Ọyọhọ 4

Da Ọniọn̄ Mek Mme Ufan Fo

NSO KE BIBLE EKPEP? “Owo eke asan̄ade ye mme enyene-ibuot eyenyene ibuot.”—Mme N̄ke 13:20.

NSO IDI MFỊNA? Mme ufan nnyịn ẹsinam nnyịn iyụhọ ye se inyenede mîdịghe ẹnam nnyịn idiọk itọn̄. Edu mmọ ye se mmọ ẹnemede ẹyetụk nte nnyịn isede uwem.—1 Corinth 15:33.

Ke uwụtn̄kpọ, kere ban̄a mbụk Bible oro aban̄ade owo 12 emi ẹkenyọn̄de uyep ke isọn̄ Canaan ẹdi. Ata ediwak mmọ ẹma “ẹda idiọk mbụk ẹban̄a isọn̄ oro mmọ ẹkekade ndiyep, ẹditịn̄ ẹnọ nditọ Israel.” Kpa ye oro, owo iba ke otu mmọ ẹma ẹtịn̄ nti ikọ ẹban̄a isọn̄ Canaan, ẹte ke enye edi “ata eti isọn̄.” Edi idiọk edu mbon uyep duop eken ama otụk nditọ Israel. Mbụk oro ọdọhọ ete: “Ofụri esop ẹmenede uyo mmọ ẹseme . . . ndien kpukpru nditọ Israel ẹsụk . . . uyo.”—Numbers 13:30–14:9.

Ukem oro ke edi mfịn, ediwak owo “ẹdi mbon nsụkuyo, mbon oro ẹsemede ẹban̄a itie mmọ ke uwem.” (Jude 16) Ọsọsọn̄ owo ndiyụhọ ye se enye enyenede ke otu mme ufan emi mîsiyụhọke ye se mmọ ẹnyenede.

NSO KE AKPANAM? Kere se esinemede ye mme ufan fo. Ndi mme ufan fo ẹsima ndinam inua mban̄a se mmọ ẹnyenede, mîdịghe ndi mmọ ẹsiwak ndiseme idem mban̄a se mmọ mînyeneke? Ndien nso orụk ufan ke afo edi ọnọ mmọ? Ndi afo emesidomo ndinam se afo enyenede ọdọn̄ mme ufan fo itọn̄, mîdịghe ndi emesisịn udọn̄ ọnọ mmọ ẹyụhọ ye se mmọ ẹnyenede?

Kere ban̄a uwụtn̄kpọ David emi akanade edi edidem ye Jonathan eyen Edidem Saul. David okodu uwem nyon̄ ke wilderness. Edidem Saul ekekere ke David ọmọn̄ ọbọ imọ ukara, ntre enye ama oyom ndiwot David. Kpa ye oro edide Jonathan akpakada ubọn̄ ke itie ete esie, enye ama akabade edi kiet ke otu ata akpan ufan David. Jonathan ama ọfiọk ke Abasi emek David ada itie ete imọ, ndien enye ama enyịme ndinọ ufan esie ibetedem.—1 Samuel 19:1, 2; 20:30-33; 23:14-18.

Utọ mme ufan oro ke afo ekpenyene, mme ufan emi ẹdomode ndiyụhọ ye se mmọ ẹnyenede ẹnyụn̄ ẹyomde ufọn fo. (Mme N̄ke 17:17) Edi man ekeme ndinyene utọ mme ufan oro, ana afo n̄ko enyene utọ mme edu oro.—Philippi 2:3, 4.

[Ndise ke page 7]

Ndi mme ufan fo ẹsinam fi oyụhọ ye se enyenede mîdịghe ndi ẹsinam fi ọdiọk itọn̄?