Mmanie Ẹdụn̄ ke Obio Mme Spirit?

Ke Europe, akamba mma kiet akama n̄kwa akam odụk ufọkabasi ọkọtọn̄ọ edọn̄ ukpono ukpono ke iso mbiet Mary. Ke Africa, ubon kiet ẹda mmịn ẹkeduọk ke udi iman emi mmọ ẹkekponode. Ke America, akparawa kiet etie utre udia onyụn̄ etie ekere n̄kpọ, odori enyịn ndinyene nneme ye angel emi enye ekerede ke esikpeme imọ. Ke Asia, oku ufọkabasi ọfọp nsio nsio ndise emi ẹwetde ke n̄wed ọnọ spirit mme ete ete mmọ.

NSO ke mbon emi ẹda ẹbiet kiet eken? Kpukpru mmọ ẹnịm nte ke mme enyene-ifiọk edibotn̄kpọ mmọdo ke obio mme spirit, emi mme owo ẹkemede ndinyene nneme ye mmọ, emi ẹnyụn̄ ẹkemede ndinam nti n̄kpọ nnọ mme owo. Utọ ekikere emi idịghe obufa, inyụn̄ ikpaha owo idem. Se ikam ikpade owo idem edi nte ke mme owo ẹnyene ediwak nsio nsio ekikere ẹban̄a mbon emi ẹdude ke obio mme spirit.

Muslim ẹtuak ibuot ẹnọ Abasi kiet—Allah. * Mme owo ke Christendom ẹdọhọ ke Abasi edi Ita-ke-Kiet, oro edi, Abasi Ete, Abasi Eyen, ye Abasi Edisana Spirit. Mbon Hindu ẹnịm ke ediwak tọsịn mme abasi ye mme abasi-an̄wan ẹdu. Mbon eken ẹdọhọ ke mme spirit ẹsidu ke idem ndusụk unam, eto, ikpọ itiat, ye ke idịm. Mme n̄wed, ndise vidio ye mme edinam ekebe ndise ẹban̄ade mme demon, ekpo, ye mme ukpahaekpo, mme abasi ye mme abasi-an̄wan ẹtụn mbon en̄wen usụn̄.

Edi kpa nte mme owo ẹnyenede ediwak nsio nsio ekikere ẹban̄a mme abasi ye ndem, ntre n̄ko ke ẹnyene ẹban̄a nte ẹkpenyenede nneme ye mmọ. Edieke itịmde ikere, iyokụt nte ke idịghe kpukpru usụn̄ emi ẹnen. Kere ban̄a emi ise: Mbemiso ikotde owo ke urụk ukopikọ, ana idiọn̄ọ owo oro ikotde do, inịm nte ke enye odu, ke enye oyonyụn̄ ọbọrọ ikot nnyịn. Ufọn ididụhe ndiyom ndikot owo emi nnyịn mîfiọkke. Ndiọkn̄kan akam edi ndikot owo emi ekemede ndibian̄a nnyịn.

Ntre ndien, mmanie ẹdu ke obio mme spirit? Bible ọbọrọ mbụme emi onyụn̄ asiak owo oro ikpenyenede nneme, ye utọ ibọrọ oro ikpodoride enyịn ndinyene. Mbọk kot ibuotikọ oro ẹtienede. Se Bible etịn̄de ekeme ndikpa fi idem.

[Ikọ Idakisọn̄]