Ndi Owo Ekeme Ndiyụhọ ye Se Enyenede?

“Ediyụhọ ye se owo enyenede anam mme ubuene ẹdi imọ; nditre ndiyụhọ anam mme imọ owo ẹbuene.”—Benjamin Franklin.

NTE n̄ke oro owụtde, ediwak owo ẹfiọk ke owo ikemeke ndidep uyụhọ nte emi owo esidepde n̄kpọurua. Eyịghe idụhe ndien etiede nte ke ediwak owo iyụhọke ye se mmọ ẹnyenede—ke ererimbot emi anamde ikere ke akpana inyene ekese inyene, inam ikpọ n̄kpọ, inyụn̄ idu orụk uwem emi mbon en̄wen ẹdude! Ndi n̄kpọ ndomokiet ke otu emi otụk fi?

• Mme asuanetop n̄kpọurua ẹnam fi ekere ke ana edep ediwak n̄kpọ mbemiso oyụhọde ye se enyenede.

• Umia mbuba ke itieutom m̀mê ke ufọkn̄wed anam fi odomo idem ye mbon en̄wen.

• Mme owo iwụtke esịtekọm iban̄a se afo anamde ọnọ mmọ.

• Mme ufan fo ẹnam se mmọ ẹnyenede ọdọn̄ fi itọn̄.

• Owo ibọrọke mme akpan mbụme fo emi ẹban̄ade uwem.

Ndi owo ekeme ndikop uyụhọ ke ini osobode mme utọ n̄kpọ-ata emi? Apostle Paul ama etịn̄ aban̄a “nte owo ekemede ndiyụhọ ye se enyenede.” Ndusụk ini enye ama esinyene ekese, edi ke mme ini eken enyene esisịt. Mme ufan esie ẹma ẹma enye edi mbon eken ẹma ẹsisak enye. Kpa ye oro, enye ama ọdọhọ ete: “Mmekpep ndiyụhọ ye se nnyenede ke mme idaha ekededi.”—Philippi 4:11, 12.

Mbon emi mînamke n̄kpọ man ẹyụhọ ye se mmọ ẹnyenede ifiọkke ke owo ekeme ndiyụhọ ye se enye enyenede. Edi nte Paul eketịn̄de, owo ekeme ndikpep ndiyụhọ ye se enye enyenede. Iyom fi ekere aban̄a usụn̄ ition emi Ikọ Abasi kpa Bible owụtde nte owo ekemede ndikpep ndiyụhọ ye se enyenede.