Ebiet Emi Adan̄a Obio Mîsịnke Ubahade

Mme Ntiense Jehovah ẹsinam ofụri se mmọ ẹkekeme mbak n̄kpọ ndomokiet edisịn ubahade ke otu mmọ. Mmọ ẹsiti ke Jesus ọkọdọhọ mme mbet esie ete: “Kpukpru mbufo ẹdi nditọete.” (Matthew 23:8) Ikụt emi ke itie iba emi Mme Ntiense ẹsisopde idem ẹkpono Abasi—kiet ke Portugal, kiet ke Spain.

OBIO Valença do Minho odu ke edem edere Portugal. Ẹma ẹsịn ibibene ukpeme ẹkanade obio emi, ndien ẹkeme ndida do n̄kụt Akpa Minho, emi abaharede Spain ye Portugal. Tui emi esịnede ke Spain odu ke edem Akpa Minho emi, ndien oyokụt akwa ufọkabasi emi etiede nte ọkpọsọn̄ ebiet ukpeme do. Ẹkebọp ibibene ukpeme Tui ye eke Valença ke ini ekọn̄ Spain ye Portugal ke n̄kpọ nte isua 400 emi ẹkebede.

Ke 1995, ẹma ẹsuan mbon oro ẹkesikpemede adan̄a Spain ye Portugal. Edi idịghe ndisuan mbon ukpeme kpọt ekeme ndinam mme idụt ẹdiana kiet. N̄kpọ en̄wen emi ekemede ndinam mmọ ẹdiana kiet edi ndikpep mmọ nditre asari. Ekpri ediye ufọk kiet ke Valença owụt nte mme owo ẹkemede ndidiana kiet. Ẹkot ufọk emi Ufọkmbono Obio Ubọn̄ Mme Ntiense Jehovah—emi Mme Ntiense ke Spain ye Portugal ẹsisopde idem ẹtuak ibuot ẹnọ Abasi.

Emi ọkọtọn̄ọ ke 2001 ke ini Mme Ntiense ke Tui ẹkeyomde ndibọp obufa Ufọkmbono Obio Ubọn̄. Mmọ ẹma ẹkpọn̄ akani ufọk emi mmọ ẹkebọde ke ukpeokụk ẹsida ẹnịm mbono esop, edi inyụn̄ inyeneke okụk ikem ndida mbọp Ufọkmbono Obio Ubọn̄ idemmọ. Sia mmọ mîkawakke, mmọ ikekemeke aba ndikpe okụk ebiet emi mmọ ẹkebọde ẹsida ẹnịm mbono esop. Ntre, mmọ ẹma ẹka ẹkebụp Mme Ntiense ke Portugal emi ẹsinịmde mbono esop mmọ ke Valença m̀mê imekeme ndisitiene mmọ nnịm mbono esop ke ufọkmbono mmọ emi mîtịmke iyom usụn̄ ikpọn̄ mmimọ ke Tui.

Eduardo Vila emi odude ke Esop Tui ke Spain ọdọhọ ete: “Ikeneme n̄kpọ emi ke mbono oro ikenịmde ke December 2001.  Ke mbono oro ama akasuana ke n̄kokụt ke Jehovah akanam nditọete nnyịn ke Portugal ẹnyịme ndin̄wam nnyịn. Mmọ ẹma ẹwa idem ẹbọp ata ediye Ufọkmbono Obio Ubọn̄, ndien ndinyịme ndibuana ufọkmbono emi ye nnyịn ama ọsọn̄ọ mbuọtidem nnyịn.”

Américo Almeida eyen Portugal emi eketienede odu ke mbono oro ọdọhọ ete: “Nnyịn ima idara nditọete nnyịn emi ẹtode Spain mi. Ima inịm ke Jehovah ọyọdiọn̄ ndutịm emi, ntre kpukpru nnyịn ima inyịme ndibuana Ufọkmbono Obio Ubọn̄ nnyịn.” Mme Ntiense ke idụt iba emi ẹnen̄ede ẹdiana kiet, inyeneke mfịna. Paolo emi otode Valença ọdọhọ ete: “Isitiehe nnyịn nte ke ito nsio nsio idụt, esitie nte idi ata nditọeka.”

