Ibọrọ Mbụme Inan̄ Oro Ẹban̄ade Utịt

JESUS CHRIST ama ọdọhọ ke ‘utịt eyedi’ ke ini iso. Enye eketịn̄ ntem aban̄a ini oro: “Adan̄aoro akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.”—Matthew 24:14, 21.

Ikọ oro Jesus eketịn̄de aban̄a utịt, ọkọrọ ye mme itien̄wed en̄wen ke Bible oro ẹban̄ade n̄kpọ emi, anam ẹbụp ediwak mbụme. Mbọk kụbọde Bible fo kot nte enye ọbọrọde mme mbụme oro.

1 Nso Iditre?

Bible ikpepke ke ẹdisobo ata isọn̄. Andiwet psalm ekewet ete: “[Abasi] odori isọn̄ ke itie esie, idisehekede ke nsinsi-nsinsi.” (Psalm 104:5) Bible inyụn̄ ikpepke ke ikan̄ ayata kpukpru se idude uwem ke ofụri ekondo. (Isaiah 45:18) Jesus ke idemesie ama ọdọhọ ke ndusụk owo ẹyebọhọ utịt oro. (Matthew 24:21, 22) Do, Bible ọdọhọ ke nso iditre?

Idiọk ukara owo eyetre. Abasi ama ọnọ prọfet Daniel odudu man ewet ete: “Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”—Daniel 2:44.

Ekọn̄ ye usabaden̄kpọ ẹyetre. Psalm 46:9 etịn̄ ntem aban̄a se Abasi edinamde: “Enye anam ekọn̄ etre tutu esịm ke utịt ekondo; oyobụn̄ utịgha, onyụn̄ esịbe eduat: oyonyụn̄ ọfọp mme chariot ke ikan̄.” Bible ekpep n̄ko ke Abasi “[oyosobo] mmọ oro ẹsobode isọn̄.”—Ediyarade 11:18.

Ubiatibet ye ufịk ẹyetre. Ikọ Abasi ọn̄wọn̄ọ ete: “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke  esịt. Edi ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.” *—Mme N̄ke 2:21, 22.

2 Ini Ewe ke Utịt Edidi?

Jehovah Abasi emenịm “edikem ini” nditre idiọkido nnyụn̄ ntọn̄ọ ukara Obio Ubọn̄ esie. (Mark 13:33) Edi Bible etịn̄ in̄wan̄-in̄wan̄ ke nnyịn ikemeke ndibat ata nnennen usenọfiọn̄ emi utịt edidide. Jesus ọkọdọhọ ete: “Kaban̄a usen ye hour oro baba owo kiet ifiọkke, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Edi Jesus ye mme mbet esie ẹma ẹtịn̄ nte n̄kpọ ẹditiede ke isọn̄ esisịt ini mbemiso Abasi adade utịt edi. Ke ini kpukpru mme n̄kpọ oro ẹtienede mi ẹtịbede ke ukem ini ke ofụri ererimbot, ọwọrọ ke utịt enen̄ede ikpere.

Ikpọ ukpụhọde ke ada itie ke ukara, ke n̄kann̄kụk, ye ke nte mme owo ẹnamde n̄kpọ ke udomo oro akanam mîtịbeke. Jesus ọkọbọrọ mme mbụme oro mbet esie ẹkebụpde ẹban̄a utịt ntem: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, unyekisọn̄ ẹyedu ke nsio nsio ebiet, akan̄ oyodu. Mme n̄kpọ emi ẹdi ntọn̄ọ ubiak uman.” (Mark 13:8) Apostle Paul ekewet ete: “Ndiọkeyo ẹyedu ke mme akpatre usen. Koro mme owo ẹyedi mme ama idem, mme ama okụk, ẹwụt idem, ẹtan̄ idem, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma inemesịt utu ke ndima Abasi, ẹnyene enyọn̄ enyọn̄ ido uten̄e Abasi edi idụhe uwem ekekem ye odudu esie; wọn̄ọde kpọn̄ mmọ emi.”—2 Timothy 3:1-5.

Ke ẹkwọrọ ikọ ke ata ediwak usem ke ofụri ererimbot. Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.”—Matthew 24:14.

3 Nso Iditịbe ke Utịt Ama Ekedi?

Bible ikpepke ke ẹyetan̄ kpukpru nti owo ke isọn̄ ẹka ẹkedụn̄ ke nsinsi ke heaven. Utu ke oro, Jesus ekekpep ke ata akpa n̄kpọ oro Abasi akaduakde ọnọ ubonowo oyosu. Jesus ọkọdọhọ ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5; 6:9, 10) Amaedi mbon oro ẹkpan̄ade mbemiso utịt edide, Bible ọn̄wọn̄ọ ke mmọ ẹyeset ke ini iso. (Job 14:14, 15; John 5:28, 29) Nso iditịbe ke utịt ama ekedi?

