Bible Okpụhọde Mme Owo

NSO ikanam inọ ye owoekọn̄ emi akan̄wanade ye ukara okpụhọde? Ntak emi ata an̄wana en̄wan okokpụhọrede utịtmbuba esie? Didie ke ete kiet ọkọbọ utịp edinyene mbuọtidem nte ke eyen esie oyokpụhọde? Kot mme mbụk emi man okụt ibọrọ.

“Esịt enem mi ke emi, kpa ye oro n̄kesinamde ndiọi n̄kpọ.”—GARRY P. AMBROCIO

ISUA EMANA: 47

IDỤT EMI NTODE: PHILIPPINES

UTỌ OWO EMI N̄KEDIDE: OWOEKỌN̄ EMI AKAN̄WANADE YE UKARA

NTE N̄KESIDUDE UWEM: N̄kokpon ke ekpri obio Vintar. Ebiet oro nnyịn ikodụn̄de ama enyene ikpọ obot oro ẹsehede, ndiye akpa, ye mbịtmbịt ofụm. Kpa ye oro obio emi eketiede emem emem, uwem ikememke. Mme owo ẹma ẹsiyịp ufene nnyịn ẹnyụn̄ ẹbụn̄ ufọk nnyịn ẹdụk.

Ke ini n̄kedide uyen, mma nsin̄wọn̄ n̄kpọ etieti ye mme ufan mi, n̄n̄wọn̄ sika, nnyụn̄ nyịp okụk nda nnam mme n̄kpọ emi. Mma nyịp n̄kpọmbana ekaeka mi. Mbonekọn̄ ukara ẹkekere ke ami nsịne ke otu mbon ntịme oro ẹkekotde New People’s Army (NPA) ẹsinyụn̄ ẹtịm mi n̄kpa n̄kpa. Ke ntak emi mma mbiere ndidụk n̄ka oro. Mma ndụn̄ ke obot ye mbonekọn̄ NPA isua ition. Uwem ikefereke. Nnyịn ikesiduọkke odudu, ikesifehe mbak mbonekọn̄ ukara. Ke akpatre, n̄kpọ emi ama akak mi, ntre mma mmen idem nsọk andikara Ilocos Norte. Enye ikọdiọkke mi ukama, ama onyụn̄ an̄wam mi nnyene eti utom. Kpa ye oro, n̄kọkpọn̄ke idiọk uwem mi, n̄kesisụk n̄kaka inọ ke ufọk owo nnyụn̄ nsịn mme owo ndịk ke idem.

NTE BIBLE OKOKPỤHỌREDE UWEM MI: Mma kiet emi ekerede Loida ke itieutom nnyịn ekedi kiet ke otu Mme Ntiense Jehovah. Enye akanam mi nsobo Jovencio, ndien Jovencio ama ọtọn̄ọ ndikpep mi Bible. Edi akani usụn̄ uwem mi ama odụk mi iyịp. Mma nsin̄wọn̄ sika mbemiso Jovencio edisịm man ikpep Bible, ndien ke n̄kosụk nnanam se ibet akpande. Ke akpatre, bodisi ama omụm mi mbiatde ibet, ẹnyụn̄ ẹsịn mi ke ufọk-n̄kpọkọbi ke ọfiọn̄ 11. Mma mbọn̄ akam ini oro nnọ Jehovah n̄kpe enye ubọk nte an̄wam mi. Mma mben̄e enye efen ọnọ mi onyụn̄ ọnọ mi edisana spirit man an̄wam onyụn̄ ọsọn̄ọ mi idem.

