Abraham​—Eren uko

Abraham ọwọn̄ọde enyịn ese ubon esie ye mme asan̄autom esie nte mmọ ẹtịmde idem ndiwọrọ n̄ka Canaan. (Genesis 12:1-5) Enye ọdiọn̄ọ ke imọ inyene ndise mban̄a kpukpru mmọ ndien ke idịghe ekpri utom edi emi. Enye edinam didie ise iban̄a mmọ ke obio owo? Ndi emi ikpakam imemke utom ke Ur, obio emi isọn̄ ọfọnde n̄kpọ, mmọn̄ onyụn̄ odude? Nso iditịbe edieke enye ọduọde udọn̄ọ mîdịghe akpade? Anie edise aban̄a ubon esie? Edieke ekededi ke otu emi afịnade Abraham, enye iyakke emi anam idem emem enye. Enye ebiere ndikop uyo Abasi inamke n̄kpọ m̀mê nso itịbe. Ntre, enye edi eren uko.

 NSO IDI UKO? Owo uko idịghe owo ufep inyụn̄ idịghe mbe. Nnyịn ndinyene uko iwọrọke ke idinyeneke ini emi ikopde ndịk. Owo Abasi emi enyenede uko esisụk ananam se anade enye anam kpa ye oro enye okopde ndịk.

DIDIE KE ABRAHAM OKOWỤT KE IMENYENE UKO? Abraham ama enyịme ndidi isio. Enye okokpon ke ebiet emi mme owo ẹkekponode ediwak abasi ye ndem. Edi enye ikabakke mmọ enyịn inyụn̄ itre ndinam se inende. Utu ke oro, Abraham ama enyene uko, enyịme ndituak ibuot nnọ Abasi kiet kpọt—kpa “Ata Edikon̄ Abasi,” Jehovah.—Genesis 14:21, 22.

Abraham ama ama Abasi akan inyene. Enye ama enyịme ndikpọn̄ inem inem uwem emi enye okodude ke Ur n̄wọrọ n̄ka wilderness, enen̄ede enyene mbuọtidem ke Jehovah eyese aban̄a mmimọ. Imọdiọn̄ọ ke nte ini akakade ke ekeme ndidi Abraham ama esiti nte mmimọ ikesidiade uwem ke Ur. Edi enye ama enen̄ede enịm ke Jehovah eyese aban̄a imọ ye ubon imọ kpukpru ini. Ndikpere Jehovah ntem nnyụn̄ nyak Jehovah edi ata akpan ufan Esie ama anam Abraham ekeme ndikop uyo Abasi.

NSO KE EMI EKPEP NNYỊN? Nnyịn imekeme ndikpebe Abraham ke ndikpep ndikop uyo Jehovah, idem ekpededi mbon en̄wen inamke oro. Ke uwụtn̄kpọ, Bible ọdọhọ ke mme ufan m̀mê mme iman ẹkeme ndikọbọ mbon oro ẹsọn̄ọde ẹda ẹnam n̄kpọ Jehovah Abasi, ẹkere ke inam eti n̄kpọ. (John 15:20) Edi edieke inen̄erede inịm se ikpepde iban̄a Jehovah, iyọsọn̄ọ ida inam mme owo ẹfiọk se inịmde ke akpanikọ ke edu ukpono.—1 Peter 3:15.

Akpana inyene mbuọtidem ke Jehovah eyese aban̄a mbon oro ẹbuọtde idem ye enye nte enye ọn̄wọn̄ọde. Utọ mbuọtidem emi ayanam ikeme ndibem iso nyom Obio Ubọn̄ Abasi utu ke inyene. (Matthew 6:33) Ẹyak ise nte ubon kiet ẹnamde emi.

Doug ye Becky ẹnyene n̄kpri nditọiren iba, edi ama ọdọn̄ mmọ ndika n̄kọkwọrọ ikọ ke idụt oro ẹnen̄erede ẹyom mme ọkwọrọ eti mbụk. Ntre, mmọ ẹma ẹnen̄ede ẹnam ndụn̄ọde ẹban̄a n̄kpọ emi, ẹbọn̄ akam ke ofụri esịt ẹnọ Abasi, ekem ẹbiere ndika. Doug ọdọhọ ete: “Ikememke utom nditan̄ n̄kpri nditọ nnyịn n̄ka ebiet emi nnyịn mîdiọn̄ọke nte n̄kpọ editiede. Edi ke ini ikosụk ikerede-kere n̄kpọ emi, ima ineme se Abraham ye Sarah ẹkenamde. Ndikere mban̄a nte mmọ ẹkebuọtde idem ye Jehovah—ye nte Enye mîkonyụn̄ ikpọn̄ke mmọ—ama enen̄ede an̄wam nnyịn.”

