Kpep N̄kpọ To Ikọ Abasi

Akpasan̄a Didie Ọfiọk Ido Ukpono Akpanikọ?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ndi ido ukpono akpanikọ kiet kpọt odu?

Jesus ekekpep mme anditiene enye ete ke ido ukpono akpanikọ kiet kpọt odu ndien ke enye edi usụn̄ emi adade aka uwem. Jesus ọkọdọhọ ke mme andikụt usụn̄ emi iwakke. (Matthew 7:14) Mbon oro ẹkponode Abasi nte Bible etemede ke Abasi enyịme. Ata mme andituak ibuot nnọ Abasi ẹkpep n̄kpọ kiet.—Kot John 4:23, 24; 14:6; Ephesus 4:4, 5.

2. Ntak emi ata ediwak ufọkabasi ẹdọhọde ke idi mme Christian?

Mme prọfet nsu ẹbiat Ido Ukpono Christ ẹnyụn̄ ẹda enye ẹnam udia. Ndien nte Jesus ama eketetịn̄, mmọ ẹnam nte idi erọn̄ esie edi ẹbiet mme wolf emi ẹyomde se ẹtade. (Matthew 7:13-15, 21, 23) Mme owo ẹkebiat Ido Ukpono Christ ke mme apostle Jesus ẹma ẹkekpan̄a.—Kot Utom 20:29, 30.

3. Nso idi ndusụk n̄kpọ oro ẹdade ẹdiọn̄ọ ido ukpono akpanikọ?

Ata mme andituak ibuot nnọ Abasi ẹkpono ẹnyụn̄ ẹda Bible nte Ikọ Abasi. Mmọ ẹdomo ndida mme edumbet Bible ndu uwem. Ntre, ido ukpono akpanikọ isikpepke ekikere owo. (Matthew 15:7-9) Mmọ isidịghe ẹma ẹtịn̄ ikọ kiet, ẹnam n̄kpọ en̄wen.—Kot John 17:17; 2 Timothy 3:16, 17.

Ido ukpono akpanikọ ẹkpono enyịn̄ Jehovah. Jesus ama anam ẹdiọn̄ọ enyịn̄ Abasi. Enye ama an̄wam mme owo ẹfiọk Abasi onyụn̄ ekpep mmọ ndibọn̄ akam nte ẹnam enyịn̄ Abasi asana. (Matthew 6:9) Ewe ido ukpono ẹsinen̄ede ẹkot ẹnyụn̄ ẹtịn̄ ẹban̄a enyịn̄ Abasi ke edem mbufo?—Kot John 17:26; Rome 10:13, 14.

 4. Akpasan̄a didie ọfiọk ata mme andituak ibuot nnọ Abasi?

Ata mme Christian ẹkwọrọ etop Obio Ubọn̄ Abasi. Abasi okosio Jesus ọdọn̄ ete edikwọrọ etop Obio Ubọn̄ imọ. Obio Ubọn̄ Abasi edi n̄kukụre idotenyịn ubonowo. Jesus ama aka iso ọkwọrọ etop Obio Ubọn̄ emi tutu esịm usen n̄kpa esie. (Luke 4:43; 8:1; 23:42, 43) Enye ọkọdọhọ mme mbet esie ete ẹkwọrọ etop Obio Ubọn̄ Abasi. Edieke owo akpawahade edem mbufo editịn̄ n̄kpọ aban̄a Obio Ubọn̄ Abasi, ekpekere ke enye aka ewe ido ukpono?—Kot Matthew 10:7; 24:14.

Mme anditiene Jesus idịghe ubak idiọk ererimbot emi. Mmọ isisịnke idem ke mbre ukara m̀mê ke ekọn̄. (John 17:16) Mmọ inyụn̄ itieneke idu ndiọi uwem idiọk ererimbot emi.—Kot James 1:27; 4:4.

5. Nso ke ẹnen̄ede ẹda ẹdiọn̄ọ ata mme Christian?

Ata mme Christian ẹsinen̄ede ẹma kiet eken. Bible ekpep mmọ ndikpono kpukpru owo. Mmọ isitieneke in̄wana ekọn̄ nte mbon ufọkabasi eken ẹsiwakde ndinam. (Micah 4:1-4) Utu ke oro, mmọ ẹsikam ẹda ini ye inyene mmọ ẹn̄wam mme owo ẹnyụn̄ esịn udọn̄ ẹnọ mmọ.—Kot John 13:34, 35; 1 John 4:20, 21.

Ewe ido ukpono ẹda kpukpru se mmọ ẹkpepde ẹto Bible, ẹkpono enyịn̄ Abasi, ẹnyụn̄ ẹkwọrọ Obio Ubọn̄ Abasi nte n̄kukụre idotenyịn ubonowo? Ewe ido ukpono ẹnen̄ede ẹma kiet eken mînyụn̄ itieneke isịn idem ke ekọn̄. Se ikụtde owụt ke Mme Ntiense Jehovah ẹnam emi.—1 John 3:10-12.

Edieke oyomde ndifiọk n̄kpọ en̄wen, se ibuot 15 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.

[Ndise ke page 16]

“Mmọ ẹtan̄a an̄wan̄wa ẹte mmimọ imọfiọk Abasi, edi mmọ ẹkan̄ enye ke mme utom mmọ.”—Titus 1:16