Dọn̄ Mbon Emi Owo Mmọ Akpade Esịt, nte Jesus Akanamde

LAZARUS emi okodụn̄de ke Bethany ama ọdọn̄ọ n̄kpa n̄kpa. Nditọeka esie, Mary ye Martha ẹma ẹdọn̄ mme owo ẹkesian Jesus, n̄kpet n̄kpet ufan mmọ. Edi udọn̄ọ oro ama ada Lazarus ibuot. Ke ẹma ẹkebụk enye, mme ufan ye mbọhọidụn̄ ẹma ẹdi ndise Martha ye Mary “ndisọn̄ọ mmọ esịt.” (John 11:19) Ke akpatre, Jesus ama edisịm Bethany onyụn̄ aka ndise ndima ufan esie. Ima ikere iban̄a se enye eketịn̄de onyụn̄ anamde, imekeme ndikpep nte ikpọdọn̄de mbon oro owo mmọ akpade esịt.

Afo Ndidu Do Owụt ke Emekere Aban̄a

Jesus akasan̄a n̄kpọ nte usen iba aka Bethany. Enye ama ebe Akpa Jordan onyụn̄ ọdọk n̄kokon̄ n̄wọn̄ọde n̄wọn̄ọde usụn̄ Jericho. Martha ama ọsọsọp aka ndikọm Jesus ke ini enye ekperede Bethany. Ekem ke ini Mary okopde ke Jesus edisịm, enye n̄ko ọsọsọp aka ndikụt enye. (John 10:40-42; 11:6, 17-20, 28, 29) Ke akpanikọ Jesus ndidu do ama ọdọn̄ nditọeka iba oro ẹkefụhọde do esịt.

 Mfịn, nnyịn ndika n̄kese mbon oro ẹfụhọde ekeme ndidọn̄ mmọ esịt ukem ntre. Scott ye Lydia emi Theo eyen mmọ isua itiokiet akakpade ke mbabuat n̄kpọntịbe ẹti ẹte: “Ima iyom mbonubon ye mme ufan ẹsọn̄ọ nnyịn idem. Mmọ ẹma ẹbe nnennen nnennen ẹdi ufọkibọk ufọt okoneyo oro.” Nso ke mme ufan emi ẹketịn̄? “Nnyịn ikoyomke ikọ ndomokiet ini oro. Mmọ ndidu do ama enen̄ede owụt ke mmọ ẹkere ẹban̄a nnyịn.”

Bible ọdọhọ ke ini Jesus okokụtde nte mme owo ẹtuade Lazarus, ke ‘esịt ama etịmede’ enye, enye onyụn̄ “atua eyet.” (John 11:33-35, 38) Jesus ikekereke ite ke owo ndiduọk eyet ke iso mbon en̄wen ọwọrọ ke enye idịghe erenowo. Enye ama ọfiọk ubiak ye ntakurua emi ẹkesịmde mmọ. Nso ke ikpep ito emi? Ke ini ikade ikese mbon oro owo mmọ akpade, ikpanaha iyak bụt anam nnyịn itre nditua ye mmọ eke ẹtuan̄ade. (Rome 12:15) Ke n̄kan̄ eken, kûkere ke ana imọ inam owo oro owo esie akpade do atua eyet. Ndusụk owo ẹsima nditua ke ini ẹdude ikpọn̄.

Kpan̄ Utọn̄ ye Esịtmbọm

Ekeme ndidi Jesus ama enyene ikọ ifan̄ nditịn̄ man ọdọn̄ Martha ye Mary esịt, edi enye ama ayak mmọ ẹbem iso ẹtịn̄ ikọ. (John 11:20, 21, 32) Ke ini enye eketịn̄de ikọ ye Martha, enye ama obụp mbụme, ekem akpan̄ utọn̄.—John 11:25-27.

Nditịm n̄kpan̄ utọn̄ owụt ke afo emenen̄ede ekere aban̄a. Oyom itịm ikpan̄ utọn̄ man idọn̄ mbon emi owo mmọ akpade esịt. Imekeme ndiwụt ke imetịm ikpan̄ utọn̄ ke ndibụp mme mbụme emi ẹdinamde mbon emi owo mmọ akpade ẹka iso ẹtịn̄ nte etiede mmọ ke idem. Edi kpeme mbak udunyịk mmọ ẹtịn̄ ikọ ke ini mmọ mîyomke nditịn̄. Ekeme ndidi idem emem mmọ ndien mmọ ẹyom ndiduọk odudu.

