Ọyọhọ Otu 130 Ẹkụre Ukpep ke Gilead

Usen Emi Ẹketiede-Tie Ẹbet

IDỊGHE se ẹtetịn̄, nditọ Ufọkn̄wed Enyọn̄-Ukpeme Ukpep Bible Eke Gilead, ọyọhọ otu 130, ẹketetie ẹbet usen ukụre ukpep mmọ. Ke Saturday, March 12, 2011, se ibede owo 8,500, emi esịnede nditọ ufọkn̄wed emi ye mme ufan ye mme ubon mmọ, ẹma ẹsop idem man ẹdụk edinam emi.

Usen emi ẹketiede-tie ẹbet mi ekedi usen nduaidem koro usen emi ke ẹdifiọk nsio nsio ebiet emi ẹdinọde nditọ ufọkn̄wed emi, emi ẹma ẹketịm ẹnọ ukpep mi, ẹka man ẹkekpep mme owo akpanikọ Bible.

‘Kpukpru Mbon Oro Ẹtiede Ẹbet Jehovah Ẹyekop Inemesịt’

Inem inem ikọ emi ọnọde ndọn̄esịt mi, emi ẹdade ẹto Isaiah 30:18, ekedi ibuotikọ utịn̄ikọ Geoffrey Jackson emi edide owo Otu Ukara Mme Ntiense Jehovah. Enye okonyụn̄ edi etieibuot okpokoro edinam oro. Enye ama anam ekpri mbubru, ọkọm nditọ ufọkn̄wed oro ke mmọ ndikesịn idem n̄kpep n̄kpọ tutu ẹkụre Ufọkn̄wed Gilead kpa ye oro mîkememke utom, onyụn̄ ọdọhọ ke ibịghike usen emi osụk enyekde mmọ idem mi ọmọn̄ ebebe. Nso ye nso ke mmọ ẹkpetie ẹbet mîdịghe ẹkpedori enyịn ẹban̄a? Enye ama osio n̄kpọ ita owụt ke Isaiah 30:18-21.

Akpa, Brọda Jackson ọkọdọhọ ete: “Ẹdori enyịn ke Jehovah oyokop akam mbufo.” Enye ama owụt mmọ se Abasi ọn̄wọn̄ọde ke Isaiah 30:19 ete: “Enye iditreke nditua fi mbọm ke ini okopde uyo eseme fo.” Brọda Jackson ọkọdọhọ ke Jehovah esikop akam nnyịn owo kiet kiet sia ikọ Hebrew emi ẹkedade ẹwet itie emi owụt ke Abasi eketịn̄ ikọ emi ọnọ owo kiet idịghe ediwak owo. “Sia Jehovah edide ete nnyịn, enye isidọhọke nnyịn ite, ‘Ntak mûkemeke ndisọn̄ idem nte owo enye eken?’ Utu ke oro, enye esitịm akpan̄ utọn̄ ọnọ owo nnyịn kiet kiet onyụn̄ ọbọrọ akam nnyịn.”

Ọyọhọ iba, Brọda Jackson ama owụt ke oyom idiọn̄ọ ke imekeme ndinyene mfịna. Enye ọkọdọhọ ete: “Jehovah idọhọke ke nnyịn idinyeneke mfịna, edi ọn̄wọn̄ọ ke iyan̄wam nnyịn.” Nte ẹwụtde ke ufan̄ikọ 20, Abasi ama ọdọhọ nditọ Israel ke ukụt ye ufịk oyoyụhọ mmọ nte uyo ye mmọn̄ ke ini emi ẹdikande mmọ ẹkụk. Edi Jehovah okosụk ododu ke mben̄eidem ndin̄wam ikọt esie. Nditọ ufọkn̄wed oro n̄ko ẹyenyene mfịna, ndien ekeme ndidi idịghe utọ mfịna emi mmọ ẹkekerede. Brọda Jackson ama adian do ete, “Edi ẹfiọk ke Jehovah oyodu ye mbufo onyụn̄ an̄wam mbufo ẹyọ kpukpru mfịna mbufo.”

