Ukpọhọde Inemesịt Ubon

Ke Ini Eyen Fo Eyịkde Se Enịmde ke Akpanikọ

Ediwak nditọ ẹsima ndisụk ntiene mme ete ye eka n̄ka ufọkabasi mmọ idem ke mmọ ẹma ẹkekpon. (2 Timothy 3:14) Edi ndusụk isitieneke. Nso ke akpanam edieke eyen fo ọtọn̄ọde ndiyịk se enịmde ke akpanikọ? Ibuotikọ emi owụt se Mme Ntiense Jehovah ẹsinamde.

Cora * emi edide isua 18 ọdọhọ ete: “Nyomke aba nditiene ete ye eka mi n̄ka ufọkabasi mmọ. Akak mi ndien.”

AFO emenen̄ede enịm ke ufọkabasi mbufo ẹsikpep akpanikọ, omonyụn̄ enịm ke Bible eteme owo mfọnn̄kan usụn̄ emi ẹkpedude uwem. Ntre, ọdọn̄ fi ndikpep eyen fo se afo enịmde ke akpanikọ. (Deuteronomy 6:6, 7) Edi nso ke akpanam edieke eyen fo mîmaha aba n̄kpọ Abasi nte enye okponde owo, onyụn̄ ọtọn̄ọde ndiyịk se ekekpepde enye toto ke ekpri?—Galatia 5:7.

Edieke oro etịbede, kûkere ke enyene se mûkunamke. Ekeme ndidi enyene se itịbede, nte idikụtde. Edi fiọk ete ke nte anamde n̄kpọ ye eyen fo ekeme ndinam enye afiak etiene fi okpono Abasi, mîdịghe etetre ofụri ofụri. Edieke enemede n̄kpọ emi ekọn̄ ekọn̄ ye eyen fo, emi ekeme ndida mfịna ndi, ndien ekeme ndidi udukemeke ndinam enye afiak etiene fi.—Colossae 3:21.

Akpakam ọfọn anam item apostle Paul emi ekewetde ete: “Ofụn Ọbọn̄ inyeneke ndin̄wana en̄wan, edi enyene nditie sụn̄sụn̄ ye kpukpru owo, odot ndikpep owo n̄kpọ, omụm idem akama.” (2 Timothy 2:24) Afo ekeme didie ndiwụt ke ‘imodot ndikpep owo n̄kpọ’ edieke eyen fo eyịkde se enịmde ke akpanikọ?

Dụn̄ọde Diọn̄ọ Ntak

Akpa kan̄a, domo ndidiọn̄ọ se inamde eyen fo ekere n̄kpọ ntem. Ke uwụtn̄kpọ:

▪ Ndi enye inyeneke ufan ke esop? Lenore emi edide isua 19 ọdọhọ ete: “Sia mmen̄kenyeneke ufan ke esop, mma nnam ufan ye ediwak nditọ ufọkn̄wed nnyịn, ndien emi ikayakke nsan̄a n̄kpere Abasi ke ediwak isua. Ndiọi nsan̄a ẹkenen̄ede ẹnam n̄kpọ Abasi odorode mi. N̄kpọfiọk n̄kpokodụkke nsan̄a ye mmọ.”

▪ Ndi enye edi owo o-bụt, emi mîsiyakke  enye anam mme owo ẹfiọk se inịmde ke akpanikọ? Ramón emi edide isua 23 ọdọhọ ete: “Ke ini n̄kedide eyen ufọkn̄wed, mma nsimen̄e ndinam nditọ ufọkn̄wed nnyịn ẹfiọk se nnịmde ke akpanikọ. N̄koyomke ẹkot mi ‘owo Abasi ekpatubọk.’ Nditọ ufọkn̄wed nnyịn ikesimaha owo ekededi emi mîdụhe uwem nte mmọ, ndien n̄koyomke mmọ ẹsua mi.”

▪ Ndi enye esikere ke imọ idikemeke ndidu uwem nte ata Christian okpodude? Renee emi edide isua 16 ọdọhọ ete: “Esitie mi nte ke nsinsi uwem oro Abasi ọn̄wọn̄ọde ke Bible odoro ke enyọn̄ utan̄, ndien nnyeneke eberi ndida ndọk, nnyụn̄ n̄kam ndaha-da n̄kpere utan̄ oro. N̄ko ndịk edidọk eberi emi anam mi tutu n̄kere m̀mê n̄kpetetre ndinam n̄kpọ Abasi.”

Neme ye Enye

Afo ekere ke nso inam eyen fo ọtọn̄ọ ndiyịk se enịmde ke akpanikọ? Okpoyom ndifiọk ibọrọ, bụp enye. Edi kûyak nneme oro ada utọk edi. Utu ke oro, nam se Bible etemede mi ke James 1:19 ete: “Ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” Nyene ime. Ukem nte akpanamde ye owo en̄wen, “da anyanime ye usọ unọ ukpep” n̄wam eyen fo.—2 Timothy 4:2.

