Ntak Emi Mbụk Eden Ekpebehede Fi

KIET ke otu n̄kpọ emi mbon akwaifiọk ẹsitịn̄de ndiwụt ke se Genesis etịn̄de aban̄a Eden idịghe akpanikọ edi nte ke itie en̄wen ndomokiet ke Bible itịn̄ke n̄kpọ iban̄a Eden. Ke uwụtn̄kpọ, Paul Morris, emi edide Prọfesọ Ukpepn̄kpọ Ido Ukpono, ekewet ete: “Ke ẹsiode Genesis ẹfep, idụhe ebiet en̄wen ke Bible emi etịn̄de n̄kpọ aban̄a In̄wan̄ Eden.” Mbon akwaifiọk eken ẹkeme ndisọsọp nnyịme ye enye, edi ekikere emi inenke.

Ata ediwak itie ke Bible ẹtịn̄ n̄kpọ ẹban̄a In̄wan̄ Eden, Adam ye Eve, ye urụkikọt. * Se mbon akwaifiọk ifan̄ emi ẹtịn̄de imenke-men udomo ye ata ediwak uyarade emi inyenede ke Bible iban̄a mbụk emi. Mme adaiso ido ukpono ye mme okụt-ndudue nnọ Bible ẹn̄wana en̄wan ye Ikọ Abasi ke ndidọhọ ke se Genesis etịn̄de aban̄a In̄wan̄ Eden idịghe akpanikọ. Ke didie?

Edieke iyomde ofụri Bible an̄wan̄a nnyịn, ana mbụk In̄wan̄ Eden ebem iso an̄wan̄a nnyịn. Ke uwụtn̄kpọ, ẹkewet Bible ke usụn̄ emi enye ekemede ndibọrọ mme akpan mbụme emi nnyịn isibụpde. Ibọrọ emi Bible ọnọde esinyene ebuana ye se iketịbede ke In̄wan̄ Eden. Se ndusụk uwụtn̄kpọ mi.

● Nso isinam owo ọsọn̄ onyụn̄ akpa? Adam ye Eve ẹkpekedu uwem ke nsinsi ekpedi mmọ ẹma ẹsụk ibuot ẹnọ Jehovah. Nsọn̄ibuot akanam mmọ ẹkpan̄a. Mmọ ẹketọn̄ọ ndikpa ke usen emi mmọ ẹkesọn̄de ibuot ye Abasi. (Genesis 2:16, 17; 3:19) Mmọ ikedịghe aba mfọnmma, ndien mmọ ẹma ẹyak idiọkn̄kpọ ye unana mfọnmma ẹnọ nditọ mmọ. Ntak edi oro Bible ọdọhọde ete: “Idiọkn̄kpọ [okoto] owo kiet odụk ererimbot, n̄kpa onyụn̄  [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”—Rome 5:12.

● Ntak emi Abasi ayakde idiọkido odu? Satan ọkọdọhọ ke Abasi edi osu nsu emi edịpde nditọ esie nti n̄kpọ. (Genesis 3:3-5) Enye ọkọdọhọ ke Jehovah ikarake ọfọn. Adam ye Eve ẹma ẹbiere ndikop uyo Satan, ẹsịn ukara Jehovah ndiwụt ke owo ekeme ndibiere se ifọnde ye se idiọkde. Jehovah edi Abasi edinen ikpe ye ọniọn̄, ntre enye ama ọfiọk ke ata nnennen usụn̄ ndibiere eneni emi edi ndiyak ini ebe man mme owo ẹnyene ifet ndikara idemmọ nte mmọ ẹmama. Idiọkido emi osụk akade iso mi ke ntak ukara Satan enen̄ede owụt ke imoyom Abasi, ke owo inyụn̄ ikemeke-keme ndikara idemesie.—Jeremiah 10:23.

● Nso ke Abasi aduak ọnọ isọn̄ emi? Jehovah akada In̄wan̄ Eden owụt nte imọ iyomde isọn̄ eye eketre. Enye ama ọdọhọ Adam ye Eve ẹtọt ẹyọhọ isọn̄ ẹnyụn̄ “ẹkan enye,” man mmọ ẹkpekeme ndinam ofụri isọn̄ eye nte in̄wan̄ emi. (Genesis 1:28) Ntre, Abasi okoyom isọn̄ emi edi paradise emi mfọnmma nditọ Adam ye Eve ẹdụn̄ọde ọtọkiet. Ofụri se ẹnemede ke Bible aban̄a nte Abasi edisude akpa uduak esie emi.

