Mme Andikot N̄wed Nnyịn Ẹbụp Ẹte . . .

Ndi Nsinsi Uwem ke Paradise Eyefek Owo?

▪ Bible ọdọhọ ke mme owo ẹyedu uwem ke nsinsi ke Paradise ke isọn̄ emi. (Psalm 37:29; Luke 23:43) Ndi ndidu uwem ke nsinsi ke ebiet emi ọfọnde ama idifekke owo?

Ata eti mbụme edi emi. Mme anam-ndụn̄ọde ẹdọhọ ke owo oro uwem efekde esisọp okop editịmede esịt, ọkpọsọn̄ mfụhọ, onyụn̄ ọsọp esịn idem ke mfịna. Uwem esisọp efek mbon emi mîkwe ufọn uwem m̀mê mbon emi ẹkpade mba edinam n̄kpọ kiet kpukpru usen. Ndi uwem mbon emi ẹdidude ke Paradise ẹyenyene se ọwọrọde? Ndi se ẹdinamde ke usen ke usen ayanam uwem efek owo?

Akpa n̄kpọ oro anade ifiọk edi nte ke Jehovah Abasi emi edide Andinyene Bible ọn̄wọn̄ọ ndinọ owo nsinsi uwem emi. (John 3:16; 2 Timothy 3:16) Ndien akpan edu Abasi edi ima. (1 John 4:8) Jehovah enen̄ede ama nnyịn; enye ọnọ nnyịn kpukpru nti n̄kpọ oro idade ikop inem uwem mfịn.—James 1:17.

Andibot nnyịn ọfiọk ke edieke inamde eti utom, ke iyokop inemesịt. (Psalm 139:14-16; Ecclesiastes 3:12) Mme owo iditiehe nte ukwakutom ke Paradise. Mmọ ye mbonima mmọ ẹyedia utịp utom mmọ. (Isaiah 65:22-24) Edieke ekpenyenede eti utom emi enemde fi ndinam kpukpru usen, ndi uwem okposụk efek fi?

Ti n̄ko ete ke idịghe kpukpru owo ke Jehovah Abasi ediyak ẹdụn̄ ke Paradise. Sụk mbon emi ẹkpebede Jesus Eyen esie ke enye edinọ nsinsi uwem. (John 17:3) Jesus ama enen̄ede ama ndinam uduak Ete esie ke ini enye okodude mi ke isọn̄. Enye ama ekpekpep onyụn̄ ananam owụt mme mbet esie nte ke se isinamde owo okop inemesịt ebịghi edi ndinọ owo n̄kpọ idịghe ndibọbọ. (Utom 20:35) Ke Paradise oro, mme owo ẹyema Abasi ye mbọhọidụn̄—emi edide n̄kponn̄kan ewụhọ. (Matthew 22:36-40) Kere nte odụn̄de ye mbon emi ẹmade fi ke ofụri esịt ẹnyụn̄ ẹmade utom ubọk mmọ! Ndi emekere ke eyefek fi ndidu ye utọ mbon emi?

Nso en̄wen ke ẹdinam ke Paradise? Iyenyene mbufa n̄kpọ ndikpep mban̄a Andibot nnyịn kpukpru usen. Ntaifiọk ẹkpep ata ediwak n̄kpọ ẹban̄a mme n̄kpọ emi Jehovah obotde. (Rome 1:20) Edi nnyịn ikam itọn̄ọke-tọn̄ọ kan̄a ndifiọk mme n̄kpọ emi. Ke ata ediwak isua emi ẹkebede, owo Abasi emi ekekerede Job ama odụn̄ọde se enye ọfiọkde aban̄a mme edibotn̄kpọ Abasi, ndien se enye okokụtde edi ata akpanikọ. Job ọkọdọhọ ete: “Emi edi ekpri ke otu se ubọk esie anamde, ndien se ẹkopde ẹban̄a enye ekpri didie ntem! Edi anie ekeme ndifiọk ọkpọsọn̄ obuma esie?”—Job 26:14.

Nnyịn idikemeke ndidiọn̄ọ kpukpru n̄kpọ mban̄a Jehovah Abasi ye utom ubọk esie idem ekpededi idu uwem ke nsinsi. Bible ọdọhọ ke Abasi esịn nnyịn udọn̄ ndidu uwem nsinsi ke esịt, onyụn̄ ọdọhọ n̄ko ke tutu amama ke nnyịn “[idikemeke ndifiọk] utom oro ata Abasi anamde ọtọn̄ọde ke ntọn̄ọ tutu esịm utịt.” (Ecclesiastes 3:10, 11) Ndi emekere ke eyefek fi ndikpep mbufa n̄kpọ mban̄a Andibot?

Idem idahaemi, uwem isifekke mbon emi ẹsịnde ifịk ẹn̄wam mbon en̄wen ẹnyụn̄ ẹnọ Abasi ubọn̄. Ntre, imenen̄ede inịm ke edieke isụk isịnde ifịk inam ntre, ke uwem idifekke nnyịn idahaemi m̀mê ke Paradise oro ididude ke nsinsi.

[Ebiet ẹdade ndise ẹto ke page 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)