Mme N̄kukụt Ẹban̄ade Obio Mme Spirit

INAMKE n̄kpọ m̀mê owụk enyịn adan̄a didie ese ikpaenyọn̄, udukwe owo eke spirit ndomokiet. Kpan̄ utọn̄ nte akpakpan̄, udukopke uyo mmọ ndomokiet. Edi, ke akpanikọ, mmọ ẹdu. Mmọ ẹnen̄ede ẹnyene ifiọk ye odudu, ẹnyụn̄ ẹnyene nsio nsio enyịn̄ ye edu. Ndusụk ẹsin̄wam nnyịn, mmọ eken ẹyom ndinam nnyịn ibak. Kpukpru mmọ ẹnyene udọn̄ ke idem nnyịn.

Ata Abasi ke idemesie edi Spirit. (John 4:24) Enye enyene san̄asan̄a enyịn̄ emi anamde enye edi isio ye ediwak mme nsunsu abasi eken. Enyịn̄ esie edi Jehovah. (Psalm 83:18) Andiwet Psalm ekewet ete: “[Koro] Jehovah okponde onyụn̄ enen̄erede odot se ẹtorode. Enye enyene uten̄e akan kpukpru mme abasi efen. Koro kpukpru mme abasi mme idụt ẹdi mme abasi eke mînyeneke ufọn; edi amaedi Jehovah, edi enye akanam enyọn̄. Uku ye ubọn̄ ẹdu enye ke iso; odudu ye uyai ẹdu ke edisana ebiet esie.”—Psalm 96:4-6.

Mme N̄kukụt Ẹban̄ade Ata Abasi

Bible ọdọhọ nnyịn ete: “Akananam baba owo kiet ikwe Abasi.” (John 1:18) Nnyịn ikemeke ndifiọk mbiet ye uyai esie, kpa nte owo emi amanade nnan mîkemeke ndifiọk nte uduot n̄kpọ etiede. Edi ukem nte eti andikpep adade mme n̄kpọ oro nditọ ukpepn̄kpọ esie ẹfiọkde anam mme awak-n̄kukọhọ n̄kpọ ẹn̄wan̄a mmọ, kpa ntre ke Abasi ada Ikọ esie kpa Bible, anam nnyịn ifiọk mme n̄kpọ oro nnyịn mîkpọfiọkke. Jehovah ada mme n̄kukụt eke spirit oro ẹkenọde mme anam-akpanikọ ke eset, an̄wam nnyịn ifiọk nte heaven etiede, ye se nnyịn ibuanade ye mbon oro ẹdụn̄de do.

Ke uwụtn̄kpọ, ke n̄kukụt kiet oro prọfet Ezekiel okokụtde, ẹdọhọ ke ubọn̄ Jehovah ebiet ikan̄, uyama, itiat sapphire, ye akpara. Ke n̄kukụt en̄wen, apostle John ama okụt Jehovah etiede ke ebekpo onyụn̄ ọdọhọ ke Abasi “ebiet itiat Jasper ye ọsọn̄urua ndatndat itiat,” onyụn̄ adian do ete ke “akpara emi ebietde emerald onyụn̄ odu akanade ebekpo oro okụk.” Emi owụt ke idụhe ebiet emi eyede uyai, enemde owo ke idem, onyụn̄ etiede emem emem nte okụre Jehovah.—Ediyarade 4:2, 3; Ezekiel 1:26-28.

Prọfet Daniel n̄ko ama okụt Jehovah ke n̄kukụt, onyụn̄ okụt mme angel ‘tọsịn duop ke itie tọsịn duop nte ẹdade Jehovah ke iso.’ (Daniel 7:10) Nso ndyọ ndyọ ndise ke emi ekedi ntem! Ndikụt angel kiet, ọkpọkọm edi  ke n̄kukụt ekpenyene owo uten̄e, kere ndien ise ban̄a edikụt akwa udịm mfọnmma angel!

