Ntak Emi Ediwak Ndọ Abiarade?

“Mme Pharisee ẹdi ẹbịne [Jesus], ẹduak ndidomo enye idomo ẹnyụn̄ ẹdọhọ ẹte: ‘Nte ibet enyịme owo osio n̄wan esie ndọ ke ntak ekededi?’”—Matthew 19:3.

NDUSỤK mbon eyo Jesus ẹma ẹbụp m̀mê akpana ẹdọ owo kiet ke nsinsi, m̀mê owo akam ekeme ndinam emi? Jesus ama ọbọrọ mmọ ete: “Nte mbufo ikokotke ite ke enye emi okobotde mmọ toto ke editọn̄ọ okobot mmọ eren ye n̄wan onyụn̄ ọdọhọ ete: ‘Ke ntak emi erenowo ọyọkpọn̄ ete ye eka esie onyụn̄ akadiana ye n̄wan esiemmọ, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Mmọdo, se Abasi ama akadian yak baba owo kiet okûdian̄ade.” * (Matthew 19:4-6) Emi enen̄ede owụt ke Abasi okoyom ndọ edi n̄kpọ nsinsi.

N̄kpọ nte owo 40 m̀mê se ibede oro ke otu owo 100 ẹsidian̄ade ndọ. Ndi item emi Bible ọnọde aban̄a ndọ inyeneke aba ufọn? Okûkam edi se isinamde ndọ abiara edi nte ke ndọ ke idemesie idịghe eti n̄kpọ.

Kere ban̄a uwụtn̄kpọ emi: Mme ọdọ ndọ iba ẹdep ukem ubomisọn̄. Kiet ẹtịm ẹkama ubomisọn̄ mmọ, iwatke idat idat. Ntre, ubomisọn̄ mmọ inyeneke mfịna. Mmọ eken ẹwat ubomisọn̄ mmọ idat idat, inyụn̄ itịmke enye ikama. Ubomisọn̄ mmọ abiara ndien mmọ ẹyom itie ẹtop enye ẹnịm. Anie anam ọyọhọ ubomisọn̄ iba emi abiara—ndi enye abiara ke idemesie m̀mê mme andinyene ẹbiat enye? Kpukpru owo ẹfiọk ke mme enyene ubomisọn̄ oro ẹbiat n̄kpọ mmọ.

Ntre n̄ko ke edi ye ndọ, ediwak ndọ ndibiara iwọrọke ite ke ndọ idịghe eti n̄kpọ. Ata ediwak ndọ emi ẹfọnde ẹwụt ke inyeneke se idiọkde ke ndọ. Mme utọ ndọ emi ẹnam mme owo, mme ubon, ye obio ẹkop inemesịt. Edi ndọ etie nte ubomisọn̄, oyom ẹtetịm enye ẹkama kpukpru ini edieke ẹyomde enye enen̄ede ebịghi.

Inamke n̄kpọ m̀mê n̄kpọn̄ ke ẹkedọ ndọ m̀mê enen̄ede ebịghi ẹkedọ, Bible etịn̄ nte ẹkpetịmde kiet eken ẹkama man ndọ mbufo ọfọn. Ẹneme ndusụk n̄kpọ emi ke ibuotikọ oro etienede.

[Ikọ Idakisọn̄]