Nso ke Akpanam man Akan Etikwo Etikwo Ekikere?

NDI akanam emenyene etikwo etikwo ekikere? Iwakke mbon emi mînyeneke ekikere emi. Nnyịn idu uwem ke ini nsọn̄ọn̄kpọ, ekese afai, ye ọkpọsọn̄ ufịk. Ikpaha nnyịn idem nte ata ediwak owo ẹnen̄erede ẹkop mfụhọ, esịt obiomde mmọ ikpe, ẹnyụn̄ ẹkerede ke mmimọ iwọrọke n̄kpọ.

Mme utọ n̄kpọ emi ẹkeme ndida afanikọn̄ ndi. Mmọ ẹkeme ndinam nnyịn inana uko, iyakke ikere n̄kpọ ọfọn, inyụn̄ iyakke ikop idatesịt. Bible ọdọhọ ete: “Esịt ama ọduọ fi ke usen ukụt, odudu fo akabade ekpri.” (Mme N̄ke 24:10) Man ika iso idu uwem ke idiọk ererimbot emi, oyom inyene odudu. Ntem, enen̄ede edi akpan n̄kpọ nnyịn ndikan etikwo etikwo ekikere. *

Bible ọnọ mme okopodudu n̄kpọ ndida n̄n̄wana n̄kan etikwo etikwo ekikere. Jehovah Abasi, Andibot ye Andikama uwem, iyomke etikwo etikwo ekikere akan fi ubọk. (Psalm 36:9) Ke ntre, ẹyak ineme usụn̄ ita emi Ikọ esie ekemede ndin̄wam nnyịn ikan etikwo etikwo ekikere.

Fiọk ke Abasi Ama Fi

Ndusụk owo ẹkere ke Abasi enyene ekese ndinam tutu inyeneke ifet ndikere mban̄a mme ọkpọkpọ ekikere mmimọ. Ndi afo ekere ntre? Ke akpanikọ, Bible anam nnyịn ifiọk ke Andibot nnyịn ekere aban̄a nte etiede nnyịn ke idem. Andiwet psalm ọkọdọhọ ete: “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” (Psalm 34:18) Ọdọn̄ owo esịt didie ntem ndifiọk ke Ata Ọkpọsọn̄ Andikara ekpere nnyịn ke ini idude ke nnanenyịn!

Abasi inanake udọn̄ ke idem nnyịn inyụn̄ idaha nsannsan. Bible ọdọhọ ke “Abasi edi ima.” (1 John 4:8) Enye ama mme owo onyụn̄ enyene udọn̄ ke idem mbon oro ẹkụtde ukụt. Ke uwụtn̄kpọ, ke ini nditọ Israel ẹkedide ifụn ke Egypt ke n̄kpọ nte isua 3,500 emi ẹkebede, enye ọkọdọhọ ete: ‘Mmetịm n̄kụt ukụt ikọt mi emi ẹdude ke Egypt, mmonyụn̄ n̄kop eseme mmọ kaban̄a mme anditụk mmọ; koro mfiọkde ubiak mmọ; mmonyụn̄ nsụhọde ndisio mmọ.’—Exodus 3:7, 8.

Abasi enen̄ede ọfiọk nte n̄kpọ esitụkde nnyịn. Mmọn̄ọ, n̄kọ “edi enye akanam nnyịn.” (Psalm 100:3) Ke ntem, idem ke ini ikerede ke mme ekemmọ owo ifiọkke se ifịnade nnyịn, imekeme ndinen̄ede nnịm ke Abasi ọfiọk. Ikọ Abasi ọdọhọ ete: “[Abasi isehe] nte owo esede; koro owo esede enyịn, edi Jehovah ese esịt.” (1 Samuel 16:7) Idem mme n̄kpọ oro ikerede ke ata ọwọn̄ esịt nnyịn idịbeke Abasi.

Edi akpanikọ ke Jehovah ọfiọk n̄ko mme ndudue ye unana mfọnmma nnyịn. Edi imekeme ndikop inemesịt ke edima Andibot nnyịn esidahado ọnọ owo. David emi ẹkenọde odudu spirit etiene ewet Bible ọkọdọhọ ete: “Kpa nte ete atuade nditọ esie mbọm, kpa ntre ke Jehovah atua mmọ eke ẹbakde enye mbọm. Koro enye ọfiọkde nte iborode; emeti ete ke nnyịn idi ntan.” (Psalm 103:13, 14) Okposụkedi nnyịn ikemede ndida idem nnyịn nte idiọkowo, Abasi isehe nnyịn  ntre. Enye ese se idide eti onyụn̄ ọkpọn̄ idiọk, nnyịn ima ikam ikabarede esịt ikpọn̄ mme idiọkn̄kpọ nnyịn.—Psalm 139:1-3, 23, 24.

