‘O Abasi Mi, Ti Mi’
San̄a Kpere Abasi
‘O Abasi Mi, Ti Mi’
“N̄KEKERE ke Jehovah ikemeke-keme ndima mi sia enye enen̄ede ọdiọn̄ọ utọ owo emi ndide.” Eyenan̄wan kiet emi edide Christian, emi ekekerede ke imọ iwọrọke n̄kpọ ndomokiet, eketịn̄ ikọ emi. Ndi akanam etie fi ntre ke idem; ndi akanam emekere ke imọ iwọrọke n̄kpọ ndomokiet ke enyịn Abasi, owo itịn̄ke-tịn̄ iban̄a ndikere ke Abasi imaha fi? Edieke edide ntre, se idude ke Nehemiah 13:31 ekeme ndidọn̄ fi esịt.
Nehemiah emi ekedide andikara mme Jew ke n̄kpọ nte isua 2,500 emi ẹkebede ama esịn ofụri ukeme ndinam se inemde Abasi esịt. Enye akada iso ke utom ubọp ibibene Jerusalem kpa ye mme asua ẹkeyomde nditre utom oro. Enye ama okụt ete ke ẹnịm Ibet Abasi, iyakke ẹfịk mme owo, onyụn̄ odomo ndisọn̄ọ mbuọtidem ekemmọ nditọ Israel. Ndi Abasi ama okụt kpukpru nti n̄kpọ emi Nehemiah akanamde mi? Ndi Jehovah ama ama se Nehemiah akanamde? Imekeme ndikụt ibọrọ mbụme emi ke akpatre ufan̄ikọ ke n̄wed Nehemiah.
Nehemiah ọbọn̄ akam ọnọ Abasi ete: “O Abasi mi, ti ndifọn mi mfọn.” * Ndi Nehemiah ekere ke Abasi ikwe kpukpru nti n̄kpọ oro inamde, m̀mê nte ke Abasi efre imọ enyịn? Baba. Anaedi enye ọfiọk se mbon oro ẹkewetde Bible mbemiso enye ẹketịn̄de ẹban̄a nte Jehovah amade mme anam-akpanikọ ikọt esie ye se mmọ ẹnamde. (Exodus 32:32, 33; Psalm 56:8) Nso ndien ke enye oyom Abasi anam ọnọ imọ? N̄wed ndụn̄ọde kiet ọdọhọ ke ikọ Hebrew oro ẹkabarede “ti” ọwọrọ “ndima owo nnyụn̄ nnanam n̄kpọ n̄wụt ke imama owo.” Nehemiah ọbọn̄ akam emi sia enye enen̄ede enyene mbuọtidem ke Abasi eyeti imọ ke ntak ima onyụn̄ ọdiọn̄ imọ.—Nehemiah 2:4.
Ndi Jehovah ọyọbọrọ akam Nehemiah? Ke akpanikọ, enye ọbọbọrọ. Jehovah ndiyak ẹwet akam emi ẹsịn ke Bible owụt ke enye eti onyụn̄ ama Nehemiah. Edi “Andikop akam” ọyọbọrọ akam ofụri esịt emi Nehemiah ọkọbọn̄de mi akan emi.—Psalm 65:2.
Abasi ọyọnọ Nehemiah utịp ke kpukpru nti n̄kpọ emi enye akanamde ọnọ imọ. (Mme Hebrew 11:6) Jehovah ayanam enye eset ke obufa ererimbot emi Enye ọn̄wọn̄ọde. * (2 Peter 3:13; Ediyarade 21:3, 4) Do ndien ke Nehemiah edinen̄ede ikụt ke Jehovah eti kpukpru nti n̄kpọ oro imọ ikanamde, ke ini Jehovah edinọde enye ifet ndidu ke nsinsi ke Paradise ke isọn̄ emi.
Akam Nehemiah owụt ke se Edidem David eketịn̄de aban̄a Jehovah mi edi akpanikọ: “Afo, O Jehovah ọyọdiọn̄ owo ekededi emi edide edinen; afo ayada unyịme fo akan mmọ okụk nte akamba otuekọn̄.” (Psalm 5:12) Ke akpanikọ, Abasi okụt onyụn̄ ama ofụri ukeme oro isịnde ndinam se inemde enye esịt. Ama akam edi emesịn ofụri ukeme anam n̄kpọ esie, enye iditreke-tre nditi fi nnyụn̄ nnen̄ede ndiọn̄ fi.
Mme itien̄wed Bible emi okpokotde ke Febuary:
[Mme Ikọ Idakisọn̄]
^ ikp. 5 Ọyọhọ ikanan̄ Nehemiah ọbọn̄de ukot akam kiet emi edi emi, ete Abasi eti imọ ke nti n̄kpọ oro imọ inamde.—Nehemiah 5:19; 13:14, 22, 31.
^ ikp. 7 Edieke oyomde ndifiọk n̄kpọ efen mban̄a se Abasi aduakde ọnọ mme anam-akpanikọ ikọt esie mi ke isọn̄, kot ibuot 3 ye ibuot 7 ke n̄wed, Nso ke Bible Enen̄ede Ekpep? emi Mme Ntiense Jehovah ẹsiode.