Kpep N̄kpọ To Ikọ Abasi

Didie ke Ibet Abasi Edi ke Ufọn Nnyịn?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi ikpokopde uyo Abasi?

Ọfọn ikop uyo Abasi sia enye okobot nnyịn. Jesus ama esikop uyo Abasi. (John 6:38; Ediyarade 4:11) Ibet Abasi anam ikeme ndiwụt m̀mê imama Abasi m̀mê imaha.—Kot 1 John 5:3.

Kpukpru ibet Jehovah Abasi ẹdi ke ufọn nnyịn. Mmọ ẹkpep nnyịn ndidu uwem oro ọfọnde akan ẹnyụn̄ ẹnam ifiọk se ikpanamde man idia nsinsi udori.—Kot Psalm 19:7, 11; Isaiah 48:17, 18.

2. Didie ke ndinịm ibet Abasi ekeme ndinam ikop nsọn̄idem?

Ndinịm ibet Abasi emi ọdọhọde ikûkpa mmịn anam ibọhọ idiọk udọn̄ọ ye mbabuat n̄kpọntịbe. Ndin̄wọn̄ mmịn mbe ubọk ekeme ndinam mmịn emehe owo onyụn̄ anam owo anam ndisịme ido. (Mme N̄ke 23:20, 29, 30) Jehovah ikpanke nnyịn ndin̄wọn̄ mmịn, edi enye iyomke nnyịn in̄wọn̄ mmịn ibe ubọk.—Kot Psalm 104:15; 1 Corinth 6:10.

Jehovah ọdọhọ ikûfịbe ufụp, ikûyat esịt ube nde, ikûnyụn̄ unyene mme idiọk edu eken emi ẹkemede ndiwot owo. Adan̄a nte imade ndinam mme item esie emi, ntre ke idikop nsọn̄idem.—Kot Mme N̄ke 14:30; 22:24, 25.

3. Didie ke ibet Abasi ekeme ndikpeme nnyịn?

Ibet Abasi akpan efịbe. (Mme Hebrew 13:4) Ebe ye n̄wan emi ẹnịmde ibet emi ẹsibọhọ ediwak afanikọn̄, ndien mmọ ye nditọ mmọ ẹsidu ke emem. Edi ndisịn efịbe esikama ata ediwak afanikọn̄ nte udọn̄ọ, usiondọ, afai, mfụhọ, ufọk ndibahade.—Kot Mme N̄ke 5:1-9.

Edieke ifepde mme n̄kpọ oro ẹkemede ndinam isịn efịbe, nnyịn iyaka iso idi ufan Abasi, idinyụn̄ inamke n̄kpọ emi afịnade mbon en̄wen.—Kot 1 Thessalonica 4:3-6.

  4. Didie ke ndida uwem ke akpan n̄kpọ edi ke ufọn nnyịn?

Mbon emi ẹdade uwem emi Abasi ọnọde nnyịn ke akpan n̄kpọ ẹsikop nsọn̄idem ke ini mmọ ẹtrede sika ye mme mbumehe eken emi mîsiyakke owo okop nsọn̄idem. (2 Corinth 7:1) Abasi ada uwem eyen emi mîmanake kan̄a ke ọsọn̄urua. (Exodus 21:22, 23) Ntre, ikpanaha mme Christian ẹsion̄o idịbi. N̄ko, mbon emi ẹdade uwem ke akpan n̄kpọ nte Abasi adade ẹsikpeme nte ẹnamde n̄kpọ ke itieutom, ke ufọk, ye ke ubomisọn̄ mmọ mbak ẹdinọ idemmọ m̀mê mbon en̄wen unan. (Deuteronomy 22:8) Mmọ isinyụn̄ ibreke mbre emi ekemede ndida owo ibuot, koro uwem edi enọ Abasi.—Kot Psalm 36:9.

5. Didie ke iyịp ndidi ọsọn̄urua n̄kpọ enyene ufọn ọnọ nnyịn?

Iyịp edi ọsọn̄urua n̄kpọ ke enyịn Abasi, sia enye ada aban̄a uwem owo ye unam. (Genesis 9:3, 4) Ibet Abasi, emi owụtde ke iyịp edi uwem, akam edi ke ufọn nnyịn. Didie? Enye anam ẹkeme ndifen mme idiọkn̄kpọ nnyịn.—Kot Leviticus 17:11-13; Mme Hebrew 9:22.

Iyịp Jesus ama enen̄ede ọsọn̄ urua koro enye ekedi mfọnmma owo. Jesus ama ayak n̄kpọ emi akadade aban̄a uwem esie ọnọ Abasi—oro edi iyịp esie. (Mme Hebrew 9:12) Iyịp emi enye ọkọduọkde anam inyene idotenyịn ndidu uwem ke nsinsi.—Kot Matthew 26:28; John 3:16.

Edieke oyomde ndifiọk n̄kpọ en̄wen, se ibuot 12 ye 13 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.