Akpa n̄kpọ emi owo edikụtde ke ini enye odụkde Ufọkmbono Obio Ubọn̄ emi edi n̄kanika ibibene iba emi ẹtiede ukem ukem edi emi mîsan̄ake ukem. Ntak edi ke eyo esisọp esiere ke Spain, ntre ke ini amiade iba ke Spain, edimia kiet ke Portugal, ndien emi edi n̄kukụre n̄kpọ emi edide isio ke Ufọkmbono Obio Ubọn̄ emi. Ke ini ẹkeyomde ndidiọn̄ Ufọkmbono Obio Ubọn̄ emi, nditọete idụt iba emi ẹma ẹnen̄ede ẹdiana kiet ẹnam utom idara idara ndien Kọmiti Ubọpufọk Eke Ikpehe ke Ikpehe ke Spain ẹkese ẹban̄a utom emi. Paolo ọdọhọ ete: “Nditọete emi ẹsibọpde ufọk ẹma ẹto Spain ẹdin̄wam, ndusụk ẹketo ebiet emi oyomde usụn̄ ebe kilomita 160 ẹdi. Utom emi ama anam esop mbiba emi ẹnen̄ede ẹma kiet eken.”

 Ẹyak ise ebiet en̄wen emi adan̄a obio mîsịnke ubahade ke otu Mme Ntiense.

Ndidiana Kiet ke Ebiet Emi Mme Owo Mîdianake Kiet

Puigcerdá odu ke Spain onyụn̄ adian̄ade adan̄a ye France. Obio emi esifọn n̄kpọ etieti, enye odu ke itịghede emi ikpọ obot Pyrenees ẹkande ẹkụk. Ẹkot itịghede emi Cerdaña ndien ini kiet ko, ofụri itịghede emi ekesịne ke Spain. Edi ke ini Spain ye France ẹkedụkde ediomi emem ke 1659, Spain ẹma ẹbahade itịghede emi ẹnọ France.

Mbon France ẹsika ẹkedep n̄kpọ ke Puigcerdá, emi edide akpan obio ke itịghede emi. Ndien ọtọn̄ọde ke 1997, Mme Ntiense ke Puigcerdá ẹma ẹnyịme Mme Ntiense ke France emi ẹdian̄arede adan̄a ye mmọ ẹsida Ufọkmbono Obio Ubọn̄ mmọ ẹnịm mme mbono esop. Isua oro ke Mme Ntiense ke France ẹkekpọn̄ ebiet oro mmọ ẹkesibọde ke ukpeokụk ẹda ẹnịm mme mbono esop mmọ. Ekesida mmọ hour kiet ndiwat nsịm Ufọkmbono Obio Ubọn̄ emi ekekperede mmọ akan, ndien ke ini snow, snow ekesifofụk usụn̄.

Ke ini Mme Ntiense ke France ẹketịn̄de mfịna mmọ ẹnọ Mme Ntiense ke Spain, nditọete ke Spain ẹma ẹsọsọp ẹnyịme mmọ ẹdibuana Ufọkmbono Obio Ubọn̄ mmimọ. Prem emi edide Ntiense ke Spain ọdọhọ ete: “Kpukpru nnyịn ikenenem esịt nditọete nnyịn ke France ndidi ndibuana Ufọkmbono Obio Ubọn̄ ye nnyịn. Se ikpepde ke Bible ediwak isua idahaemi anam nnyịn inam emi. Ikebịghike ima itọn̄ọ ndibuana Ufọkmbono Obio Ubọn̄ nnyịn ye mmọ, ndien imanam oro ke isua 13 idahaemi.”

Eric emi edide ebiowo ke esop Mme Ntiense emi ke France ọdọhọ ete: “Ama enem etieti ndibuana Ufọkmbono Obio Ubọn̄ ye nditọete nnyịn ke Puigcerdá. Ke nteti nte mmọ ẹkedarade nnyịn. Mmọ ẹma ẹbon ndiye flawa ke Ufọkmbono Obio Ubọn̄ emi, ẹnyụn̄ ẹwet ẹte: ‘Ẹmedi-o, ndima nditọete nnyịn.’”

