Akpanikọ Ekeme Ndikpụhọde Uwem Fo

EKEME ndidi omokop mîdịghe edi ke ẹsu kiet ke otu nsu oro ẹyararede ke ibuotikọ emi ẹnọ fi. Edi ekeme ndisọn̄ fi ndikpọn̄ se ẹkekpepde fi akpan akpan edieke edide ebịghi ekekpep mmọ.

An̄wan̄a nnyịn se inamde etie fi ntem ke idem. Ndusụk ufọkabasi isimaha ndimen se mmọ ẹkpepde nse m̀mê ekem ye Bible. Ke ini mbon eken ẹsiyomde se ẹdade ẹfụk nsu mmọ ke ndidọhọ ke idịghe kpukpru owo ke Bible ekeme ndin̄wan̄a. Ediwak mbet Jesus ikakaha ikpọ ufọkn̄wed, edi mmọ ẹma ẹsisọp ẹmụm se Jesus ekekpepde.—Utom 4:13.

N̄ko, ekeme ndidi se inamde fi okûdụn̄ọrede se ẹkpepde fi edi koro ekere ke ndinam emi owụt ke unyeneke mbuọtidem. Edi ndi enen ndikere ke Abasi ayayat esịt edieke adade Bible, emi edide n̄wed esie, odụn̄ọde se enye oyomde fi anam? Bible akam ọdọdọhọ nnyịn itie ke idem nnyịn idụn̄ọde imọ, man “[ifiọk] uduak Abasi eke edide eti onyụn̄ enemde enye esịt onyụn̄ ọfọnde ama.”​—Rome 12:2.

Ndikpep n̄kpọ mban̄a Abasi idịghe sụk man ọdiọn̄ọ n̄kpọ, edi edi man odu eti uwem. (John 8:32) Deanne oro ikasiakde ke akpa ibuotikọ ke n̄wed emi ekpep Bible idahaemi, onyụn̄ enen̄ede ọfiọk se Bible ekpepde. Enye ọdọhọ ete: “Ini emi n̄kọtọn̄ọde ndikpep Bible ke n̄kedi ndikụt ke Bible ekeme ndin̄wan̄a owo. Idahaemi, Jehovah edidi ata ata edima Ete mi eke heaven. Mmodu uwem ndien.”

Ndi ama ekpekpep Bible ndien etie nte ke ufọn ndomokiet idụhe? Edieke edide ntre, sụk ka iso kpep. Ndidomo nditie ke ebiet emi ẹkpepde nsu ẹban̄a Abasi ndiọn̄ọ Bible onyụn̄ etie nte ndidomo ndika ebiet, edi usụn̄ emi ẹwụtde fi inenke. Ekeme ndidi ayasan̄a ke nnennen usụn̄ ke nsonso oro, edi isan̄ oro oyodorode fi edieke osopde usụn̄ tutu udiọn̄ọke aba ebiet emi okpodụkde. Edi edieke ọfiọkde nnennen usụn̄ emi okpodụkde, eyekeme ndisịm ebiet emi akade.

Ndi akpama ndidiọn̄ọ nnennen usụn̄ emi okpodụkde man ọfiọk Abasi? Imesịn udọn̄ inọ fi ite osobo ye Mme Ntiense Jehovah ke edem mbufo mîdịghe ewet n̄wed ọnọ ẹsọk nnennen adres emi odude ke page 4 ke magazine emi man ẹnọ owo edi ufọk fo edikpep fi Bible ke mfọn.

[Se ẹwetde ke ikpọ abisi ke page 9]

“[Ẹdomo] ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.”​—ROME 12:2