Ẹtịn̄ ẹban̄a mme angel n̄kpọ nte utịm ike-400 ke Bible, ndien ndusụk mmọ ẹdi mme seraph ye mme cherub. Ikọ Greek ye Hebrew oro ẹkabarede “angel” ke Bible ẹwọrọ “asan̄autom.” Ke ntre, mme angel ẹkeme ndineme nneme ye kiet eken, mmọ ẹma ẹsinyụn̄ ẹneme nneme ye mme owo ke eset. Mme angel idịghe mme owo oro ẹma ẹkedodu uwem ke isọn̄. Jehovah ama obobot mmọ anyan ini mbemiso enye obotde owo.—Job 38:4-7.

Ke n̄kukụt Daniel, akwa udịm mme angel ẹma ẹboho ẹse ata n̄wọrọnda n̄kpọntịbe. Daniel ama okụt “owo eke ebietde eyen owo” akade ebekpo Jehovah man “ẹnọ enye ukara, ye itie ukpono, ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye.” (Daniel 7:13, 14) “Eyen owo,” kpa ata akpan owo ke obio mme spirit edi Jesus Christ emi ekesetde ke n̄kpa, emi ẹnyụn̄ ẹnọde odudu ndikara ofụri isọn̄. Ibịghike ukara esie ayada itie kpukpru ukara owo onyụn̄ etre udọn̄ọ, mfụhọ, ufịk, ubuene, ye n̄kpa.—Daniel 2:44.

Ke akpanikọ, ndidori Jesus ke ebekpo ama anam esịt enen̄ede adat akwa udịm mme anam-akpanikọ angel emi, oro ẹyomde ufọn ubonowo. Edi idịghe kpukpru mme edibotn̄kpọ eke spirit ẹkenem esịt.

Mme Asua Abasi ye Mme Asua Owo

Ke ntọn̄ọ ntọn̄ọ mbụk ubonowo, kiet ke otu mme angel ama enen̄ede oyom ẹtuak ibuot ẹnọ imọ. Enye ama akabade ọbiọn̄ọ Jehovah onyụn̄ anam idem esie Satan, emi  ọwọrọde “Andibiọn̄ọ.” Satan emi edide etubom idiọkn̄kpọ, etetịm ọbiọn̄ọ Jehovah emi edide Abasi ima. Mme angel eken ẹma ẹtiene Satan ẹsọn̄ ibuot. Bible okot mmọ mme demon. Ukem nte Satan, mme demon ẹmekabade ẹdi ndiọi asua ubonowo. Mmọ ẹdi ntak ediwak ndutụhọ, ukwan̄ikpe, udọn̄ọ, ubuene, ye mme ekọn̄ oro ẹn̄wanade ke ererimbot.

Okposụkedi emi owo mîwakke nditịn̄ aba mban̄a Satan ke ediwak ufọkabasi Christendom, n̄wed Job ke Bible etịn̄ aban̄a orụk owo emi ọsọn̄ibuot angel oro edide ye se enye aduakde. N̄wed Bible oro ọdọhọ ete: “Edikem ke usen oro nditọ ata Abasi ẹdụkde ẹdida itie mmọ ke iso Jehovah, Satan onyụn̄ etiene odụk otu mmọ.” Nte nneme oro okosụk akade iso, Satan ama ọsọn̄ enyịn ọdọhọ ke Job anam n̄kpọ Abasi ke ntak mme n̄kpọ emi Abasi ọnọde enye. Man owụt ke imọ itịn̄ akpanikọ, Satan ama enen̄ede otụhọde Job, owotde ufene esie ye nditọ esie mboduop. Ke oro ebede, enye ama ada idiọk oyo ọtọ Job ofụri idem. Kpukpru se Satan akanamde man owụt ke enye eketịn̄ akpanikọ ama okpu.—Job 1:6-19; 2:7.

