Ndọn̄esịt Oro Ẹnọde Mbon Oro Esịt Obụn̄ọde
San̄a Kpere Abasi
Ndọn̄esịt Oro Ẹnọde Mbon Oro Esịt Obụn̄ọde
‘JEHOVAH ikemeke-keme ndima mi.’ Se mma kiet emi edide Christian emi esiwakde ndikop mfụhọ eketịn̄de edi emi. Eketie enye nte ke Jehovah ada nsannsan ọkpọn̄ imọ. Edi ndi edi akpanikọ nte ke Jehovah ada nsannsan ọkpọn̄ mme asan̄autom esie emi ẹkopde mfụhọ? David ọnọ ibọrọ emi ọnọde ndọn̄esịt ke Psalm 34:18.
David ama ọfiọk se ọkpọsọn̄ mfụhọ ekemede ndinam anam-akpanikọ asan̄autom Jehovah. Saul ama efịbe David tutu ebiere ndiwot enye, ntre David okoyoyo ke ini enye ekedide akparawa. David ama efehe aka ebiet emi enye ekerede ke Saul ididịghe idiyom imọ—oro edi, Gath, obio mme asua esie. Mme asua emi ẹma ẹmụm David, ndien akayak nsịn̄ mmọ ẹkpekewot enye mîkpekedịghe emi enye akanamde nte ibuot ebe imọ. David ama ọkọm Abasi etieti ke ndikanyan̄a imọ, ndien n̄kpọ emi akanam enye ewet Psalm 34.
Ndi David ama ekere ke Abasi ikpereke mbon ukụt emi ẹfụhọde mîdịghe ekere ke Abasi ikereke iban̄a mmọ? David ekewet ete: “Jehovah emekpere mmọ eke esịt obụn̄ọde; Enye onyụn̄ anyan̄a mmọ eke spirit mmọ anuahade.” (Ufan̄ikọ 18) Ẹyak ise nte ikọ esie emi ọnọde ndọn̄esịt ye idotenyịn.
‘Jehovah ekpere.’ N̄wed kiet ọdọhọ ke ikọ emi ọwọrọ ke “Ọbọn̄ esikpeme onyụn̄ ese nnyịn enyịn, ndien ke enye esiben̄e idem kpukpru ini ndin̄wam nnyụn̄ nnyan̄a ikọt esie.” Edi ata n̄kpọ ndọn̄esịt ndifiọk nte ke Jehovah esikpeme ikọt esie. Enye okụt kpukpru se iwọrọde mmọ ke “ndiọkeyo” emi onyụn̄ ọfiọk nte etiede mmọ ke idem.—2 Timothy 3:1; Utom 17:27.
“Mmọ eke esịt obụn̄ọde.” Ẹma ẹdọdọhọ ke esịt obụn̄ọ owo, ndusụk owo ẹsikere ke anaedi owo ima esie ọkpọn̄ enye. Edi idịghe utọ edibụn̄ esịt enye emi ke andiwet psalm eketịn̄ aban̄a. Ataifiọk kiet ọdọhọ ke enye eketịn̄ aban̄a esịt ndibụn̄ọ owo ke ntak n̄kpọ en̄wen. Emi edi akpanikọ koro mme anam-akpanikọ asan̄autom Abasi ẹsikam ẹkụt ukụt emi anamde esịt obụn̄ọ mmọ ndusụk ini.
“Mmọ eke spirit mmọ anuahade.” Mbon emi ẹsinen̄erede ẹkop mfụhọ ẹkeme ndikere ke mmimọ iwọrọke n̄kpọ ndomokiet onyụn̄ etie mmọ ndusụk ini nte ke eke mmimọ okụre. N̄wed kiet emi mme akabade Bible ẹsidade ẹnam utom ọdọhọ ke ẹkeme n̄ko ndikabade ikọ emi nte “mbon emi mînyeneke idotenyịn.”
Jehovah esinam didie n̄kpọ ye “mmọ eke esịt obụn̄ọde,” emi “spirit mmọ anuahade”? Ndi enye esida nsannsan ọkpọn̄ mmọ, ekere ke idịghe utọ mme owo emi ke imọ ikpama inyụn̄ ikpeme? Baba! Jehovah esisan̄a ekpere mme asan̄autom esie emi ẹsemede ẹyom un̄wam esie kpa nte edima ete esinamde ke ini n̄kpọ etịbede ọnọ eyen esie. Esinen̄ede ọdọn̄ Jehovah ndidọn̄ utọ mbon emi esịt nnyụn̄ nsọn̄ọ mmọ idem. Enye esinọ mmọ ọniọn̄ ye ukeme ndiyọ idomo ekededi emi esịmde mmọ.—2 Corinth 4:7; James 1:5.
Yom usụn̄ fiọk nte ekpekemede ndisan̄a n̄kpere Jehovah. Abasi mbọm nnyịn ọn̄wọn̄ọ ọnọ nnyịn ete: “Ami ndụn̄ . . . ye owo emi ẹnuakde onyụn̄ ofụhọde, man ndemede spirit mme usụhọde owo nnyụn̄ ndemede esịt mbon oro ẹnuakde.”—Isaiah 57:15.
Itie Bible emi okpokotde ke June: