Ntak Emi Mme Owo Ẹsinamde Ndiọi N̄kpọ?

ATA ediwak owo idifan̄ake ikọ emi: Kpukpru nnyịn idi mme anana mfọnmma, ndien ke ntre imesinam ndudue inyụn̄ inam mme n̄kpọ oro ituade n̄kpọfiọk ke ukperedem. Kpa ye oro, ndi emi edi ntak ata ikpọ ye n̄kpri ndiọi n̄kpọ oro isikụtde m̀mê isinyụn̄ ikopde ke ekperede ndidi kpukpru usen ke mbụk n̄kpọntịbe?

Kpa ye oro mme owo ẹdide mme anana mfọnmma, mmọ ẹfiọk ke enyene mme n̄kpọ oro mme owo mîkpedehedei inam ye nte ke mme owo ẹkeme nditre ndinam idiọk. Ata ediwak owo ẹnen̄ede ẹfiọk n̄ko ke ukpụhọde odu ke ufọt edidue ntịn̄ se mînenke ye edikokoi ndọk edidọk, ke ufọt edidue nnọ owo unan ye edikokoi n̄wot owo. Edi ediwak ini, mme ekemmọ owo ke mbọhọ nnyịn ẹsinam mme n̄kpọ oro ẹmụmde owo n̄kpen̄eyen̄. Ntak-a? Ntak emi mme owo ẹsinamde ndiọi n̄kpọ?

 Bible anam ẹfiọk n̄kpọ emi. Enye etịn̄ nnennen akpan ntak emi ẹsinamde mme owo ẹnam se mmọ ẹfiọkde ke ẹdi ndiọi n̄kpọ. Kop se Bible etịn̄de mi.

▪ “Ufịk [anam] enyene-ibuot owo akabade edi ndisịme.”—ECCLESIASTES 7:7.

Bible ọdọhọ ke ndusụk ini se mme owo ẹsobode esinam mmọ ẹnam se mîkpanamke. Ndusụk owo ẹkam ẹkeme ndibiat ibet sia ẹkerede ke emi eyetre nsọn̄ọn̄kpọ ye ufịk. N̄wed oro Urban Terrorism, ọdọhọ ete: “Ke ata ediwak idaha, akpan ntak emi esinamde mme owo ẹnam edinam oyomonsia edi ke ntak emi mmọ ẹkopde ata iyatesịt ẹban̄a idiọk ukara, idiọk edinam owo, ye idiọk ndutịm uforo.”

▪ “Ima okụk edi orụn̄ kpukpru orụk idiọkn̄kpọ.”—1 TIMOTHY 6:10.

Ndusụk owo ẹdọhọ ke nti owo ẹsikam ẹbiat edumbet ido uwem ke ini ẹnọde mmọ ediwak okụk. Ndusụk owo emi ẹsitiede ufan ufan ẹnyụn̄ ẹfọnde ido ẹsikpụhọde ke ini n̄kpọ aban̄ade okụk, ẹkabade ẹdiọk ẹnyụn̄ ẹsọn̄ ido. Kere ban̄a ediwak ibet emi ẹbiatde ke ntak idiọkitọn̄—edidọhọ owo ọnọ okụk mbak ẹdiyarade se enye akanamde, n̄kanubọk, n̄wo, edimụm owo ke ukat m̀mê ediwot owo.

▪ “Koro mîwarake ndinọ idiọk owo ufen, oro esịn nditọ owo ẹsọn̄ esịt ke idem mmọ ẹnam idiọk.”—ECCLESIASTES 8:11.

Itien̄wed emi owụt ke mme owo ẹsikere ke owo ekeme ndinam se enye amama ke ini ukara mîsimiaha owo ufen. Ntre ke esidi ye mbon emi ẹsiwatde uwat ọsọp akaha ke ọkpọusụn̄, ẹsiyịpde udomo, ẹsiyịpde okụk ukara, m̀mê ẹsinamde se idiọkde ikan oro. Ke ini mme owo ẹbiatde ibet, owo mînyụn̄ imiaha mmọ ufen, m̀mê ke ini mmọ ẹkerede ke owo idimụmke mmimọ, mbon oro ẹsinịmde ibet ẹsisọn̄ esịt ẹnam mme n̄kpọ emi mmọ mîkpanamke. Magazine oro Arguments and Facts ọdọhọ ete: “Etie nte ke nte mme owo ẹbiatde ibet ẹnyọn̄ ifụre ifụre esinam ekemmọ mbio obio ẹnam enyene-ndịk ibak.”

▪ “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ oro oyomode, aman idiọkn̄kpọ.”—JAMES 1:14, 15.

Kpukpru owo ẹkeme ndikere idiọk ekikere. Kpukpru usen, ẹsinọ nnyịn ekikere ndinam idiọk imesinyụn̄ isobo idomo ndinam idiọk. Ẹma ẹsian mme Christian ko ke eyo Bible ẹte: “Idomo ikesịmke mbufo ibọhọke se isiwakde nditịbe nnọ owo.” (1 Corinth 10:13) Kpa ye oro, se owo anamde etiene se enye emekde—ndisọsọp nsio idiọk ekikere emi ke esịt mfep m̀mê ndika iso n̄kere enye. Itien̄wed oro ikokotde ke enyọn̄ oko, ke leta oro James akadade odudu spirit Abasi ewet odụri owo utọn̄ ete ke edieke enye ayakde idiọk udọn̄ ‘oyomo,’ ke oro ayaman idiọkn̄kpọ.

▪ “Owo eke asan̄ade ye mme enyene-ibuot  eyenyene ibuot: edi nsan̄a mbon ndisịme ọyọdiọn̄ ọdiọk.”—MME N̄KE 13:20.

Mme ufan nnyịn ẹkeme ndinam nnyịn inam eti m̀mê idiọk. Mme owo ẹsiwak ndinam se mmọ mîkpamaha ndinam ke ntak emi ẹkpebede uke m̀mê, nte ẹsiwakde ndidọhọ, ke ntak idiọk nsan̄a, ndien emi esida afanikọn̄ edi. Ke Bible, ikọ oro “mbon ndisịme” iwọrọke mbon oro mîfiọkke n̄kpọ, edi ọwọrọ mbon oro ẹsịnde ọniọn̄ ọniọn̄ item Ikọ Abasi. Edide idi eyenọwọn̄ m̀mê akwa owo, edieke nnyịn mîdaha eti ibuot—oro edi, nti edumbet Bible—imek ufan ye nsan̄a, ọwọrọ ke nnyịn ‘iyọdọdiọn̄ idiọk.’

Mme ufan̄ikọ emi ye mbon en̄wen ke Bible ẹnen̄ede ẹtịn̄ ntak emi mme owo—eyedi mme owo emi ẹkpenamde nti n̄kpọ—ẹsinamde ndiọi n̄kpọ, idem n̄kpọ oro ẹmụmde owo n̄kpen̄eyen̄. Okposụkedi emi ọfọnde ndifiọk mme n̄kpọ oro ẹsinamde mme owo ẹnam mme enyene-ndịk n̄kpọ, ndi idotenyịn odu ke n̄kpọ ọyọfọn? Ih, koro Bible itịn̄ke kpọt ntak emi mme owo ẹsinamde ndiọi n̄kpọ edi ọn̄wọn̄ọ n̄ko ke utọ ndiọi n̄kpọ oro ẹyetre. Nso idi mme un̄wọn̄ọ emi? Ndi kpukpru ndiọi n̄kpọ ke ererimbot emi ẹyetre? Ibuotikọ oro etienede ọyọbọrọ mme mbụme emi.