Kpep Nditọ Fo

Ndi Akanam Emekere ke Edi Ikpọn̄ Onyụn̄ Okop Ndịk?

EDIWAK owo ẹsikere ke idi ikpọn̄ ye nte ke idụhe eke ekerede aban̄a mmimọ. N̄kani owo ẹsiwak ndinyene utọ ekikere emi. Ntem ke esidi ye ediwak nditọwọn̄ n̄ko, idem ye mbon oro ẹnamde n̄kpọ Abasi. Ndi ọmọfiọk ntak?— *

Awak se isinamde etie mme owo ntem. Yak itịn̄ iban̄a owo Abasi kiet emi okodude ke ata eset ko, n̄kpọ nte tọsịn isua kiet mbemiso Jesus edimana. Enye ekekere Elijah, okonyụn̄ odu uwem ke ini ediwak owo ke Israel ẹkekpọn̄de Jehovah Abasi, ẹketuak ibuot ẹnọ Baal. Elijah ọkọdọhọ ete: “Ami ikpọn̄ nsụhọ.” Edi ndi ekere ke Elijah ikpọn̄ okosụhọ ke otu mbon oro ẹtuakde ibuot ẹnọ Jehovah?—

Okposụkedi emi Elijah mîkọfiọkke, ediwak owo ke Israel ẹkesụk ẹtatuak ibuot ẹnọ Jehovah, edi ẹkededịbe. Ndịk akanam mmọ. Ndi ọmọfiọk se ikanamde mmọ ndịk?—

Ahab edidem Israel ikokponoke Jehovah; enye okokpono Baal, kpa nsunsu abasi emi Jezebel idiọk an̄wan esie ekesikponode. Ntre, enye ye Jezebel an̄wan esie ẹkeyoyom eke okponode Jehovah, akpan akpan Elijah, man ẹwot. Se ikanamde Elijah efehe edi oro. Ọbọn̄ mbon ama efehe usụn̄ oyom, n̄kpọ nte kilomita 483 ko ke desat Horeb, emi ẹnyụn̄ ẹkotde Sinai ke Bible. Mi ke Jehovah ọkọnọ ikọt esie Ibet Duop ye mme Ibet eken ata ediwak isua ko mbemiso eyo Elijah. Elijah  ama okosụhọde odụk esịt abaitiat kiet do edịbe. Ndi emekere ke akpakana Elijah okop ndịk ntem?—

Bible owụt ke Jehovah ama ọnọ Elijah odudu ndinam ikpọ utịben̄kpọ. Isan̄ kiet, Jehovah ama okop akam Elijah, anam ikan̄ oto enyọn̄ edita uwa esie. Jehovah akada emi owụt ke imọ idi ata Abasi, idịghe Baal. Edi ke emi, Jehovah enyene nneme ye Elijah ke esịt abaitiat.

Jehovah obụp enye ete: “Nso idi mbubehe fo mi?” Do ke Elijah ọkọdọhọ ete, ‘Kpukpru owo ẹkpọn̄ fi, ami ikpọn̄ nsụhọ.’ Jehovah ama enen̄ede enye ke ima ete, ‘Owo tọsịn itiaba do ke Israel emi ẹtuakde ibuot ẹnọ mi.’ Jehovah ama ọdọhọ Elijah ọnyọn̄ ufọk ke imenyene ediwak utom inọ enye.

Afo ekere ke nso ke mbụk Elijah emi ekpep nnyịn?— Mbụk emi owụt ke idem mbon emi ẹnamde n̄kpọ Jehovah ẹsikop ndịk ndusụk ini. Mmọdo, akpana kpukpru nnyịn, edide idi ikpọ owo m̀mê nditọwọn̄ ibịne Jehovah ikoyom un̄wam. Bible ọdọhọ ete: “Jehovah emekpere kpukpru mbon oro ẹsemede ẹkot enye.”

N̄kpọ en̄wen emi ikpepde edi nte ke imenyene nditọete iren ye iban ke ofụri ererimbot emi ẹmade Jehovah, ẹnyụn̄ ẹmade nnyịn n̄ko. Bible ọdọhọ ete, ‘Ofụri nditọete nnyịn ke ererimbot ke ẹsobo ukem ndutụhọ emi.’ Ndi esịt inemke fi ndifiọk ke udịghe ikpọn̄?—

Kot ke Bible fo

1 Ndidem 19:3-18

Deuteronomy 5:1-22

Psalm 145:18

1 Peter 5:9

[Ikọ Idakisọn̄]