Mbon emi owo mmọ akpade ẹkeme ndifre idem ẹnyụn̄ etịn̄ ikọ kiet m̀mê ẹnam n̄kpọ kiet ediwak ini. Ndusụk ẹsitịn̄ kpukpru se isịnede mmọ ke esịt. Mary ye Martha ẹma ẹdọhọ Jesus ẹte: “Ọbọn̄, edieke afo okpokodude mi eyeneka mi ikpakakpaha.” (John 11:21, 32) Nso ke Jesus akanam? Enye ama enyene ime akpan̄ utọn̄ ye esịtmbọm. Enye ikodomoke nditeme mmọ nte mmọ ẹkpenamde n̄kpọ. Nte eyịghe mîdụhe, ama an̄wan̄a enye nte ke n̄kpọ emi ekeme ndinen̄ede mbiak mmọ.

Edieke mûfiọkke se ekpetịn̄de ke ini akade ndise owo emi owo esie akpade, emekeme nditọn̄ọ nneme ke ndibụp ete, “Ndi akpama ndineme n̄kpọ emi?” Ekem kpan̄ utọn̄ kop ibọrọ. Nen̄ede kpan̄ utọn̄ ke se enye etịn̄de. Se owo oro iso nyụn̄ domo ndifiọk nte etiede enye ke idem.

Imemke utom ndifiọk nte etiede owo oro owo esie akpade ke idem. Lydia etịn̄ ete: “Uwem nnyịn ama okpụhọde. Ndusụk ini nnyịn ikekemeke ndimụm idem n̄kama, ima isitua ke iso isenowo. Nnyịn n̄kukụre ikoyom mbon en̄wen ẹtịn̄ se ididọn̄de nnyịn esịt. Mme ufan nnyịn ẹma ẹnen̄ede ẹsịn ukeme ndifiọk nte etiede nnyịn ke idem.”

Jesus ama anam emi ke mfọnmma usụn̄. Enye ama ọfiọk ke owo kiet kiet ‘ọfiọk ufen esie, ye ndutụhọ esie.’ (2 Chronicles 6:29) Jesus ọkọbọrọ ekọm nditọeka iba emi ke nsio nsio usụn̄. Martha ama aka iso etịn̄ ikọ, ntre Jesus ama eneme nneme ye enye. Sia Mary akatuade eyet, Jesus iketịn̄ke ikọ ye enye ibịghi. (John 11:20-28, 32-35) Nso ke ikeme ndikpep nto uwụtn̄kpọ esie? Mfọnn̄kan n̄kpọ ekeme ndidi ndiyak owo  emi owo esie akpade ọtọn̄ọ onyụn̄ eneme nneme oro nte enye oyomde. Afo ndinyịme ndikpan̄ utọn̄ ke ini mmọ ẹtịn̄de se ibiakde mmọ ekeme ndinam mmọ ẹnen̄ede ẹkop ndọn̄esịt.

Mme Ikọ Oro Ẹdọn̄de Owo Esịt

Ke ini Mary ye Martha ẹkedọhọde Jesus ẹte: “Edieke afo okpokodude mi,” enye ikọduọhọke mmọ m̀mê ndiyat esịt ke se mmọ ẹketịn̄de. Enye ọkọbọrọ Martha onyụn̄ ọnọ enye nsọn̄ọ ete: “Eyeneka fo eyeset.” (John 11:23) Jesus akada ikọ ifan̄ emi an̄wam enye enyene idotenyịn onyụn̄ eti enye ke ima ima usụn̄ nte ke idotenyịn mmọdo.