Ọyọhọ ita, Brọda Jackson ama eti nditọ ufọkn̄wed oro nte ke nte ufan̄ikọ 20 ye 21 ẹwụtde, ‘ke mmọ ẹkpenyene ndidori enyịn ndibọ un̄wam, ntre yak mmọ ẹyom un̄wam.’ Enye ama ọdọhọ n̄ko ete ke akpana mme Christian mfịn ẹnen̄ede ẹkpan̄ utọn̄ ke se Jehovah adade Bible ye mme n̄wed oro ẹkọn̄ọde ke Bible etịn̄. Enye ama enen̄ede esịn udọn̄ ọnọ mmọ ete ẹsịn idem ẹkot Bible kpukpru usen, koro emi ayanyan̄a mmọ.

“Ẹyak Ndịk Jehovah Odoro Mbufo ke Idem”

Anthony Morris emi edide owo otu ukara ama anam se ikọ Bible emi “ndịk Jehovah” ọwọrọde an̄wan̄a. (2 Chronicle 19:7) Ikọ emi iwọrọke ndifehe Abasi mbak enye ediwot nnyịn, edi ọwọrọ ndinen̄ede nyom ndinam se inende nnyụn̄ nnyene ata ukpono emi ekemede ndinam idem enyek owo. Brọda Morris ọkọdọhọ nditọ ufọkn̄wed oro ete, “Ẹsan̄a ye utọ ndịk emi ẹka efakutom mbufo.” Didie ke mmọ ẹkeme ndifehe Jehovah ntre? Brọda Morris ama etịn̄ usụn̄ iba emi mmọ ẹkemede ndinam emi.

 Akpa, Brọda Morris ọkọdọhọ mmọ ẹnam se idude ke James 1:19 emi ọdọhọde ete: “Ẹsọp ndikop ikọ, ẹkûsọp nditịn̄ ikọ.” Enye ama ọdọhọ ete ke mmọ ẹkpep ediwak n̄kpọ ke ọfiọn̄ ition oro, edi ke inaha mmọ ẹda ifiọk emi ẹwụt idem ke efakutom mmọ. Enye ọkọdọhọ ete: “Kpan̄ utọn̄ kan̄a. Kpan̄ utọn̄ nọ nditọete ke esop nyụn̄ kpan̄ nọ nditọete emi ẹdade usụn̄ ke obio emi edikade; kop se mmọ ẹtịn̄de ẹnọ fi ẹban̄a obio oro ye ido obio oro. Kûyak akak fi ndidọhọ ‘mbọk ndiọn̄ọke.’ Edieke edide emenen̄ede ekpep n̄kpọ ke ufọkn̄wed emi, ka iso kpep n̄kpọ, ndien oyokụt ke emenyene ekese ndikpep.”

Ọyọhọ iba, Brọda Morris ama okot Mme N̄ke 27:21, emi ọdọhọde ete: “Ẹnịm eso utịm ẹnọ silver ẹnyụn̄ ẹnịm ikan̄ utịm ẹnọ gold; ndien itoro owo owụt se enye edide.” Enye ama anam an̄wan̄a nte ke ukem nte ẹkemede ndinam gold ye silver asana, ntre n̄ko ke itoro n̄ko ekeme ndinam nnyịn isana. Didie? Mme owo nditoro nnyịn ekeme ndinam ẹdiọn̄ọ utọ owo emi nnyịn idide. Itoro ekeme ndinam nnyịn itọn̄ọ ndikohode idem itre ndidi ufan ye Abasi, mîdịghe anam itetịm ifiọk ke Jehovah anam nnyịn idi kpukpru se idide, inyụn̄ ibiere ndinam mme ewụhọ esie. Ntre Brọda Morris ama ọdọhọ nditọ ufọkn̄wed ete ẹda itoro ekededi emi ẹtorode mmọ nte ifet ndiwụt ke mmimọ imenyene “ndịk Jehovah.”

