Kpep Nditọ Fo

Ndịben̄kpọ Oro Afo Ekemede Nditịn̄ Nnọ Mbon En̄wen

NDI akanam owo etịn̄ ndịben̄kpọ ọnọ fi?— * Odu ndịben̄kpọ kiet oro n̄kpamade nditịn̄ nnọ fi. Bible okot enye “edisana ndịben̄kpọ emi ekedịbede ke anyan ini emi ekebede.” (Rome 16:25) Ke akpa, Abasi ikpọn̄ ọkọdiọn̄ọ “edisana ndịben̄kpọ emi.” Ẹyak ise nte Abasi akanamde ediwak owo ẹdiọn̄ọ ndịben̄kpọ emi.

Akpa kan̄a, ndi ọmọfiọk se “edisana” ọwọrọde?— Enye ọwọrọ ke n̄kpọ anana ndo. Ntem, ẹkot ndịben̄kpọ oro edisana ndịben̄kpọ sia enye otode Abasi emi edide edisana. Afo ekere ke mmanie ẹkeyom ndifiọk edisana ndịben̄kpọ emi?— Mme angel. Bible ọdọhọ ete: “Ọdọn̄ mme angel ndinyụn̄ọ mme n̄kpọ emi.” Mmọ ẹkeyom ndifiọk edisana ndịben̄kpọ emi.—1 Peter 1:12.

Ke ini Jesus ekedide isọn̄, enye ama etịn̄ aban̄a edisana ndịben̄kpọ emi onyụn̄ anam enye an̄wan̄a mme owo. Enye ọkọdọhọ mme mbet esie ete: “Ẹyak mbufo ẹfiọk edisana ndịben̄kpọ obio ubọn̄ Abasi.” (Mark 4:11) Ndi omokụt do se edisana ndịben̄kpọ oro aban̄ade?— Enye aban̄a Obio Ubọn̄ Abasi, emi Jesus ekekpepde nnyịn ete ibọn̄ akam iben̄e!—Matthew 6:9, 10.

Idahaemi yak ise nte Obio Ubọn̄ Abasi ekedide ndịben̄kpọ “ke anyan ini emi ekebede” mbemiso Jesus edi isọn̄ edinam enye an̄wan̄a. Ke Adam ye Eve ẹma ẹkebiat ibet Abasi ẹnyụn̄ ẹbịn mmọ ẹsio ke In̄wan̄ Eden, mme asan̄autom Abasi ẹma ẹdifiọk ke Abasi oyosụk anam ofụri isọn̄ akabade edi Paradise. (Genesis 1:26-28; 2:8, 9; Isaiah 45:18) Mmọ ẹma ẹwet ẹban̄a nte mme owo ẹdikopde inemesịt ke Obio Ubọn̄ Abasi mi ke isọn̄.—Psalm 37:11, 29; Isaiah 11:6-9; 25:8; 33:24; 65:21-24.

Kere ise ban̄a Andikara Obio Ubọn̄ Abasi. Ndi ọmọdiọn̄ọ owo emi Abasi emekde ete edi Andikara oro?— Eyen Esie, Jesus Christ, emi edide “Ọbọn̄ Emem.” Bible ọdọhọ ke “ubọn̄ oyodoro enye ke afara.” (Isaiah 9:6, 7) Ana ami ye afo inyene ‘ifiọk iban̄a edisana ndịben̄kpọ Abasi, oro edi, Christ.’ (Colossae 2:2) Ana ifiọk ke Abasi ama emen uwem akpa angel (Eyen esie eke spirit) emi enye okobotde edisịn ke idịbi Mary. Eyen oro, emi ekedide okopodudu angel, ke Abasi ọkọnọ edi isọn̄ ediwa idem esie man nnyịn ikpenyene nsinsi uwem.—Matthew 20:28; John 3:16; 17:3.

Edi ediwak n̄kpọ ẹdu oro anade idiọn̄ọ iban̄a ndịben̄kpọ emi, ke adianade ye ndidiọn̄ọ ke Abasi emek Jesus ete edi Andikara Obio Ubọn̄ Esie. Edisana ndịben̄kpọ emi esịne n̄ko nte ke mbon en̄wen, irenowo ye iban, ẹyetiene Jesus  emi ẹkenamde eset ẹkedu ke heaven. Mmọ ẹyetiene enye ẹkara ke heaven!—Ephesus 1:8-12.

Ẹyak ikpep enyịn̄ ndusụk mbon oro ẹdikarade ye Jesus ke heaven. Jesus ọkọdọhọ mme anam-akpanikọ apostle esie ete ke imọn̄ ika heaven man iketịm itie inịm inọ mmọ. (John 14:2, 3) Edieke okotde mme itie N̄wed Abasi oro ẹtienede mi, afo oyokụt enyịn̄ ndusụk irenowo ye iban emi ẹdikarade ye Jesus ke Obio Ubọn̄ Ete esie.—Matthew 10:2-4; Mark 15:39-41; John 19:25.

Ke ata anyan ini, owo ikọfiọkke m̀mê owo ifan̄ ẹditiene Jesus ikara ke Obio Ubọn̄ esie ke heaven. Edi nnyịn imọfiọk ibat mmọ idahaemi. Ndi afo ọmọfiọk ibat mmọ?— Bible ọdọhọ ke mmọ ẹdi owo 144,000. Emi n̄ko edi ubak edisana ndịben̄kpọ.—Ediyarade 14:1, 4.

Ndi afo emenyịme ke “edisana ndịben̄kpọ obio ubọn̄ Abasi” emi edi ata n̄wọrọnda ndịben̄kpọ emi owo ekededi akanam ọfiọkde?— Ke edide ntre, yak idomo ndikpep kpukpru se ikemede iban̄a mme n̄kpọ emi man ikeme ndinam mmọ ẹn̄wan̄a adan̄a ediwak owo nte ikekeme.

[Ikọ Idakisọn̄]

MBỤME:

▪ Ewe ndịben̄kpọ ke itịn̄ iban̄a, ndien ntak emi ẹkotde enye ntre?

▪ Nso idi ndịben̄kpọ emi, ndien anie ekebem iso ekpep mme owo se ndịben̄kpọ emi edide?

▪ Nso ye nso ke afo ekpep aban̄a ndịben̄kpọ emi?

▪ Didie ke afo ekeme ndinam edisana ndịben̄kpọ emi an̄wan̄a ufan fo?

[Ndise ke page 31]

Afo ekere ke nso ke mme angel ẹkeyom ndifiọk?