Ke ntem, edieke ikerede ke nnyịn iwọrọke n̄kpọ, oyom in̄wana ikan utọ ekikere emi. Ana iti nte Abasi esede nnyịn!—1 John 3:20.

Nen̄ede Nam Ufan ye Abasi

Nso ufọn ke idinyene edieke isede idem nnyịn nte Abasi esede nnyịn? Oro ayanam emem nnyịn utom ndinam n̄kpọ en̄wen man ikan mme etikwo etikwo ekikere—oro edi, ndinen̄ede nnam ufan ye Abasi. Ndi imenen̄ede ikeme ndinam oro?

Sia Jehovah Abasi edide edima Ete nnyịn, enen̄ede ọdọn̄ enye ndin̄wam nnyịn inen̄ede inam ufan ye enye. Bible eteme nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Kop akpanikọ emi akpade owo idem mi: Okposụkedi emi nnyịn idide mme anana mfọnmma isinyụn̄ inamde idiọk, imekeme ndinen̄ede nnam ufan ye Andikara ekondo.

Abasi emetịn̄ owo emi enye edide ke Bible man otodo nnyịn ikpenen̄ede ifiọk enye. Edieke isikotde Bible kpukpru ini, iyọfiọk ndiye edu Abasi. * Ke ini itiede ikere se ifiọkde oro, iyọdọdiọn̄ isan̄a ikpere Jehovah. Iyenen̄ede ifiọk owo emi enye enen̄erede edi—kpa edima Ete emi esituade owo mbọm.

Nditie n̄kere se ikotde ke Bible anam mme ufọn en̄wen ọnọ nnyịn. Iyenen̄ede isan̄a ikpere Ete nnyịn eke heaven edieke iyakde mme ekikere esie ẹsụhọde ẹdụk nnyịn esịt, inyụn̄ iyak mmọ ẹnen̄ede nnyịn, ẹdọn̄ nnyịn esịt, ẹnyụn̄ ẹda nnyịn usụn̄. Enen̄ede oyom nnyịn inam ntre ke ini in̄wanade ye mme ekikere oro ẹtịmerede nnyịn esịt. Andiwet psalm ọkọdọhọ ntem: “Ke uwak ekikere emi odude mi ke esịt ndọn̄esịt fo enem mi esịt.” (Psalm 94:19) Ikọ Abasi ekeme ndinen̄ede ndọn̄ owo esịt. Edieke nnyịn isụhọrede idem inyịme etop akpanikọ esie, imekeme ndikụt ke ndọn̄esịt ye emem emi Abasi ikpọn̄ ekemede ndinọ ẹyeda itie etikwo etikwo ekikere nnyịn. Ntem ke Jehovah esidọn̄ nnyịn esịt nte emi edima ete anamde esịt osụhọde eyen emi adade unan m̀mê ayatde esịt.

N̄kpọ en̄wen oro ekemede ndinam nnyịn idi ufan Abasi edi ndinyene nneme ye enye kpukpru ini. Bible ọn̄wọn̄ọ ọnọ nnyịn ete ke “se ededi oro nnyịn iben̄ede ekekem ye uduak [Abasi], enye ọbiọn̄ utọn̄ ke eben̄e nnyịn.” (1 John 5:14) Imekeme ndibọn̄ akam nnọ Abasi nyom un̄wam ke se ededi ndịk ye editịmede esịt oro ikemede ndikop. Iyenyene emem edieke in̄wan̄ade esịt nnyịn inọ Abasi. Apostle Paul ekewet ete: “Ke kpukpru n̄kpọ ẹda akam ye n̄kpeubọk ọkọrọ ye ekọm ẹsian  Abasi eben̄e mbufo; ndien emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.”—Philippi 4:6, 7.