Jesus eyetie ke heaven akara nte Edidem Obio Ubọn̄ Abasi. Prọfet Daniel ekewet ete: “N̄kụt ke n̄kukụt okoneyo, ndien, sese, owo eke ebietde eyen owo [Jesus oro ẹnamde eset] asan̄a ke obubịt enyọn̄ edi, enye esịm Andisọn̄ọ usen [Jehovah Abasi], ẹnyụn̄ ẹda enye ẹdi enye ke iso. Ndien ẹnọ enye [Jesus] ubọn̄, ye ukpono, ye itie-edidem, ẹte kpukpru mme idụt ye obio ye usem ẹnam n̄kpọ ẹnọ enye: ubọn̄ esie edi nsinsi ubọn̄ eke mîdikụreke, itie-edidem esie idinyụn̄ ibiarake.”—Daniel 7:13, 14; Luke 1:31, 32; John 3:13-16.

Mme andidu ke idak Obio Ubọn̄ Abasi mi ke isọn̄ ẹyenyene mfọnmma nsọn̄idem, nsinsi ifụre, ye nsinsi uwem. Prọfet Isaiah ekewet ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.” (Isaiah 65:21-23) Apostle John ekewet ntem  aban̄a ini oro: “Sese! Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”—Ediyarade 21:3, 4.

4 Nso ke Ana Afo Anam man Ọbọhọ Utịt Emi?

Apostle Peter ama ọdọhọ ke ndusụk mbon oro ẹdude uwem ke utịt ini ẹdisasak ke Abasi eyetre mme edinam owo onyụn̄ etre idiọkido ke isọn̄. (2 Peter 3:3, 4) Kpa ye oro, Peter eteme mbon oro ẹdude uwem ke eyo nnyịn ete ẹnam se itienede emi.

Ẹkpep n̄kpọ ẹto se iketịbede ke eset. Peter ekewet ete: “[Abasi] ikonyụn̄ itreke ndinọ ererimbot eset ufen, edi anyan̄a Noah, ọkwọrọ edinen ido, ye owo itiaba en̄wen ke ini enye akadade ukwọ ofụk ererimbot mbon unana uten̄e Abasi.” (2 Peter 2:5) Peter eketịn̄ ntem aban̄a mbon oro ẹsakde: “Mmọ ẹkoi ẹfre ẹte ke enyọn̄ ama odu toto ke eset ye isọn̄ emi ẹkedade ikọ Abasi ẹnam ọwọrọ ke mmọn̄ ọsọn̄ọ ada onyụn̄ odude ke ufọt mmọn̄; ndien ererimbot emi okodude adan̄aoro ama okụt nsobo kpa ke mme usụn̄ emi ke ini  ẹkedade ukwọ ẹfụk enye. Edi ẹda ukem ikọ emi ẹmụm enyọn̄ ye isọn̄ * emi ẹdude ke emi ẹnịm ẹnọ ikan̄ ẹnyụn̄ ẹnịm ẹnọ usen ubiereikpe ye nsobo mbon unana uten̄e Abasi.”—2 Peter 3:5-7.

Da mme edumbet Abasi du uwem. Peter ekewet ete ke mbon oro ẹyomde ndibọhọ utịt ẹyenyene “edisana ido uwem [ẹnyụn̄ ẹnam] mme edinam uten̄e Abasi.” (2 Peter 3:11) N̄kọ omokụt ke Peter enen̄ede etịn̄ aban̄a “edisana ido uwem” ye “mme edinam uten̄e Abasi.” Ke ntre, idịghe owo ndidọdọhọ ke imenyene mbuọtidem m̀mê ndidu uwem nte amama ndien utịt ama ekpere enye oyom ndinam ufan ye Abasi man ọbọhọ.

Nso idi mme akpan edinam emi Abasi amade? Men se afo ọfiọkde domo ye se Bible ekpepde aban̄a n̄kpọ emi. Mme Ntiense Jehovah ẹyenem esịt ndin̄wam fi. Dọhọ mmọ ẹwụt fi nsọn̄ọ ibọrọ mmọ ke Bible fo. Ndinam ntre ekeme ndinam fi enyene mbuọtidem okûnyụn̄ ukop ndịk uban̄a ini iso, kpa ye oro ekese n̄kpọ ẹnamde nnyịn ikop ndịk idahaemi.

[Mme Ikọ Idakisọn̄]

[Se ẹwetde ke ikpọ abisi ke page 7]

Owo idisoboke isọn̄, edi ẹdisobo mbon oro ẹbiatde isọn̄