Nte ini akakade, kiet ke otu Mme Ntiense Jehovah ama edise mi ke ufọk-n̄kpọkọbi onyụn̄ ada Bible ọsọk mi. Mma n̄kot Bible oro nnyụn̄ n̄kpep nte ke Jehovah edi Abasi ima, ọfọn ido, onyụn̄ efen mme ndudue. Mma n̄kụt nte ke Jehovah esitua mi mbọm onyụn̄ ọnọ mi ifet edikpep usụn̄ esie. Mma mben̄e enye ọnọ mi ukeme ndikan ndiọi edinam mi. Se n̄kokotde ke Mme N̄ke 27:11 ama enen̄ede otụk mi. N̄kada ufan̄ikọ oro nte ke ami ke Jehovah okot etịn̄ ikọ oro ọnọ. Enye ọdọhọ ke itie oro ete: “Eyen  mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”

Ke ẹma ẹkesio mi ke ufọk-n̄kpọkọbi, mma mfiak ntọn̄ọ ndikpep Bible ye Mme Ntiense, mma ntọn̄ọ nditiene mmọ ndụk mme mbono esop, nnyụn̄ ntọn̄ọ ndida mme edumbet Bible nsịn ke edinam ke uwem mi. Nte ini akakade, Jehovah ama an̄wam mi ntre ndiọi edu mi. Mma nyak idem mi nnọ Jehovah Abasi.

UFỌN ORO MBỌDE: Kpa ye oro n̄kesinamde idiọk n̄kpọ, mmokop inemesịt idahaemi. Okposụkedi oro n̄kodụkde ufụn nnọ ndiọi edinam, ndidi obufa owo idahaemi. (Colossae 3:9, 10) Mfịn, edi n̄kpọ ukpono ọnọ mi ndibuana ye ikọt Jehovah emi ẹsanade, nnyụn̄ n̄n̄wam mbon en̄wen ẹkpep ẹban̄a Ata Ọkpọsọn̄ Abasi nnyịn, Jehovah.

“N̄koyom ndikan̄wana nnọ Brazil.”​—JULIANA APARECIDA SANTANA ESCUDEIRO

ISUA EMANA: 31

IDỤT EMI NTODE: BRAZIL

UTỌ OWO EMI N̄KEDIDE: ATA AN̄WANA EN̄WAN

NTE N̄KESIDUDE UWEM: N̄kokpon ke Londrina. Kpa ye oro ata ediwak owo ke obio oro ẹkedide ubuene, obio oro ama eye onyụn̄ odu ke emem. Ke ini n̄kedide isua duop, akpaneka mi ama ọdọhọ mi ntiene imọ n̄kpep en̄wan emi ẹkotde tae kwon do, emi ọwọrọde “nte ẹdade ubọk ye ukot ẹnam n̄kpọ.” Ete mi ikamaha obufa ukpep emi, edi ikebịghike enye ama osion̄o idem ọkpọn̄.

Mma nnen̄ede nsịn idem nnyụn̄ n̄kan ke ata ediwak mbuba tae kwon do ke obio Parana. Ekem mma n̄kan ke mbuba ofụri idụt, ndien ke 1993 ẹma ẹtọt ẹte ke ami ndiọn̄ọ ndin̄wana tae kwon do n̄kan ke ofụri Brazil. Mma nyom nditiene n̄ka mbuba ofụri ererimbot. Edi ubon mi ikenyeneke okụk ndikpe usụn̄ nnọ mi n̄ka mbuba emi ke esenidụt.

N̄kekere nte ke ẹyesịn tae kwon do ke mbuba Olympic, ndien ẹma ẹsịn nte ini akade. N̄koyom ndika Mbuba Olympic nnọ Brazil, ntre mma nnen̄ede mbọ ukpep, ẹma ẹnyụn̄ ẹn̄wam mi n̄ka mbuba emi ke France, Vietnam, South Korea, Japan, ye Mbuba eke South America. N̄kpọ en̄wen oro n̄koyomde ndinam ekedi nditiene n̄ka Pan American Games, ndien mma nnam ọfọn tutu ẹmek mi ndidu ke otu owo ita oro ẹdikade mbuba oro ke Santo Domingo, Dominican Republic, ke 2003.

