Anie Ededi Jesus Christ?

“Ndien ke ini enye odụkde Jerusalem, ofụri obio ẹdu ke ndutịme, ẹdọhọ ẹte: ‘Anie edi emi?’ Otuowo ẹka iso ndidọhọ ẹte: ‘Emi edi Jesus, kpa prọfet emi otode Nazareth ke Galilee!’” —MATTHEW 21:10, 11.

NSO ikanam utọ ndutịme emi odu ke ini Jesus Christ * akakade Jerusalem ke ini utọ eke isua 33 E.N. Ediwak mbio obio ẹma ẹkekop n̄kpọ ẹban̄a Jesus ye mme n̄wọrọnda n̄kpọ emi enye akanamde. Ekedi enye emi ama okop, etịn̄ ọnọ enye oko. (John 12:17-19) Edi akwa otuowo emi ikọfiọkke ke akparawa emi okodude do ye mmimọ ọyọwọrọ etop ke ofụri ererimbot tutu esịm mfịn emi.

Yak ineme n̄kpọ ifan̄ oro ẹwụtde nte etop Jesus esịmde ofụri ererimbot.

▪ N̄wed usenọfiọn̄ oro ẹkamade mfịn ke ediwak itie ke ererimbot ọkọn̄ọ ke isua oro ẹkerede nte Jesus akamanade.

▪ Ibat mbon emi ẹdọhọde ke idi Christian ebe biliọn iba—oro edi, n̄kpọ nte mbahade ita ke otu ofụri mme andidụn̄ isọn̄.

▪ Mme Muslim emi edide ẹwak ebe biliọn kiet ke ofụri ererimbot ẹdọhọ ke Jesus edi “ata akwa prọfet emi okponde akan Abraham, Noah, ye Moses.”

▪ Ediwak owo ke ererimbot ẹsitịn̄ ekese se Jesus eketịn̄de ke ini ẹnemede nneme ke usen ke usen. Se uwụtn̄kpọ ifan̄ mi:

‘Nam n̄kpọ ye owo nte akpamade ẹnam ye afo.’—MATTHEW 7:12

‘Yak mbiet ye ibokpot ẹkọri ọtọkiet.’—MATTHEW 13:30

‘Nọ Caesar se inyenede Caesar.’—MATTHEW 22:21

‘Ma mbọhọidụn̄ fo nte idem fo.’—MATTHEW 22:39

‘Tutu Christ ọtọn̄ọ ntak edi.’—MATTHEW 24:44

‘Eti owo Samaria.’—LUKE 10:33

Kpa ye oro Jesus ọwọrọde etop ntem, ediwak owo ẹnyene nsio nsio ekikere ẹban̄a owo emi enye edide. Ntem afo emekeme ndibụp m̀mê anie ededi Jesus Christ emi? Bible edi n̄kukụre n̄wed emi etịn̄de ebiet emi Jesus okotode, nte enye okodude uwem, ye ntak emi enye akakpade. Ndifiọk mme n̄kpọ emi ekeme ndinen̄ede n̄n̄wam fi ke emi ye ke nsinsi nsinsi.

[Ikọ Idakisọn̄]