Leta Grenada

Usen Emi Ikakade Esụk

EDIEKE ẹkpedọhọde fi aka idụt en̄wen akanam utom isụn̄utom, afo ekpenen̄ede okop inemesịt. Idem akpada fi urua urua, afo okponyụn̄ ekere nte mme owo ye mme ebiet ẹditiede ye mme ifiọkutom oro afo edinyenede ke utom ukwọrọikọ.

Ke ini ẹkenọde mi ye n̄wan mi ika Grenada, emi enyenede ediye anyan mbeninyan̄ ye n̄kpọ nte esụk 45, nnyịn ima ikere m̀mê mme ẹsụk oro ẹditie didie. Ikebịghike nnyịn ima ifiọk ke imọn̄ ika kiet ke otu esụk oro, edi se ikanamde esịt enen̄ede enem nnyịn ndika do ekedi mme owo idịghe ndikewebe eyo nnyụn̄ mbre mbre ke esụk oro.

Iyomke usụn̄ ndito ke ufọk nnyịn ke Grenada n̄ka Esụk Grand Anse—edi isan̄ emi enem ọsọn̄! Usụn̄ etie n̄wọn̄ọde n̄wọn̄ọde, anamde ikeme ndikụt ata ndiye ebiet. Mme obot ẹye nte paradise. Ekpere ndidi kpukpru ebiet ekededi oro iwatde ibe imada ikụt mme obot, akai, mme aya, ye ndiye inyan̄ibom. Imosụk ise mme owo ẹsitode kpukpru ebiet ke ererimbot ẹdi ndise idụt emi! Kpukpru ebiet ẹyeye tutu edieke awat ubomisọn̄ mîkpemeke idem ekeme ndisịn owo ke fehesan̄. Usụn̄ ẹtie n̄wọn̄ọde n̄wọn̄ọde ẹnyụn̄ ẹfaha tutu ndusụk ini ikere m̀mê ubomisọn̄ iba ẹkeme ndibe ke ukem ini itọhọ kiet eken.

Ima isịm itie mbono oro, emi ẹkenịmde ke Trade Center, emi odude ke usụn̄ Esụk Grand Anse. Ikebịghike Mme Ntiense Jehovah emi ẹkperede ndisịm 600 ẹma ẹsop idem man ẹdụk edinem mbono emi ẹkpepde Bible. Usen oro ekenen̄ede edi akpan usen ọnọ Lesley ye Daphne, ebe ye n̄wan emi ẹdude ke iduọk isua 70. Lesley okoyom ndina baptism usen oro. Daphne eketetie ebet usen emi sia enye ama anana baptism nte kiet ke otu Mme Ntiense Jehovah ke 1958.

Mme Ntiense ẹda baptism—emi edide edibụk owo ofụri ofụri ke mmọn̄—nte ata akpan n̄kpọ. Ẹsinịm owo baptism ke enye ama ekenen̄ede ọfiọk akpanikọ Bible onyụn̄ ada emi esịn ke edinam. Enye edi an̄wan̄wa edinam ndiwụt kpukpru owo ke owo emi ama ayak idemesie ọnọ Jehovah Abasi.

Ẹkedọhọ mi nnọ utịn̄ikọ man nsian otuowo oro se N̄wed Abasi etịn̄de aban̄a baptism. Ke utịt utịn̄ikọ oro, Lesley ama adaha ada ye owo iba en̄wen emi ẹkeyomde ndina baptism n̄ko. Enye ekesịne afia siọt emi ẹkekwọhọde ediye ediye ye urụkitọn̄ onyụn̄ enen̄ede atuak inua imam. Mma mbụp nte: “Nte afo amakabade esịt ọkpọn̄ mme idiọkn̄kpọ fo onyụn̄ ayak idemfo ọnọ Jehovah ndinam uduak esie?” Nte  enye ye mbon eken ẹkebọrọde “Ih!” ke ofụri esịt ama anam ifiọk ke mmọ ẹnam n̄kpọ emi ke ofụri esịt ẹnyụn̄ ẹnen̄ede ẹten̄e Abasi.