“Ma Utom Fo”

Guy Pierce emi edide owo Otu Ukara ekeneme akpan ibuotikọ edinam emi. Ibuotikọ emi ke enyọn̄ ke enye ekeneme. Ndien enye ama anam an̄wan̄a ke ikọ oro “isụn̄utom” ọwọrọ “owo emi ẹsiode ẹdọn̄ utom.” Enye ama ọdọhọ ke mme isụn̄utom ẹwak utọ, ndien ke mmọ ẹsinyụn̄ ẹnam nsio nsio utom. Ediwak mmọ ẹkọk udọn̄ọ ẹnyụn̄ ẹyom usụn̄ ndida ukara n̄kọk mme mfịna ererimbot. Enye ama ọdọhọ mmọ ete: “Idịghe utọ isụn̄utom emi ke mbufo ẹdi.” Ntak-a?

Nditọ ufọkn̄wed emi ẹkpep ekese ẹban̄a ukọkudọn̄ọ ke Bible. Ke ini Jesus akanamde n̄kaiferi kiet eset ke n̄kpa, ete ye eka esie ẹma ẹkop “akwa idatesịt.” (Mark 5:42) Ntre n̄ko ke ekedi ye mme nnan emi Jesus akanamde ẹkụt usụn̄; mmọ ẹma ẹnen̄ede ẹdat esịt. Kiet ke otu ntak emi akanamde Christ anam mme utịben̄kpọ emi ekedi ndiwụt se imọ idinamde ke obufa ererimbot, kpa ini emi ẹdikọkde kpukpru udọn̄ọ “akwa otuowo” emi ẹdibọhọde utịt idiọk ererimbot emi. (Ediyarade 7:9, 14) Abasi ayanam idem enen̄ede ọsọn̄ kpukpru mbon mmọ emi ẹdinamde ẹset. Kere nte inemesịt edikponde!

Edi nte Brọda Pierce okosiode owụt, enyene ata akpan n̄kpọ efen emi ẹdinamde ke adianade ye ukọkudọn̄ọ, koro mbon oro Jesus akanamde udọn̄ọ okụre ẹma ẹfiak ẹdọn̄ọ nte ini akakade. Mbon emi enye akanamde ẹset ẹma ẹfiak ẹkpan̄a. Idem mme nnan emi enye akanamde ẹkụt usụn̄ ikekwe aba usụn̄ ke ẹma ẹkekpan̄a. Ukọkudọn̄ọ enye emi akam ọfọnde akan edi ukọkudọn̄ọ eke spirit emi Jesus akanamde. Utom mme isụn̄utom Gilead edi ndikọk udọn̄ọ eke spirit. Mmọ ẹn̄wam mme owo ẹtie ke emem ye Ete nnyịn eke heaven man mmọ ẹkpekeme ndidu uwem ke n̄kan eke spirit. Sụk mbon emi ẹkopde nsọn̄idem ke n̄kan̄ eke spirit ẹdinyene nsinsi uwem. Brọda Pierce ọkọdọhọ ke “ukọkudọn̄ọ eke spirit emi ada itoro ọsọk Abasi. Enye owụt ke amanam utom fo.”

N̄kpọ Ita En̄wen Emi Ẹkenemede

“Ndi Mfịn Ọyọfọn Usen?” Robert Rains emi edide owo Kọmiti N̄kọk Itieutom United States ekeneme ekemini ibuotikọ emi. Enye ama esịn udọn̄ ọnọ nditọ ufọkn̄wed emi ete ke ini emi mmọ ẹdikade mme efakutom mmọ, yak mmọ ẹkụt ẹte imanam usen kiet kiet ọfọn ke ndida ini nnam n̄kpọ nte ọfọnde, ke ndiyom un̄wam ke Ikọ Abasi ke mme ini editịmede esịt, ye ke ndiberi edem ke Jehovah nnyụn̄ nsibọn̄ akam.