Ke ini etịn̄de ikọ ye owo emi owo esie akpade, ti ete ke nditịn̄ ikọ ke esịt akpanikọ, nnyụn̄ ntịn̄ akpan n̄kpọ ekeme ndinam akwa ufọn, ekpededi edi ikọ ifan̄. Ẹkeme nditetịn̄ mme ikọ idọn̄esịt mîdịghe ẹwewet. Sia edide ẹsikeme ndifiak n̄kot mme leta ye kad, mmọ ẹkeme ndidọn̄ owo esịt ke anyan ini. Ke ọfiọn̄ usụkkiet ama ekebe tọn̄ọ nte Bob ebe esie akakpa, Kath ama afiak okot kpukpru kad oro ẹkenọde enye. Enye ọkọdọhọ ete: “Mma ndikụt ke mmọ ẹma ẹkam ẹn̄wam mi ẹkan ini oro. Adan̄aoro ndien ke n̄kenyene ndọn̄esịt.”

Nso ke afo ekeme ndiwet nda ndọn̄ owo esịt? Emekeme ndiwet n̄kpọ mban̄a akpan̄kpa oro—ifiọk n̄kpọntịbe oro mbufo mbiba ẹkenyenede m̀mê edu esie oro afo akamade. Kath ọdọhọ ete: “Ndinem ikọ oro ẹkesitịn̄de ẹban̄a Bob ye edu esie ẹma ẹnam mi nsak nnyụn̄ ntua. Idọkọ oro ẹkesinamde ẹban̄a enye ama anam mi ntuak inua imam onyụn̄ anam mi nti inem uwem oro ikesidude. Ediwak kad emi ẹkenọde mi, oro mmade etieti idahaemi, ẹsịne mme itie Bible.”

Nọ Ata Ata Un̄wam

Jesus ama anam se nnyịn mîkemeke ndinam man an̄wam ubon Lazarus. Enye ama anam Lazarus eset. (John 11:43, 44) Imekeme ndin̄wam ke ata ata usụn̄ nte ukeme nnyịn ayakde, utọ nte nditem udia, ndinọ isenowo mmọ itieidụn̄, ndiyet ọfọn̄ mmọ, ndise nditọwọn̄ mmọ enyịn, ndika utom nnọ mmọ, m̀mê ndinọ mmọ n̄kpọisan̄. Mbon oro owo mmọ akpade ẹyema n̄kpri n̄kpọ oro anamde ndiwụt ke emenen̄ede ama mmọ.

Imọfiọk ke mbon oro owo mmọ akpade ẹkeme ndiyom ndidu ikpọn̄. Kpa ye oro, afo emekeme ndinam usio-ukot oro odotde ndinyene nneme ye mmọ. Eka kiet ọdọhọ ete: “Mfụhọ inyeneke utịt, owo inyụn̄ isiakke usen emi owo edifiakde ikop inem idem.” Ndusụk owo ẹsiti mbon oro owo mmọ akpade ke akpan usen, utọ nte ke usen oro mmọ ẹkenamde ndọ m̀mê ke usenọfiọn̄ oro owo mmọ akakpade. Edieke odude ye mmọ ke mme utọ ini oro, afo emekeme ndidi eti ufan ke ini nnanenyịn.—Mme N̄ke 17:17.

Ikọ ndọn̄esịt Jesus ama esịne idotenyịn oro enye ekekpepde mbet esie. Enye ọkọdọhọ ete: “Lazarus ufan nnyịn aka ndiduọk odudu, edi ami m̀mọ̀n̄ nnam isan̄ n̄ka do man n̄kedemede enye ke idap.” (John 11:11) Jesus ama ọn̄wọn̄ọ ọnọ mme anditiene enye ke ẹyenam mme akpan̄kpa ẹset. Enye ama obụp Martha ete: “Nte afo emenịm emi ke akpanikọ?” Martha ama ọbọrọ ete: “Ih, Ọbọn̄.”—John 11:24-27.

Ndi afo emenịm ke Jesus ayanam mme akpan̄kpa ẹset? Edieke edide ntre, buana ọsọn̄urua idotenyịn emi ye mbon emi owo mmọ akpade. N̄wam mmọ ke ata ata usụn̄. Ikọ fo ye edinam fo ẹyedọn̄ mmọ esịt.—1 John 3:18.

[N̄wed ndise obio ke page 9]

(Ama oyom ndikụt nte enye enen̄erede etie, se n̄wed)

PEREA

Akpa Jordan

Jericho

Bethany

Inyan̄ Inụn̄

Jerusalem

SAMARIA