Nte afo akade iso kpukpru ini ndikot Bible, nditie n̄kere se okotde, ndinyụn̄ mbọn̄ akam ọkpọkpọ, eyịghe idụhe ke afo oyokụt ke imọ imenen̄ede inam ufan ye Ete fo eke heaven. Itie ufan oro edi okopodudu n̄kpọ ndida n̄kan mme etikwo etikwo ekikere. Edi nso n̄kpọ en̄wen ekeme ndin̄wam nnyịn?

Wụk Ekikere ke Ata Idotenyịn Kaban̄a Ini Iso

Idem ke ini idude ke ata idiọk idaha, nnyịn imekeme ndiwụk ekikere ke nti n̄kpọ. Didie? Abasi ọnọ nnyịn ata idotenyịn kaban̄a ini iso. Apostle Peter eketịn̄ utịbe utịbe idotenyịn emi ibio ibio ntem: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ [Abasi], ndien edi mi ke edinen ido edidụn̄.” (2 Peter 3:13) Nso ke oro ọwọrọ?

Ikọ oro “mbufa enyọn̄” enen̄ede aban̄a ukara—oro edi, Obio Ubọn̄ Abasi eke heaven emi Jesus Christ edide Andikara. “Obufa isọn̄” aban̄a obufa n̄kaowo mi ke isọn̄ emi Abasi amade. Ke ini “mbufa enyọn̄” ẹdikarade, obufa n̄kaowo ke isọn̄ ẹyebọhọ kpukpru n̄kpọ oro ẹnamde mme owo ẹnyene etikwo etikwo ekikere. Bible ọn̄wọn̄ọ ntem ọnọ nnyịn aban̄a nti owo emi ẹdidude ini oro ete ke Abasi “ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:4.

Ke akpanikọ, afo ọmọfiọk ke oro edi ata edinem ikọ emi esịnde udọn̄ ọnọ owo. Emi esịn Bible ọdọhọ ke se Abasi edinamde inọ ata mme Christian ke ini iso edidi “inem inem idotenyịn.” (Titus 2:13) Edieke iwụkde ekikere ke se Abasi ọn̄wọn̄ọde ọnọ ubonowo ke ini iso—ye ke mme ntak emi mme un̄wọn̄ọ oro ẹdide akpanikọ ye se ẹkpeberide edem— nnyịn iyakan mme etikwo etikwo ekikere.—Philippi 4:8.

Bible emen idotenyịn edinyan̄a nnyịn odomo ye ndụn. (1 Thessalonica 5:8) Owoekọn̄ ikedehedei ika ekọn̄ ke eset ke mîyarake ndụn. Enye ama ọfiọk ke ndụn idiyakke n̄kpọ oro ọtọde imọ enen̄ede abiak imọ, inyụn̄ iyakke enyịm ikan̄ anam imọ n̄kpọ. Idotenyịn ekpeme nnyịn ekikere ukem nte ndụn ekpemede ibuot. Ndiwụk ekikere ke mme n̄kpọ oro ẹnọde nnyịn idotenyịn ekeme ndinam nnyịn itre ndinyene etikwo etikwo ekikere oro mîyakke owo enyene idotenyịn, oro anamde owo ndịk.

Ntre, ẹkeme ndikan etikwo etikwo ekikere. Afo n̄ko emekeme ndikan! Tie kere nte Abasi esede fi, san̄a kpere enye, nyụn̄ wụk ekikere ke idotenyịn ini iso. Do afo emekeme ndinen̄ede nnịm ke oyokụt usen emi mme etikwo etikwo ekikere ẹditrede taktak!—Psalm 37:29.

[Mme Ikọ Idakisọn̄]

[Se ẹwetde ke ikpọ abisi ke page 19]

‘Mmọfiọk ubiak mmọ.’​—EXODUS 3:7, 8

[Se ẹwetde ke ikpọ abisi ke page 20]

“Ke uwak ekikere emi odude mi ke esịt ndọn̄esịt fo enem mi esịt.”​—PSALM 94:19

[Se ẹwetde ke ikpọ abisi ke page 21]

“Emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo.”​—PHILIPPI 4:7

[Ekebe/Ndise ke page 20, 21]

Mme Itie N̄wed Abasi Emi Ẹnamde Ifiọk ke Jehovah Abasi Ekere Aban̄a

“Jehovah, Abasi mbọm, ye mfọn, ye anyan ime, awak ima ye akpanikọ.”—EXODUS 34:6.