Eric aka iso ete: “Ke ima ikọkpọn̄ Ufọkmbono Obio Ubọn̄ nnyịn, mme owo ke mbọhọ nnyịn ẹkekere ke nnyịn idụhe aba. Edi mmọ ẹma ẹdikụt ke nnyịn do ke ini ẹkụtde nte isụk ikwọrọde ikọ inyụn̄ inọde mme owo ikot ite ẹdidụk mbono esop nnyịn ke Spain. Mme owo ẹsima ndidi ndidụk mbono esop nnyịn ke Spain. Ndibuana Ufọkmbono Obio Ubọn̄ ye nditọete nnyịn emi ke Spain anam inen̄ede idiana kiet. Ikesikokop ke nditọete nnyịn do ke Spain, edi akananam nnyịn isịmde do. Idahaemi imesikụt mmọ kpukpru ini, onyụn̄ etie nte imenyene owo kpa ye idụn̄ọde ke esịt esịt itịghede emi.”

 Ndi ikafịnake ndusụk mmọ ndiwọrọ n̄ka obio owo n̄kenịm mbono esop? Akanian̄wan Ntiense France kiet, emi ama ekebe isua 80 ọdọhọ ete: “Ama afịna mi ke ini n̄kokopde ke idisika Spain ikenịm mme mbono esop. Edi ikafịnake mi aba ke ini n̄kokụtde nte nditọete nnyịn do ẹdarade nnyịn ẹnyụn̄ ẹtiede ufan ufan. Emi akam etetịm owụt ke Mme Ntiense Jehovah ke ofụri ererimbot ẹdi kiet.”

Se Ikemede Ndinam Mme Owo Ẹnen̄ede Ẹdiana Kiet

Mbon oro ẹketọn̄ọde N̄ka Europe ẹkedọhọ ke “iyom mbon Europe ẹnen̄ede ẹdiana kiet.” Se ikanamde mmọ ẹsuan mbon ukpeme adan̄a obio ke Europe ke iduọk isua 1980 ye 1990 edi oro. Edi se ikpakakam in̄wamde mmọ ekpekedi ndikpep mme owo nditre asari.

Mme Ntiense Jehovah ẹnam ofụri se mmọ ẹkekeme mbak owo mmọ ndomokiet edisari asari. Mmọ ẹfiọk ke “Abasi inamke asari,” ye nte ke ọfọn ndinyene mme owo ke nsio nsio idụt. (Utom 10:34) Ke ikpọ mbono ofụri ererimbot ye ke mme Ufọkmbono Obio Ubọn̄ mmọ, mmọ ẹsikụt nte ‘ọfọnde onyụn̄ enemde nditọete ndidụn̄ ọtọkiet ke edidianakiet.’ (Psalm 133:1) Nte Mme Ntiense ke Valença ye ke Puigcerdá ẹdianade kiet ye nditọete mmọ ke mme idụt oro ẹdian̄arede adan̄a ye mmọ owụt ke ikọ itie N̄wed Abasi emi edi ofụri akpanikọ.

[Se ẹwetde ke ikpọ abisi ke page 13]

“Isitiehe nnyịn nte ke ito nsio nsio idụt, esitie nte idi ata nditọeka”

[Se ẹwetde ke ikpọ abisi ke page 14]

“Utom emi ama anam esop mbiba emi ẹnen̄ede ẹma kiet eken”

[Se ẹwetde ke ikpọ abisi ke page 15]

“Ọfọn didie onyụn̄ enem didie ntem nditọete ndidụn̄ ọtọkiet ke edidianakiet!” PSALM 133:1

[Ndise ke page 12, 13]

Ẹda ke Valença do Minho ẹsio ndise Tui ye Akpa Minho emi

[Ndise ke page 14]

Ke ẹdiọn̄ Ufọkmbono Obio Ubọn̄

[Ndise ke page 15]

Ikpọ obot Pyrenees ye itịghede Cerdaña

[Ndise ke page 15]

Mbiowo esop iba emi—kiet oto Spain, enye eken oto France—emi ẹsisopde idem ke Ufọkmbono Obio Ubọn̄ ke Puigcerdá