“Ndi Ayanam Akani Edi Obufa?” Mark Noumair emi edide andikpep ke Gilead okobụp mbume emi ke ini enye ọkọnọde utịn̄ikọ esie. Enye ekeneme 1 John 2:7, 8, ebiet emi apostle John eketịn̄de aban̄a “akani ewụhọ” emi  onyụn̄ edide “obufa ewụhọ.” Akani ye obufa ewụhọ emi ẹdi ewụhọ emi Christ ọkọnọde mme anditiene enye ete ẹma kiet eken ke ofụri esịt, ẹnyụn̄ ẹben̄e idem ndiwa idem nnọ mmọ. (John 13:34, 35) Ewụhọ emi ekedi akani sia enen̄ede ebịghi Christ ọkọnọ mme anditiene enye ewụhọ emi; enye okonyụn̄ edi obufa sia mme Christian ẹma ẹsobo mbufa idomo emi okoyomde mmọ ẹnen̄ede ẹwụt ima ke mbufa usụn̄. Ntre n̄ko ke edi ye mme isụn̄utom. Mmọ n̄ko ẹsisobo mbufa idaha emi oyomde mmọ ẹkpep ndiwụt ima ke mbufa usụn̄. Nso idin̄wam mmọ ndinam emi?

Brọda Noumair ama ọnọ nditọ ufọkn̄wed oro item ete, “Ẹkûnam n̄kpọ emi mbufo ke idem mbufo ẹsuade.” Enye ọkọdọhọ ke edieke owo anamde se nnyịn mîmaha, ndien nnyịn n̄ko itiene enye inam n̄kpọ oro, ọwọrọ ke nnyịn inam n̄kpọ emi nnyịn isuade. Ndien emi edi ndinam idem ibak. Edi edieke iyomde mbufa usụn̄ ndiwụt owo emi ima, ọwọrọ ke imayama nte “ata un̄wana” emi ebịnde ekịm eke spirit efep.

“Biom Mbiomo.” Michael Burnett, andikpep en̄wen ke ufọkn̄wed emi, ekeneme ibuotikọ enye emi. Enye ama etịn̄ aban̄a nte mbon Africa ẹsibiomde ikpọ mbiomo. Enye ọkọdọhọ ke esidi ẹma ẹn̄wịn ekara ẹdori ke ibuot, ẹmenede mbiomo ndien ẹdori man mbiomo emi odoro ọfọn, okûbiak mmọ ibuot, mmọ ẹkpenyụn̄ ẹkeme ndisan̄a. Ntre n̄ko ke ekpedi ye mme isụn̄utom emi sia mmọ ẹyenyene ikpọ mbiomo ndibiom ke mme efakutom mmọ. Edi ẹnọ mmọ n̄kpọ emi etiede nte ekara, oro edi, ntotụn̄ọ ukpep Bible. Nte mmọ ẹnamde se ẹkekpepde mmọ, ntre ke mmọ ẹdikeme ndibiom mbiomo mmọ edifọn edifọn.

Mme Ifiọkutom ye Mme Ndụn̄ọde

Kiet ke otu usụn̄ emi ẹsinọde nditọ ufọkn̄wed emi ukpep edi ndinam mmọ ẹtiene mme esop Mme Ntiense Jehovah ke mbọhọ oro ẹnam utom ukwọrọikọ. William Samuelson, esenyịn Itieutom Emi Esede Aban̄a Mme Ufọkn̄wed Ukara Abasi, ama odụn̄ọde mme ifiọkutom emi nditọ ufọkn̄wed oro ẹkenyenede ke utom ukwọrọikọ mmọ. Ibuotikọ emi ke enye akada anam ndụn̄ọde oro: “Kûyak Ubọk Fo Ọduọk Odudu.” (Ecclesiastes 11:6) Nditọ ufọkn̄wed emi ẹma ẹnanam mme ifiọkutom mmọ ẹwụt, ndiwụt adan̄a nte mmọ ẹkesịnde idem ke utom ukwọrọikọ, ẹkwọrọde eti mbụk idem ke ubomofụm, ke mme itie unyamudia, ye ke mme ebiet efen. Mmọ ẹma ẹkwọrọ ikọ ke ufọk ke ufọk, ke leta, ye ke mme ini emi mmọ ẹnemede nneme ye mbon emi mîdịghe Mme Ntiense. Ke akpanikọ, mmọ ikọduọkke odudu, ntre mmọ ẹma ẹbọ ekese utịp.