Kop se Doug etịn̄de mi aban̄a utom Abasi emi mmọ ẹnamde ke esenidụt: “Nnyịn imadia ata ediwak ufọn. Sia nnyịn mîyomke ikpọ n̄kpọ, nnyịn imesinyene ini inam n̄kpọ ọtọkiet nte ubon—oro edi, isan̄a kiet ikwọrọ ikọ, ineme nneme, inyụn̄ ibre mbre ye nditọ nnyịn. Uwem enen̄ede enem nnyịn idahaemi ke usụn̄ emi inua mîkemeke nditịn̄.”

Imọdiọn̄ọ ke idịghe kpukpru owo ẹdikeme ndinam emi. Edi kpukpru nnyịn imekeme ndikpebe Abraham ke ndinam n̄kpọ Abasi edi ebeiso n̄kpọ ke uwem nnyịn, inyenede mbuọtidem ke Abasi idikpọn̄ke nnyịn. Edieke inamde emi, ọwọrọ ke imanam se Bible ọdọhọde ete ‘inen̄ede inyene uko idọhọ ite: “Jehovah edi andin̄wam mi; ndifeheke ndịk.”’—Mme Hebrew 13:5, 6.

[Se ẹwetde ke ikpọ abisi ke page 7]

Owo Abasi emi enyenede uko esisụk ananam se anade enye anam kpa ye oro enye okopde ndịk

 [Ekebe/Ndise ke page 8]

Eti An̄wan Ndọ Emi Abakde Abasi

Ebe Sarah ekedi ata owo mbuọtidem. Enye Sarah n̄ko ekedi ata eti an̄wan emi ẹkpekpebede. Bible akam asiak enyịn̄ esie ofụri ikata, ete ke enye ekedi ata eti an̄wan emi iban emi ẹbakde Abasi ẹkpekpebede. (Isaiah 51:1, 2; Mme Hebrew 11:11; 1 Peter 3:3-6) Kpa ye emi Bible mîtịn̄ke ediwak n̄kpọ iban̄a enye, ekpri se ẹtịn̄de ẹban̄a enye owụt ke enye ekedi ata eti an̄wan.

Ke uwụtn̄kpọ, afo ekere ke Sarah akanam n̄kpọ didie ke ini ebe esie ọkọdọhọde enye ke Abasi ọdọhọ mmimọ ikpọn̄ Ur? Ndi enye ama ekere m̀mê m̀mọ̀n̄ ke Abasi oyom ika ye ntak emi enye ọdọhọde ika do? Ndi enye ama ekere aban̄a se mmimọ ididiade, se idisịnede, ye mme n̄kpọ ntre? Ndi enye ama ekere nte idikpọn̄de mme ufan ye mme iman, akpan akpan emi enye mîkọdiọn̄ọke ini emi enye edifiakde ikụt mmọ, ke ekpededi ayafiak okụt? Anaedi enye ama ekere mme n̄kpọ ntem. Kpa ye oro, enye ama enyịme ndisan̄a ye ebe esie, enen̄ede enyene mbuọtidem ke Jehovah ọyọdiọn̄ imọ edieke ikopde item Esie.—Utom 7:2, 3.

Ke adianade ye ndibak Abasi, Sarah ekedi ata eti an̄wan ndọ. Enye ikanyan̄ake itie ye ebe esie, edi enye ama enen̄ede ama, okpono, onyụn̄ ebere ye ebe esie ke kpukpru n̄kpọ. Nti edu emi ẹkenam enye edi ata eti an̄wan.—1 Peter 3:1-6.

Ndi enyene se ibanndọ eyomfịn ẹkemede ndikpep nto Sarah? Mma kiet emi ekerede Jill, emi ama ọkọdọ ndọ ke se ibede isua 30 ọdọhọ ete: “Se Sarah akanamde ekpep mi ndisitịn̄ ekikere mi nnọ ebe mi. Edi mmọdiọn̄ọ ke ebe mi enyene ndinam ubiere ke ufọk koro enye edi ibuot ufọk. Ke enye ama akanam ubiere, nnyene ndikụt ke mmanam se ededi oro n̄kemede man ikeme ndinam se ẹkebierede.”

Ekeme ndidi ata akpan n̄kpọ emi nnyịn ikpepde ito Sarah edi nte ke kpa ye emi enye ekedide ata ediye an̄wan, enye ikayakke uyai emi odụk enye ibuot. (Genesis 12:10-13) Edi enye ama osụhọde idem ebere ye Abraham ke ini mfọnọn̄kpọ ye ini ndiọhọn̄kpọ. Abraham ye Sarah ẹma ẹma Abasi, ẹsụhọde idem, ẹnyụn̄ ẹma kiet eken. Mmọ ẹma ẹnen̄ede ẹfọn ye kiet eken.