● Ntak emi Jesus Christ ekedide isọn̄? Nsọn̄ibuot Adam ye Eve ke In̄wan̄ Eden ama anam Abasi ebiere n̄kpa ọnọ mmọ ye nditọ mmọ, edi Abasi ama anam eti ndutịm ọnọ owo. Enye ama ọdọn̄ Eyen esie edi isọn̄ edinọ se Bible okotde ufak. (Matthew 20:28) Nso idi ufak? Jesus edi “akpatre Adam”; enye ama anam se Adam mîkekemeke ndinam. Enye ama ọfọn ama, onyụn̄ aka iso okop item Jehovah ke ofụri ini emi enye okodude mi ke isọn̄. Enye ama awa uwem esie man afak owo, ndien ufak emi anam ẹkeme ndifen idiọkn̄kpọ mbon oro ẹnamde akpanikọ ẹnọ Abasi, man mmọ ẹkpekeme ndidu ukem uwem emi Adam ye Eve ẹkedude ke In̄wan̄ Eden mbemiso ẹkenamde idiọkn̄kpọ. (1 Corinth 15:22, 45; John 3:16) Ntem, Jesus ama ọsọn̄ọ ke isọn̄ emi oyosụk etie nte Eden kpa nte Jehovah akaduakde. *

Uduak Abasi itiehe nte ikpîkpu ekikere emi ayan̄ade owo ifiọk, enye enen̄ede an̄wan̄a owo. Enye oyosu. Ukem nte In̄wan̄ Eden ekedide ata ata ebiet ke isọn̄ emi, mme unam ye owo ẹnyụn̄ ẹdu, ntre n̄ko ke se Abasi ọn̄wọn̄ọde aban̄a isọn̄ emi edisu ke mîbịghike. Ndi eyetiene okụt ini emi kpukpru emi ẹditịbede? Emi esịne fi ke ubọk. Abasi oyom ata ediwak owo—ye idem mbon oro ẹkedude ndiọi uwem—ẹdu uwem ini oro.—1 Timothy 2:3, 4.

Jesus ama enyene nneme ye eren emi mîkodụhe eti uwem mbemiso enye akakpade. Enye ekedi abiatibet, onyụn̄ ọfiọk ke imọ imodot n̄kpa. Edi enye ama oyom Jesus ọdọn̄ imọ esịt onyụn̄ ọnọ imọ idotenyịn. Nso ke Jesus ọkọdọhọ enye? Enye ọkọdọhọ, “Afo oyodu ye ami ke Paradise.” (Luke 23:43) Edieke Jesus okpoyomde ndikụt abiatibet emi ke Paradise emi editiede nte In̄wan̄ Eden mi, ndi ukereke ke enye oyom ndikụt fi do n̄ko? Enye oyom! Ete esie n̄ko oyom! Edieke afo n̄ko onyụn̄ oyomde ndidu ke Paradise emi, nam ofụri se ekekeme ndikpep mban̄a Abasi emi akanamde In̄wan̄ Eden.

[Mme Ikọ Idakisọn̄]

 [Ekebe/Mme Ndise ke page 10]

NTỊN̄NNỊM IKỌ EMI ANAMDE BIBLE ENYENE IBUOTIKỌ KIET

“Ami nyesịn usua ke ufọt fo ye n̄wan ye ke ufọt mfri fo ye mfri esie. Enye ayanuak fi ibuot, afo oyonyụn̄ anuak enye nditịn̄ikpat.”—Genesis 3:15.

Ata akpa ntịn̄nnịm ikọ Bible edi emi, ndien Abasi eketịn̄ enye ke In̄wan̄ Eden. Ẹsiak n̄wan, mfri an̄wan, urụkikọt, ye mfri urụkikọt ke ntịn̄nnịm ikọ emi. Mmanie ke mmọ ẹdi? Didie ke ntịn̄nnịm ikọ emi osu?

URỤKIKỌT

Satan kpa Devil.—Ediyarade 12:9.

N̄WAN

Mme angel emi ẹdude ke esop Jehovah ke heaven ẹdi n̄wan emi. (Galatia 4:26, 27) Isaiah ọkọdọhọ ke “n̄wan” emi ayaman idụt eke spirit.—Isaiah 54:1; 66:8.

MFRI URỤKIKỌT

Mbon emi ẹmekde ndinam uduak Satan.—John 8:44.

MFRI AN̄WAN

Jesus Christ emi edide owo esop Jehovah ke heaven edi akpa mfri an̄wan emi. Nditọete Christ eke spirit emi ẹditienede enye ikara ke heaven ẹdi n̄ko “mfri” an̄wan. Mme Christian emi ẹyetde aran mi ẹnam idụt eke spirit, oro edi, “Israel Abasi.”—Galatia 3:16, 29; 6:16; Genesis 22:18.

UNAN NDITỊN̄IKPAT

Kpukpru ndutụhọ emi ẹketụhọrede Messiah ke ekpri ibio ini. Satan ama anam ẹwot Jesus ke ini enye okodude mi ke isọn̄. Abasi ama anam Jesus eset.

EDINUAK IBUOT

Edisobo Satan. Jesus oyosobo Satan. Edi Jesus eyebem iso osio idiọkn̄kpọ emi Satan akadade edisịn ke isọn̄ toto ke In̄wan̄ Eden.—1 John 3:8; Ediyarade 20:10.

Edieke oyomde ndifiọk ibio ibio se idide ibuotikọ Bible, kot ediye uduot ekpri n̄wed emi, Nso Idi Etop Bible? emi Mme Ntiense Jehovah ẹsiode.

[Ndise ke page 11]

Adam ye Eve ẹma ẹbọ ufen idiọkn̄kpọ mmọ