Ekem Kenneth Stovall emi onyụn̄ anamde utom ke Gilead ama anam ndụn̄ọde ye isụn̄utom ita emi ẹnen̄erede ẹbịghi ke utom emi—oro edi, Barry Hill emi akanamde utom ke Ecuador ye Dominican Republic, Eddie Mobley emi anamde utom ke Côte d’Ivoire, ye Tab Honsberger emi akanamde utom ke Senegal, Benin ye Haiti. Mmọ ẹma ẹdiana kiet ẹneme ibuotikọ emi, “Ẹdomo Jehovah Ẹse m̀mê Mbufo Idibọhọ Uwak Edidiọn̄.” (Malachi 3:10) Ke uwụtn̄kpọ, Brọda Hill ama etịn̄ nte imọ ye n̄wan imọ ikọyọde ọkpọsọn̄ ufiop ye ntọn̄ ye edịm ke Ecuador. Ndien ke ofụri isua iba ye ubak, ke mmimọ ikesida bọket iyere mmọn̄. Edi kpa ye kpukpru emi, ke akananam mmimọ ikekereke unyọn̄ sia ikabatde utom mmimọ nte edidiọn̄ Jehovah. Enye ọkọdọhọ ke utom emi edi uwem mmimọ.

Ke utịt edinam emi, eyen ufọkn̄wed kiet ama okot leta emi otụkde owo etieti, emi nditọ ufọkn̄wed ẹkewetde ndinen̄ede n̄wụt esịtekọm mban̄a ufọkn̄wed emi. Ubak se ẹkewetde ke leta oro edi emi: “Mbuọtidem nnyịn enen̄ede okpon idahaemi akan nte ekedide, edi imọfiọk ke isụk inyenyene ekese ndinam.” Ẹma ẹnọ kpukpru nditọ ufọkn̄wed emi n̄wed itoro, ẹnyụn̄ ẹnọ mmọ ẹka nsio nsio idụt ẹkenam utom. Brọda Jackson ama eberi edinam emi ke ndidọhọ nditọ ufọkn̄wed ẹdori enyịn ke Jehovah ayan̄wam mmọ akpan akpan ke ini emi mmọ ẹsobode mfịna. Kpukpru owo ẹma ẹnyọn̄ọ ye inemesịt ye idotenyịn ke n̄kpọ ọyọfọn. Imọfiọk ke Jehovah ayada mbufa isụn̄utom emi anam ekese ke utom esie.

 [Chart/Ndise obio ke page 31]

IDAHA NDITỌ UFỌKN̄WED

Ibat idụt oro ẹtode 9

Isua emana ke ẹbaharede ukem ukem 34

Isua ifan̄ tọn̄ọ ẹkena baptism ke ẹbaharede ukem ukem 18.6

Isua oro ẹdude ke utom uyọhọ ini ke ẹbaharede ukem ukem 13.1

[Ndise obio]

(Ama oyom ndikụt nte enye enen̄erede etie, se n̄wed)

Ẹnọ nditọ ufọkn̄wed ẹka mme idụt oro ẹdude ke idak emi

IDỤT ORO ẸNỌDE MME ISỤN̄UTOM EMI ẸKA

ARGENTINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

INDONESIA

KENYA

LITHUANIA

MALAYSIA

MOZAMBIQUE

NEPAL

PAPUA NEW GUINEA

ROMANIA

SENEGAL

TANZANIA

UGANDA

ZIMBABWE

[Ndise ke page 31]

Ọyọhọ Otu 130 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.