NTE BIBLE OKOKPỤHỌREDE UWEM MI: Ami ye ufan mi erenowo ima isobo Mme Ntiense Jehovah ke 2001 ndien mmọ ẹma ẹtọn̄ọ ndikpep nnyịn Bible. N̄kenen̄ekede nda ukpepn̄kpọ emi ke akpan n̄kpọ ke ntọn̄ọ. Kpukpru ini idem ama esimem mi tutu idap esibọhọ mi ke ini ukpepn̄kpọ oro. Kpa ye oro, se n̄kosụk n̄kpepde ama osụhọde odụk mi esịt—ndien ẹma ẹkụt emi ke ọwọrọetop mbuba en̄wen oro n̄koyomde ndika.

Sia ẹkemekde mi nditiene n̄ka Pan American Games, mme andise mban̄a tae kwon do ẹma ẹnam mi ntiene mbre mbuba man nda ntịm idem. Ke ama ekekem ini  mi nditiene n̄n̄wana, mma nda ntre ke mbri en̄wan oro nnyịghekede idem—n̄kpọ ndomokiet ikọdọn̄ke mi ndinam. Kpa idaha oro ke n̄keti ke ikpanaha Christian an̄wana ye mbon efen—ọkpọkọm ke mbre mbuba! Mma nti ewụhọ Bible oro ọdọhọde “ma mbọhọidụn̄ fo nte idemfo.” (Matthew 19:19) Mma n̄wọn̄ọde iso nsan̄a ndaha ke itie oro. Mme owo ẹma ẹse mi ntem kpan̄-n̄, inịmke ke mmadaha.

Ke ini n̄kesịmde ufọk, mma nsụhọde ntetie n̄kere se ndidade uwem mi nnam. Mma mmen ediye uduot ekpri n̄wed emi etịn̄de se Abasi oyomde oto nnyịn, emi Mme Ntiense Jehovah ẹsiode ntọn̄ọ ndikot. Mma n̄kụt Psalm 11:5 do, emi ẹtịn̄de ẹban̄a Jehovah ẹte: “Ama edi . . . owo eke amade afai, ukpọn̄ esie asua mmọ.” Mme ikọ andiwet psalm oro ẹma ẹtụk mi ọkpọ, ndien mma mbiere nditre tae kwon do.

Mme andise mban̄a tae kwon do ikenemke esịt. Mmọ ẹma ẹn̄wana ndikpụhọde mi ekikere ẹnyụn̄ ẹdọhọ ke ami n̄kodot n̄kan ke ofụri idụt oro ndien ke ibịghike mmọn̄ ntiene n̄ka en̄wan emi ke Mbuba Olympic. Edi mma nnanam ubiere mi mma.

Ami ye ufan mi erenowo ima isịn ndọ nnyịn ke n̄wed. Enye ama ọtọtọn̄ọ nditiene Mme Ntiense n̄kwọrọ ikọ ke ufọk ke ufọk. Ke ini enye ọnyọn̄de edi, esịt esinen̄ede enem enye nditịn̄ mban̄a nneme oro enye ekenyenede ye mme owo. Mma ndiọn̄ọ nte ke edieke nyomde ndikop inemesịt ntre, ke ana n̄kpụhọde uwem mi. Mma nsịn n̄wed n̄wọrọ n̄kpọn̄ ufọkabasi emi n̄kesikade nnyụn̄ nna baptism nte Ntiense.

UFỌN ORO MBỌDE: Ami ye ebe mi imenen̄ede ikop inemesịt inyụn̄ idiana kiet koro idade mme edumbet Bible isịn ke edinam ke ndọ nnyịn. Esinem mi ndin̄wam enye nte enye osụk esede aban̄a esop oro idude. Ekeme ndidi n̄kpekesịn idem man mbọ n̄kpọmbana gold nnyụn̄ n̄wọrọ etop. Edi mmokụt ke idụhe n̄kpọ ndomokiet oro idiọk ererimbot emi ekemede ndinọ, emi ẹkemede ndimen ndomo ye ifet edinam n̄kpọ nnọ Jehovah Abasi.

