esịne ndikpep mfiọk se Abasi oyomde oto enye, ndida mme edumbet Bible nnọ ubieresịt esie ukpep, nnyụn̄ nda mmọ ndu uwem.—John 17:3, 17.

Idiọkn̄kpọ ababiat itie ufan nnyịn ye Jehovah Abasi. Ke ini Edidem David ekedide edifiọk adan̄a nte efịbe oro enye ekesịnde ye Bath-sheba ye ndiwot ebe esie ọkọdiọkde, eyịghe idụhe ke bụt ama enen̄ede anam enye. Edi se ikenen̄erede ibehe enye ekedi nte idiọkn̄kpọ esie akayatde Abasi esịt, ndien ama enen oro ndibehe enye. Enye ama atua n̄kpọfiọk onyụn̄ ọdọhọ Jehovah ete: “Mmedue fi, kpa fi ikpọn̄, mmonyụn̄ nnam idiọk ke iso fo.” (Psalm 51:4) Kpasụk ntre, ke ini ẹkeyomde Joseph esịn efịbe, ubieresịt esie ama anam enye obụp ete: “Ndinam didie ndien nnam akwa idiọkn̄kpọ emi nnyụn̄ ndue Abasi?”—Genesis 39:9.

Do, idiọkn̄kpọ idịghe ikpîkpu edikop bụt edieke ẹmụmde nnyịn nte inamde se mîfọnke. Enye idịghe ikpîkpu edibọrọ mme owo m̀mê mbio obio ntak emi nnyịn mîkanamke n̄kpọ nte ẹsinamde. Ndibiat ibet Abasi oro aban̄ade idan̄, edinam akpanikọ, ukpono, utuakibuot, ye ntre ntre, abiat itie ufan nnyịn ye  Abasi. Edieke ikoide-koi ika iso inam idiọkn̄kpọ, nnyịn inam idem nnyịn mme asua Abasi. Oyom inen̄ede itie ikere akpanikọ emi.—1 John 3:4, 8.

Ntre ndi idiọkn̄kpọ idụhe aba? Se idude edi ke idiọkn̄kpọ osụk ododu. Mme owo ẹkot enye mme enyịn̄ en̄wen man ẹnam etie nte ke enye inen̄ekede idiọk. Ediwak owo ẹwot ubieresịt mmọ mîdịghe ẹfụmi enye. Ana kpukpru mbon oro ẹyomde Abasi ama mmimọ ẹbiọn̄ọ utọ edinam oro. Nte ima ikokokụt, n̄kpọ eyenutom idiọkn̄kpọ, idịghe ikpîkpu edisụhọde owo itie m̀mê ndinam enye okop bụt, edi edi n̄kpa. Idiọkn̄kpọ edi n̄kpọ n̄kpa ye uwem.

Eti mbụk edi ke ẹkeme ndida odudu oro uwa Jesus enyenede ndifak owo mfen nnọ nnyịn edieke inen̄erede ikabade esịt inyụn̄ itre idiọkn̄kpọ nnyịn. Paul ekewet ete: “Inemesịt edi eke mmọ oro ẹfende mme ukwan̄ido mmọ ẹnyụn̄ ẹfụkde mme idiọkn̄kpọ mmọ; inemesịt edi eke owo oro Jehovah mîdibatke idiọkn̄kpọ esie inọ enye.”—Rome 4:7, 8.

[Ikọ Idakisọn̄]

[Ekebe/Ndise ke page 10]

Ẹkpụhọde Ukpepn̄kpọ Ufọkabasi

Ukpepn̄kpọ Limbo isin̄wan̄ake ata ediwak mbon Catholic. Ke mme isua ndondo emi, enye omosop nsịtnsịt—tutu ẹsio enye ẹfep ke Katkisịm. Ke 2007, Ufọkabasi Catholic ama ọdọhọ ke owo ikpepke aba ukpepn̄kpọ Limbo ke n̄wed oro etịn̄de “ntak emi ẹnọde ke ukpepn̄kpọ ye ido unịm ederi ndiwụt ke ẹyenyan̄a nseknditọ oro ẹkpan̄ade ke ini owo mînịmke mmọ baptism, ẹnyụn̄ ẹnam mmọ ẹkop nsinsi inemesịt.”—Esop Ukpepn̄kpọ Ido Ukpono Ofụri Ererimbot.

Nso inam ẹkpụhọde ukpepn̄kpọ ido ukpono ntem? Ke nditịm ntịn̄, emi anam ufọkabasi ekeme ndibọhọ se Henri Tincq, eyen France emi esiwetde n̄wedmbụk n̄kpọntịbe, okokotde “akwa mbiomo emi Ufọkabasi okobiomde toto ke Ntọn̄ọ Ntọn̄ọ Eyo Ntatenyịn tutu esịm iduọk isua 1900 emi osụk ebede. Ufọkabasi ama esida n̄kari esịn mme ete ye eka ndịk ke idem man ẹnịm nditọ mmọ baptism usọp usọp nte ẹkekeme.” Edi ndikpep ke Limbo idụhe aba edemerede mme mbụme en̄wen.

Ido Eset m̀mê N̄wed Abasi? Nte mbụkeset owụtde, ẹketọn̄ọ ukpepn̄kpọ Limbo ke eneni ukpepn̄kpọ ido ukpono oro ẹkenenide ẹban̄a purgatory ke n̄kpọ nte isua 900 emi ẹkebede. Ufọkabasi Catholic ekekpep ke ukpọn̄ isikpaha ke ini owo akpade, ntem ufọkabasi ama oyom n̄kpọ etịn̄ aban̄a ebiet ukpọn̄ nditọwọn̄ emi mîkaha heaven ke ntak emi owo mîkenịmke mmọ baptism kan̄a, edi emi mîkonyụn̄ idiọkke ikem ndika hell. Ntem ke ukpepn̄kpọ Limbo ọkọtọn̄ọ.

Edi Bible ikpepke ke ukpọn̄ isikpaha ke ini owo akpade. Utu ke oro, enye etịn̄ in̄wan̄-in̄wan̄ ete ke ẹkeme ‘ndisobo’ ukpọn̄ owo oro anamde idiọkn̄kpọ ye nte ke enye “ayakpa n̄kpa.” (Utom 3:23; Ezekiel 18:4) Sia ukpọn̄ ekemede ndikpa n̄kpa, utọ ebiet nte Limbo ikemeke ndidu. Akan oro, Bible ọdọhọ ke owo isifiọkke n̄kpọ ke ini enye akpade, kpa nte esidide ke ini ẹdede idap.—Ecclesiastes 9:5, 10; John 11:11-14.

Bible ọdọhọ ke Abasi abat ke nditọ emi ete ye eka ẹdide Christian ẹsana. (1 Corinth 7:14) Ufọn utọ ikọ oro ikpodụhe edieke okpoyomde ẹnịm nseknditọ baptism mbemiso ẹnyan̄ade mmọ.

Ke akpanikọ, ukpepn̄kpọ Limbo ekedi ndimiom Abasi, sia okowụtde enye nte ibak ibak owo ufịk emi esimiade mbon oro mîduehe ufen, utu ke ndiwụt enye nte edinen edima Ete emi enye edide. (Deuteronomy 32:4; Matthew 5:45; 1 John 4:8) Imosụk ise ukpepn̄kpọ emi mîkemke ye N̄wed Abasi mi mîsin̄wan̄ake mme Christian oro ẹnyenede esịt akpanikọ!

[Ndise ke page 9]

Ndidu uwem ekekem ye Ikọ Abasi anam inyene eti itie ebuana ye Abasi ye mme owo