Akpa

Ma Mme Owo, Utu ke Ndima Okụk ye Inyene

NSO KE BIBLE EKPEP? “Ima okụk edi orụn̄ kpukpru orụk idiọkn̄kpọ.”—1 Timothy 6:10.

NSO IDI MFỊNA? Mme asuanetop n̄kpọurua iyomke nnyịn iyụhọ ye se inyenede. Mmọ ẹyom nnyịn idụk ufụn inọ okụk man ikpada idep mbufa ikpọ n̄kpọ oro ẹfọnde ẹkan. Okụk esitatap owo, ndien edi mmemmem n̄kpọ nnyịn ndima okụk. Edi Bible odụri owo utọn̄ nte ke owo emi amade inyene idiyụhọke ye se enyenede. Edidem Solomon ekewet ete: “Owo eke amade silver iyụhọke silver; ndien owo ekededi eke amade inyene idikwe utọt.”—Ecclesiastes 5:10.

NSO KE AFO EKEME NDINAM? Kpebe Jesus nyụn̄ kpep ndima mme owo n̄kan inyene. Jesus ama eben̄e idem ndiyak kpukpru se enye enyenede—esịnede uwem esie—atak ke ntak emi enye akamade mme owo. (John 15:13) Enye ọkọdọhọ ete: “Inemesịt okpon ke ndinọnọ akan ke ndibọbọ.” (Utom 20:35) Edieke nnyịn imade ndisinọ mbon en̄wen ini ye inyene nnyịn, mmọ ẹyenam kpa ntre ye nnyịn. Jesus ọkọdọhọ ete: “Ẹnọ owo n̄kpọ, ndien mme owo ẹyenọ mbufo n̄kpọ.” (Luke 6:38) Mbon oro ẹsịnde ifịk ẹyom okụk ye inyene ẹsisịn idem ke mfịna ẹnyụn̄ ẹbọ ufen. (1 Timothy 6:9, 10) Edi, ndima mbon efen nnyụn̄ ndi se mmọ ẹmade ẹsinen̄ede ẹnam owo okop uyụhọ.

Ntak mûfiakke udụn̄ọde use m̀mê emekeme ndinam uwem fo afiak emem-e? Ndi emekeme ndisụhọde ibat n̄kpọ oro enyenede m̀mê aduakde ndinyene? Edieke anamde oro, oyokụt nte ke eyenyene ini ye odudu ada anam se itịmde idi akpan n̄kpọ ke uwem—oro edi, an̄wam mme owo onyụn̄ anam n̄kpọ Abasi emi ọnọde fi kpukpru se enyenede.—Matthew 6:24; Utom 17:28.

[Ndise ke page 4]

“Ẹnọ owo n̄kpọ, ndien mme owo ẹyenọ mbufo n̄kpọ”