Ama enen̄ede otụk mi ke ini n̄kọfiọkde orụk owo emi Lesley ekedide. Ke ata ediwak isua, enye ikamaha ndikpep Bible. Ekem enye ye n̄wan esie ẹma ẹka isuo en̄wen. Ke ini mmọ ẹkedude do, mmọ ẹma ẹbiere ndidi enyene ido ukpono esie aka. Lesley ọkọdọhọ Daphne ete, “Ka ufọkabasi mbufo, ami nyaka okịmmọ.”

Lesley ama awat n̄wan esie akayak ke Ufọkmbono Obio Ubọn̄ onyụn̄ ebe aka ufọkabasi Anglican ke mbọhọ oro. Ke ufọkabasi ama akasuana, Lesley ama afiak edi Ufọkmbono Obio Ubọn̄ oro ndimen n̄wan esie. Mme owo oro ẹketiede ufan ufan ẹma ẹbụn̄ọ ẹdikọm ẹnyụn̄ ẹdara enye okposụkedi emi akanam mmọ mîsoboke ye enye. Oro ama enen̄ede otụk Lesley. Owo ndomokiet ikenyeneke nneme ye enye ke ufọkabasi mmọ. Lesley ama ọdọhọ Daphne ete: “Tutu amama ndikaha aba ufọkabasi oro. Owo ndomokiet, idem etubom, ikanamke-nam nte imokụt mi. Owo ndomokiet ikọkọmke mi ukpọk ekọm. Nte n̄kodụkde kpa ntre ke n̄kọwọrọ.” Nte Lesley ọkọwọrọde do, enye ama ọwọrọ do taktak.

Ke oro ebede, Lesley ama esịn idem ekpep Ikọ Abasi. Ndien idahaemi enye ama eben̄e idem ndina baptism. Mbon oro ẹyomde ndina baptism ẹma ẹdaha esụk, ndien nnyịn ima itiene mmọ ke edem. Sia inyan̄ibom ekenen̄ede ekpere, ufọn ikodụhe ndinam itie unịm owo baptism nte ẹsinamde ke ediwak ikpọ mbono Mme Ntiense Jehovah. Okonyụn̄ edi ndibe usụn̄ n̄ka edem oko.

Esụk Grand Anse ọniọn̄ kilomita ita onyụn̄ enyene afia utatan ye edisana mmọn̄ kpukpru ini. Idem ama akpa mbon emi ẹdide ndise idụt emi ke ini mmọ ẹkekụtde nnyịn ke esụk, irenowo ẹsịne siọt ye urụkitọn̄ ndusụk iban ẹnyụn̄ ẹsịne ewụra, ndusụk ẹsịne itọn̄ọfọn̄ ye isọn̄ọfọn̄. Lesley ama okpụhọ esịne polo ye ibio ọfọn̄ukot. Kere nte eketiede Daphne ke idem ndikụt ebe esie anade baptism ke enye ama akana esiemmọ ke n̄kpọ nte isua 50 emi ẹkebede! Utịn ufọt uwemeyo ama enen̄ede ayama, ndien kpa ntre ke iso inua imam Daphne akayama. Idem mbon oro ẹkedide ndise idụt oro ẹma ẹtiene ẹkop idatesịt emi. Mmọ ẹma ẹtiene ẹkwak ubọk ke ini ẹkenịmde owo kiet kiet baptism.

Blublu ikpaenyọn̄, afia utatan, ye ndiye mbufụt mmọn̄—ke esụk emi ẹnọnọ Andibot ubọn̄. Edi esụk emi ama ọdọdiọn̄ ọnọ Abasi ubọn̄ ke ini owo ita emi ẹnade baptism obufa mi ẹwọrọde ke mmọn̄ emi. Ndikụt mmọ ama enen̄ede enem nnyịn akan nte ufiop eyo ekenemde nnyịn ke esụk oro. Ke akpanikọ, usen oro ekedi akpan usen. Edi usen oro ikakade esụk do ekedi akakan usen ọnọ Lesley ye Daphne.