Ke uwụtn̄kpọ, edieke eyen fo etrede ndidụk mme mbono esop, domo ndifiọk m̀mê enyene n̄kpọ efen emi afịnade enye. Bụp enye sụn̄sụn̄. Edieke anamde nte ete emi iyomde nditịn̄ mi, udukwe unen.

Eyen: Idọn̄ke mi aba ndisika mbono esop.

Ete: [ekọn̄ ekọn̄] Idọn̄ke fi aba ndisika mbono esop ọwọrọ didie?

Eyen: Esibababa mi ibifịk!

Ete: Ọwọrọ Abasi ababa fi ibifịk, n̄kọ ntre? Utọ ikọ oro ọdiọk etieti. Kpan̄ utọn̄, adan̄a nte odụn̄de ke ufọk emi, ana etiene nnyịn aka mbono esop, amama ye mûmaha-ma!

Abasi oyom mme ete ye eka ẹkpep nditọ mmọ n̄kpọ ẹban̄a imọ, enye onyụn̄ oyom nditọ ẹkop uyo mme ete ye eka mmọ. (Ephesus 6:1) Edi afo uyomke eyen fo onyụn̄ etiene fi ntre nnan nnan anam n̄kpọ Abasi onyụn̄ odụk mme mbono esop mmen̄e mmen̄e. Oyom enye anam emi ke ofụri esịt.

Se idin̄wamde fi edi ndifiọk se inamde enye ọtọn̄ọ ndiyịk se enịmde ke akpanikọ. Man ekeme ndinam emi, se nte ẹkpenemede nneme enyọn̄ oro mi.

Eyen: Idọn̄ke mi aba ndisika mbono esop.

Ete: [sụn̄sụn̄] Ntak mîdọn̄ke fi-e?

Eyen: Esibababa mi ibifịk!

Ete: Eyen mi, imemke utom ndisụhọde ntie ntre ofụri hour iba. Edi, nso isinen̄ede inam enye ababa fi ibifịk?

Eyen: Papa ndiọn̄ọke. Se ndiọn̄ọde edi ke esitie nte n̄kpaka n̄kpọ en̄wen.

Ete: Ndi mme ufan fo ẹkere ntre n̄ko?

Eyen: Se ikam idide mfịna edi oro. Nnyeneke aba ufan ndomokiet. Tọn̄ọ akpan ufan mi ọkọkpọn̄ obio emi, nnyeneke owo ndomokiet ndida nneme nneme. Kpukpru owo ẹnyene ufan, edi ami nnyeneke.

Omokụt ke nte ete eyen emi obụpde eyen esie mbụme anam enye ọfiọk se ifịnade eyen esie—oro edi, ndobo—onyụn̄ anam eyen oro enen̄ede ọbuọt idem ye ete esie  onyụn̄ ekeme ndisineme nneme ye ete esie.—Mbọk se ekebe oro,  “Nyene Ime!”

Nte ini akade, ediwak uyen ẹsidi ẹdifiọk ke edieke mmimọ ikande mme mfịna oro ọbiọn̄ọde mmimọ ndinam n̄kpọ Abasi, ke esịt esinem mmimọ, ndien ke emi esinọ mmimọ uko ndisọn̄ọ nda nnọ se mmimọ inịmde ke akpanikọ. Kere ban̄a Ramón emi iketịn̄de iban̄a, emi ndịk mîkesiyakke enye anam mme owo ẹdiọn̄ọ ke idi Christian ke ufọkn̄wed. Nte ini akakade, Ramón ama edikụt ke ndinam mme owo ẹfiọk se inịmde ke akpanikọ inen̄ekede isọn̄ nte imọ ikekerede, idem ke ini nditọ ufọkn̄wed mmọ ẹsakde enye. Kop se enye etịn̄de mi:

“Usen kiet, eyen ufọkn̄wed nnyịn ama asak mi ke ntak emi ndide Ntiense. Idem ama enyek mi akpan akpan emi edide ofụri nditọ ubet ukpepn̄kpọ nnyịn ke ẹkese. Ekem mma mbiere ndibụp enye n̄ko mban̄a ufọkabasi esie. Idem ama akpa mi ndikụt nte idem akam enyekde enye akan mi. Do ke n̄kọfiọk ke ediwak uyen ifiọkke se mmọ ẹnịmde ke akpanikọ. Okịm akam ọfọn sia mmekeme nditịn̄ se nnịmde ke akpanikọ nnọ owo. Ke nditịm ntịn̄, bụt ekpesikam anam mmọ, idịghe ami.”