“Enyịn Jehovah [ẹsan̄a] ke ofụri ererimbot, ete isọn̄ọ imụm mmọ eke ofụri esịt mmọ odude ye enye ikama.”—2 CHRONICLES 16:9.

“Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.”—PSALM 34:18.

“Afo, [Jehovah], ọmọfọn, omonyụn̄ ama ndidahado.” —PSALM 86:5.

“Jehovah ọfọfọn ye kpukpru: esịt mbọm esie onyụn̄ ofụk kpukpru se enye anamde.”—PSALM 145:9.

“Ami Jehovah Abasi fo [mmụm] fi ubọk nnasia, emi ndọhọde fi, nte, Kûfehe; ami n̄n̄wam fi.”—ISAIAH 41:13.

“Itoro enyene . . . Ete mbọm ye Abasi kpukpru ndọn̄esịt.”—2 CORINTH 1:3.

“Nnyịn idida emi ifiọk ite nnyịn itọn̄ọ ito akpanikọ, iyonyụn̄ isọn̄ọ esịt nnyịn ke iso esie kaban̄a se ededi oro esịt nnyịn obiomde nnyịn ikpe, koro Abasi omokpon akan esịt nnyịn onyụn̄ ọfiọk kpukpru n̄kpọ.”—1 JOHN 3:19, 20.

[Ekebe/Mme Ndise ke page 22]

Mmọ ke Ẹn̄wana Ẹkan Etikwo Etikwo Ekikere

“Ete mi edi owo mmịn, ndien enye ama afịna mi etieti. Enen̄ede ebịghi n̄kọtọn̄ọ ndikere ke n̄wọrọke n̄kpọ ndomokiet. Edi ke ini n̄kenyịmede ndikpep Bible ye kiet ke otu Mme Ntiense Jehovah, mma n̄kpep ke ẹn̄wọn̄ọ ke mme owo ẹyedu nsinsi uwem ke isọn̄. Idotenyịn emi ama anam mi nnen̄ede n̄kop idatesịt. Mma ntọn̄ọ ndikot Bible kpukpru ini. Kpukpru ini nsisan̄a ye Bible. Ke ini etiede nte etikwo etikwo ekikere ẹmọn̄ ẹkan mi ubọk, mmesimen Bible n̄kot mme itien̄wed oro ẹnọde ndọn̄esịt. Ndikot mban̄a nti edu Abasi anam nnen̄ede mfiọk ke ndi n̄kpọuto ke enyịn Abasi.” —Kátia, n̄wan emi edide isua 33. *

“Mma nsinen̄ede n̄n̄wọn̄ mmịn, ikọn̄ekpo, cocaine, nsinyụn̄ n̄n̄wụne n̄kpọ udian n̄wed. Mma n̄kabade eben̄e eben̄e ke mma n̄kekpere nditaba kpukpru inyene mi. Edi ke mma n̄kenyịme ndikpep Bible ye Mme Ntiense Jehovah, mma n̄kpụhọde uwem mi ofụri ofụri. Mma ntọn̄ọ ndinen̄ede n̄kpere Abasi. Okposụkedi emi nsụk n̄n̄wanade ndikan ekikere edibiom idem ikpe ye edikere ke n̄wọrọke n̄kpọ, mmekpep ndiberi edem ke Abasi mbọm ye ima-mfọnido. Mmenịm ke Abasi ayaka iso ọnọ mi ukeme ndikan etikwo etikwo ekikere. Ndifiọk akpanikọ Bible edi akakan n̄kpọ ke uwem mi.” —Renato, eren emi edide isua 37.

“Toto ke ini emi n̄kedide eyenọwọn̄ mma nsimen idemmi ndomo ye akpaneka mi. Kpukpru ini mma nsikere ke enye ọfọn akan mi. Tutu emi nsisụk n̄kekere ke n̄wọrọke n̄kpọ, ke inyeneke se n̄kemede ndinam ọfọn. Edi mmebiere ndikan utọ ekikere emi. Mmesibọn̄ akam kpukpru ini nnọ Jehovah, enye omonyụn̄ an̄wam mi ntre ndikere ke inyeneke se n̄kemede ndinam. Esịt enem mi etieti ndifiọk ke Abasi enen̄ede ama onyụn̄ ekere aban̄a mi!”—Roberta, n̄wan emi edide isua 45.

[Ikọ Idakisọn̄]