“Akananam ete mi ikpaha mba ndin̄wam mi.”​—INGO ZIMMERMANN

ISUA EMANA: 44

IDỤT EMI NTODE: GERMANY

UTỌ OWO EMI N̄KEDIDE: ANDIKPEME UFỌKUNEK

NTE N̄KESIDUDE UWEM: N̄kamana ke ubon emi mme owo ẹkekade nsio nsio ufọkabasi ke obio Gelsenkirchen emi ẹsidọkde ukan̄. Ete mi ekedi kiet ke otu Mme Ntiense Jehovah. Edi eka mi ikenyịmeke ete mi ekpep mi, akpaneka mi, ye adiaha ye udun̄wan eka mi ukpepn̄kpọ ido ukpono mmọ. Ete mi ekesinam utom uwat trọk ke hour duop m̀mê akande oro ke usen. Ediwak ini enye esitọn̄ọ utom n̄kanika iba m̀mê ita n̄kpọusen. Kpa ye oro, enye ama esin̄wam nnyịn idiọn̄ọ Abasi. Edi ami n̄kabatke emi ke n̄kpọ.

Ke ini n̄kedide isua 15, mme edinam ido ukpono oro enye akanamde mi ntiene ndụk ẹma ẹdorode mi, ndien mma nsọn̄ ibuot. Ke ndide isua 16, mma ntọn̄ọ utop ita. Ke isua iba oro ẹketienede, n̄kodu ata idiọk uwem tutu uwem efek ete mi. Mma n̄wọrọ ke ufọk ke ndide isua 18.

Mma nnen̄ede mma mbre mbuba nnyụn̄ n̄ka ukpep utịm ikotiokiet ke urua—n̄kekpep  utop ita ekem n̄kpep udịbede ukwak. Ke mme utịturua, ami ye mme ufan mi ima isiwak ndika ufọkunek. Ini kiet, mma ntọhọ nnyụn̄ n̄n̄wana ye owo unek emi eketiede ubi ubi, nnyụn̄ mmia unamikọt nsio ntop nduọk ko! Ete enyene ufọkunek oro ama okụt emi onyụn̄ ọdọhọ ke imọn̄ inọ mi utom nte andikpeme itie oro. Okụkọfiọn̄ ama ọfọn, ndien mma nnyịme ndinam utom oro.

Kpukpru utịturua mma nsida ke usụn̄otop ufọkunek oro mbiere owo emi edidụkde ye owo emi mîdidụkke. N̄kpọ nte owo 1,000 ẹsidi ufọkunek oro, ndien emi esinam mi ndu ke utom kpukpru ini. Ẹma ẹsin̄wana ẹn̄wan kpukpru ini. Ẹma ẹsida ikan̄ ẹnyụn̄ ẹbom ekpeme ẹdi en̄wan ye ami. Ndusụk mbon emi mmen̄kesiyakke ẹdụk ye mbon emi n̄kesibịnde nsio ẹma ẹsida ke an̄wa ẹbet mi man ẹsio mi usiene. N̄kedi isua 20, ndien n̄kekere ke owo ndomokiet ikemeke n̄kpọ ye ami. Ke akpanikọ, mma nsinam n̄kpọ mbe ubọk—mbak ibak, ntan̄ idem nnyene udọn̄ ikpọ n̄kpọ, nnyụn̄ nsọn̄ ibuot.

NTE BIBLE OKOKPỤHỌREDE UWEM MI: Edi akananam ete mi ikefreke enyịn iban̄a mi. Enye ama anam ndutịm man ẹsida Enyọn̄-Ukpeme ye Awake! * ẹsọk mi ke ebiet emi n̄kodụn̄de. Mmọ ẹma ẹkụbọ do ke ubet mi—edi n̄kotke ndomokiet. Ekem usen kiet, mma ndọhọ yak n̄kụbọde ndusụk mmọ ise nse. Ibuotikọ oro n̄kokotde mban̄a nte ke ndutịm ukara, uforo, ye ido ukpono emi ẹdude ke emi ẹmọn̄ ẹbe ẹfep ama anam mi n̄kot eyeneka mi an̄wan. Enye ye ebe esie ẹkedi Mme Ntiense Jehovah. Mmọ ẹma ẹdọhọ yak idikpep mi Bible, ndien mma nnyịme.

