“Edisana, Edisana, Edisana Jehovah”
San̄a Kpere Abasi
“Edisana, Edisana, Edisana Jehovah”
EDIEKE ẹkpedọhọde fi ada ikọ kiet kpọt etịn̄ nte Jehovah Abasi etiede, ọkpọdọhọ didie? Ke n̄kpọ nte isua 2,800 emi ẹkebede, ẹma ẹnam prọfet Isaiah okụt n̄kukụt, ndien ke n̄kukụt emi ke enye okokop nte mme angel ẹtorode Jehovah, ẹkotde enye “edisana,” kpa ikọ emi anamde ẹfiọk nte Jehovah etiede. Se Isaiah okokụtde onyụn̄ okopde ekpenyene ndinam iten̄e Jehovah inyụn̄ isan̄a ikpere enye. Nte ikerede iban̄a se idude ke Isaiah 6:1-3, domo ndikụt se Isaiah okụtde.
Nso ke Isaiah okụt? Isaiah ọdọhọ ete: “Ami n̄kụt Jehovah etiede ke ebekpo oro okon̄de ẹnyụn̄ ẹmenerede ke enyọn̄.” (Ufan̄ikọ 1) Emi iwọrọke ke Isaiah ama enen̄ede okụt Jehovah, Akakan Ọbọn̄ Andikara, sia owo mîkemeke ndikụt spirit. Bible etịn̄ in̄wan̄-in̄wan̄ ete: “Akananam baba owo kiet ikwe Abasi.” (John 1:18) Isaiah okokụt n̄kukụt. * Edi se Isaiah okokụtde eketie nte ata idem n̄kpọ, anam enye uten̄e tutu enye anam n̄kpọ nte n̄kpọ eke enye okụtde Jehovah.
Ekem Isaiah enyene ata akwa ifet ndikụt n̄kpọ emi etiede nte owo en̄wen ndomokiet ikwe. Enye ewet ete: “Mme seraph ẹda enye [Jehovah] ke enyọn̄. Mmọ kiet kiet ẹnyene mba itiokiet. Ẹda iba ẹfụk iso, ẹda iba ẹfụk ukot, ẹnyụn̄ ẹda iba ẹfe ẹkanade.” (Ufan̄ikọ 2) Mme seraph ẹdi mme angel emi ẹnen̄erede ẹkpon itie ke heaven. Ke otu mme andiwet Bible, Isaiah ikpọn̄ etịn̄ n̄kpọ aban̄a mme seraph. Mmọ ẹsidada ke mben̄idem kpukpru ini ndinam se Abasi oyomde mmọ ẹnam. Mmọ ẹfụk iso ye ukot ndiwụt ke imokpono inyụn̄ iten̄e Enye emi mmimọ inyenede ifet ndisan̄a utom ke iso esie.
Idighe se Isaiah okụtde kpọt omụm enye uten̄e; se enye okopde etiene omụm enye uten̄e. Mme seraph emi ẹdiana kiet, ẹmenede uyo ẹkwọ ikwọ. Isaiah ewet ete: “Ndien kiet okot kiet eken onyụn̄ ọdọhọ ete: ‘Edisana, edisana, edisana Jehovah mme udịm.’” (Ufan̄ikọ 3) Ikọ Hebrew emi ẹkabarede “edisana” ọwọrọ n̄kpọ ndiden̄i. Enye ọwọrọ n̄ko “n̄kpọ ndisana nnana ndo.” Mmọ ẹkwọ ata edinem edinem ẹkot Jehovah “edisana” utịm ikata, ndiwụt ke Jehovah asana anana ndo. (Ediyarade 4:8) Emi ọwọrọ ke Jehovah asana anana mbiet.
Ndifiọk emi ekpenyene ndinam nnyịn itetịm isan̄a ikpere enye. Ntak-a? Jehovah itiehe nte mme idiọk andikara, enye asana anana ndo, inamke idiọk baba kiet. Jehovah ndidi edisana Abasi enen̄ede anam inịm ke enye ayaka iso edi eti Ete, edinen Andikara, ye Ebiereikpe emi mînamke asari. Nnyịn imenyene eti ntak ndinịm ke edisana Abasi nnyịn emi idikpụhu nnyịn tutu amama.
Itie Bible emi okpokotde ke December:
[Ikọ Idakisọn̄]
^ ikp. 4 Insight on the Scriptures ọdọhọ ete: “Ke ini Abasi anamde owo okụt n̄kukụt uwemeyo, esitie nte n̄kpọ eke enye okụtde ata idem n̄kpọ. Andikụt n̄kukụt emi esikeme nditi, nditịn̄ mban̄a m̀mê ndiwet se enye okokụtde ke ikọ idem esie.”—Mme Ntiense Jehovah ẹsio.
[Se ẹwetde ke ikpọ abisi ke page 26]
Ndifiọk ke Jehovah edi edisana Abasi ekpenyene ndinam nnyịn itetịm isan̄a ikpere enye