Ediwak ntak ẹdu emi ẹnamde Jehovah ọyọ Satan ke ofụri anyan ini emi, edi enye idiyọhọ enye ke nsinsi. Ibịghike ẹyesobo Devil. Ẹtọtọn̄ọ ndinam n̄kpọ mban̄a emi, ẹnyụn̄ ẹtịn̄ se ẹnamde ke n̄wed Ediyarade, emi ẹtịn̄de ẹban̄a akpan n̄kpọ en̄wen emi eketịbede ke obio mme spirit, emi nnyịn mîkpọfiọkke tutu amama. Nnyịn ikot ntem ite: “Ndien ekọn̄ asiaha ke heaven: Michael [Jesus Christ oro ẹnamde eset] ye mme angel esie ẹn̄wana ekọn̄ ye dragon [Satan], dragon ye mme angel esie ẹnyụn̄ ẹn̄wana ekọn̄ edi enye ikanke, ufan̄ inyụn̄ idụhe aba inọ mmọ ke heaven. Ntre ẹsio akwa dragon oro ẹduọk, kpa akani urụkikọt, enye emi ẹkotde Devil ye Satan, emi adade kpukpru mme andidụn̄ isọn̄ otụn usụn̄; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.”—Ediyarade 12:7-9.

Tịm fiọk ke ẹdọhọ ke Satan ‘ada kpukpru mme andidụn̄ isọn̄ otụn usụn̄.’ Enye esitụn mme owo usụn̄ ke ndida mme nsu oro ido ukpono ẹsude n̄wọn̄ọde mmọ n̄kpọn̄ Jehovah ye Ikọ Abasi. Utọ nsu oro kiet edi nte ke owo ama akpa, ke enye esika obio mme spirit. Ẹsisu nsu emi ke nsio nsio usụn̄. Ke uwụtn̄kpọ, ke Africa ye Asia, ediwak owo ẹnịm nte ke owo ama akpa ke enye ebe aka obio ekpo emi mme ete ete oro ẹkekpan̄ade ẹdụn̄de. Ukpepn̄kpọ purgatory ye hell ẹsụk ẹto kpa nsunsu ekikere oro nte ke owo esisụk ododu uwem ke ama akakpa.

Ndi Owo Esika Heaven ke Ama Akakpa?

Nso ndien kaban̄a se ediwak miliọn owo ke ofụri ererimbot ẹnịmde nte ke kpukpru nti owo ẹka heaven? Edi akpanikọ nte ke ndusụk nti owo ẹsika heaven, edi mmọ iwakke ke ẹmende ẹdomo ye ediwak biliọn mme owo oro ẹma ẹkekpan̄a. Bible ọdọhọ ke ‘ẹdep owo 144,000 ẹsio ke isọn̄’ ndien ke mmọ ẹyekara nte “mme oku,” mmọ n̄ko “ẹyekara isọn̄ nte ndidem.” (Ediyarade 5:9, 10; 14:1, 3) Mmọ ye Eyen owo, emi edide Jesus Christ, ẹdinam ukara eke heaven, kpa Obio Ubọn̄ Abasi. Ukara emi oyosobo Satan ye mme demon esie onyụn̄ anam isọn̄ edi paradise. Ediwak owo emi ẹma ẹkekpan̄a ẹyefiak ẹdu uwem ke ini iso, ẹnyụn̄ ẹnyene idotenyịn nsinsi uwem ke Paradise oro edidude ke isọn̄.—Luke 23:43.

Ke nditịn̄ ibio ibio, ẹwak etieti ke obio mme spirit. Jehovah Abasi, kpa Andibot kpukpru se idude uwem okon̄ akan kpukpru edibotn̄kpọ emi ẹdude do. Akwa udịm mme angel ke ẹnam akpanikọ ẹnọ enye do. Mme angel eken oro Satan adade usụn̄, ẹma ẹsọn̄ ibuot ye Jehovah ẹnyụn̄ ẹsịn ifịk nditụn mme owo usụn̄. Ke adianade do, “ẹdep” mîdịghe ẹmek ibat ibat owo ke isọn̄ man ẹkenam akpan utom ke heaven. Ke ikerede iban̄a emi, ẹyak ineme iban̄a owo emi ikemede ndida nneme nneme ke obio mme spirit ye nte ikemede ndinam emi.