Se ẹwetde ke Galatia 6:7 ama anam mi n̄kpụhọde uwem mi. Se n̄kesisobode ama anam mfiọk ke se ededi emi nnamde, ntịn̄de, m̀mê mbierede mfịn oyotụk mi ke ini iso. Se ẹtịn̄de ke Isaiah 1:18 ama onyụn̄ enem mi: “Jehovah ọdọhọ ete, ‘Mbufo ẹdi ndien, nnyịn ikpe ikọ: mme idiọk ido mbufo ẹkpetie nte iduot, ẹyefia nte snow.’” Itie N̄wed Abasi emi ama an̄wam mi toto ke ini emi n̄kọtọn̄ọde ndikpep Bible, iyakke n̄kere ke ufọn mi idụhe m̀mê ke ndikemeke ndifiak ntiene Jehovah.

Ke n̄kpọ nte ọfiọn̄ itiokiet mma nnen̄ede nnam ukpụhọde ke uwem mi, edi emi ikememke utom. Akana n̄kpọn̄ idiọk itie emi n̄kodude ye ediwak ndiọi nsan̄a emi n̄kenyenede. Ntem mma ntọn̄ọ ndidọhọ mmọ ke ami ke n̄kpep Bible nnyụn̄ mbuana se n̄kpepde ye mmọ. Mmọ ẹma ẹtọn̄ọ ndidian̄ade nsan̄a ye ami ẹnyụn̄ ẹkot mi oku. Eyeneka mi an̄wan oro ama an̄wam mi nnyene utom ke eti itie.

Mma ntọn̄ọ n̄ko ndidụk mme mbono esop ke Ufọkmbono Obio Ubọn̄ emi eyeneka mi ye ebe esie ẹsidụkde, kpa ye oro okoyomde usụn̄ ke kilomita 30. Ufọkmbono Obio Ubọn̄ kiet ama odu ekpere ufọk nnyịn, edi ndịk ama esinam mi ndika n̄kosobo mbon emi ẹkediọn̄ọde mi toto ke uyen. Ndịk edisan̄a ke ufọk ke ufọk n̄kwọrọ ikọ ke ebiet emi n̄kodụn̄de ama anam mi n̄ko. Nso iditịbe edieke n̄kade n̄kosobo owo emi n̄kebịnde ke ufọkunek ndondo emi, m̀mê owo emi n̄kọnọde n̄kpọsọn̄ ibọk? Edi mma n̄kpep n̄kpọ nto utopita—ukpep emi ọsọn̄de akan ke ẹsinen̄ede ẹyom. Ntem mma ntọn̄ọ ndikwọrọ ikọ adan̄a nte n̄kekeme ndondo oro n̄kodotde ndisikwọrọ ikọ.

Mfịna efen oro n̄kenyenede ekedi mfịna edikot n̄wed m̀mê edikpep n̄kpọ. Edi mma mfiọk nte ke edieke nyomde ndinyene ata mbuọtidem, akana nnọ idemmi ntụnọ nnyụn̄ nnen̄ede n̄kpep akpanikọ Bible. Mma ndikụt nte ke ukem nte edidịbede ukwak, ana owo esịn ukeme edieke enye oyomde ndinyene odudu.

UFỌN ORO MBỌDE: Ke nsụk ndodu uwem! Nnyene ndisụk n̄n̄wana ye mmeme mi mbak mmọ ẹdikan mi ubọk. Edi idahaemi mmokop inem uwem ye n̄wan mi, emi enyenede ndiye edu Christian. Mmenyene ata nti ufan oro n̄kemede ndiberi edem ke otu Mme Ntiense Jehovah. Ete mi akakpa isua ition ko ke edem, edi mbemiso enye ebede efep, esịt ama enem enye ndikụt eyen esie afiakde edidụk esop Abasi.

[Ikọ Idakisọn̄]