NAM EMI ISE: Nam eyen fo etịn̄ se enye ekerede aban̄a edidi Christian. Yak enye etịn̄ ufọn oro enye ọbọde ke ndidi Christian, ye mme mfịna oro enye osobode. Bụp enye m̀mê ewe okpon akan—ufọn oro enye ọbọde m̀mê mfịna oro enye osobode? Edieke enye ọdọhọde ke ufọn oro ibọde okpon akan, dọhọ enye etịn̄ ọnọ fi ise. (Mark 10:29, 30) Emekeme ndidọhọ enye ewet ufọn oro enye ọbọde ke n̄kan̄ kiet ke n̄wed, ewet mfịna oro enye osobode ke n̄kan̄ eken. Emi ekeme ndin̄wam enye ọfiọk mme mfịna esie ye se enye akpanamde man akan mmọ.

Nte Eyen Fo ‘Esikerede N̄kpọ’

Mme ete ye eka ye ntaifiọk ẹdiọn̄ọ ke nte ikpọ nditọ ẹsikerede n̄kpọ enen̄ede okpụhọde ye nte n̄kpri nditọ ẹsikerede. (1 Corinth 13:11) N̄kpri nditọ ẹsisọp ẹnịm se ẹkpepde mmọ, ibụpke mbụme, edi ikpọ nditọ ẹsisọp ẹbụp mbụme. Ke uwụtn̄kpọ, emekeme ndikpep eyenọwọn̄ ke Abasi okobot kpukpru n̄kpọ. (Genesis 1:1) Edi ekeme ndiyom anam ndusụk n̄kpọ afiak an̄wan̄a eyen oro ama akamana okpon. Enye ekeme ndikere m̀mê idem Abasi emi ẹtịn̄de ẹban̄a mi akam odu. Edieke Abasi odude onyụn̄ amade nnyịn, ntak emi enye ayakde nnyịn ibọ ufen? Didie ke Abasi ekeme ndidu edi inyeneke ntọn̄ọ?—Psalm 90:2.

 Edieke eyen fo obụpde fi utọ mbụme emi, emekeme ndikere ke enye ọtọn̄ọ ndifiak edem. Edi ke nditịm ntịn̄, utọ mbụme oro akam owụt ke enye oyom ndinen̄ede nsan̄a n̄kpere Abasi. Idem n̄kpọ, n̄kọ mbụme edi kiet ke otu n̄kpọ emi ẹsidade ẹdiọn̄ọ nte Christian anamde n̄kọri.—Utom 17:2, 3.

Ke adianade do, eyen fo ke ekpep ‘ndikere n̄kpọ’ nte ọfọnde. (Rome 12:1, 2) Emi ayanam enye ọfiọk “ọyọhọ ọyọhọ se idide ubom ye uniọn̄ ye ukon̄ ye utụn̄ọ” ukpepn̄kpọ Christian akan nte enye ọkọfiọkde ke ini enye ekedide eyenọwọn̄. (Ephesus 3:18) Idaha emi enye osụk okponde owo mi ke ekpenen̄ede an̄wam enye ekere aban̄a se enye enịmde ke akpanikọ man enye enen̄ede ọfiọk ke se inịmde edi akpanikọ.—Mme N̄ke 14:15; Utom 17:11.

NAM EMI ISE: Fiak keneme n̄kpri n̄kpọ emi afo ye eyen fo mîkadaha ke akpan n̄kpọ. Ke uwụtn̄kpọ, dọhọ enye ekere aban̄a mme utọ mbụme ntem: ‘Nso inam mi nnịm ke Abasi do? Nso ke ami n̄kụt emi owụtde ke Abasi ekere aban̄a mi? Nso inam mi nnịm ke ndinịm ibet Abasi edisụk idi ke ufọn mi?’ Mbọk kûdomo ndinam eyen fo etịn̄ se afo ekerede, edi kam yak enye etịn̄ se enye ekerede. Emi ayanam enye ọfiọk ke se imọ inịmde edi akpanikọ.

‘Kpek Enye Enịm’

Akparawa kiet emi ekerede Timothy ọkọfiọk edisana N̄wed Abasi “toto ke nsek.” Kpa ye emi, apostle Paul ọkọdọhọ enye ete: “Ka iso ke se afo ekekpepde, ẹkenyụn̄ ẹkpekde fi enịm ke akpanikọ.” (2 Timothy 3:14, 15) Ekeme ndidi ọkọtọn̄ọ ke ekpri ekpep eyen fo Bible. Edi ke emi enye ama okokpon mi, afo ekpenyene ndidian mbukpek man enye ekeme ndifiọk ke idemesie ke se ekekpepde enye edi akpanikọ.

Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 1, ọdọhọ ete: “Adan̄a ini nte eyen fo osụk odụn̄de ke ufọk fo, emenyene unen ndinam enye etiene fi atuak ibuot ọnọ Abasi. Edi afo akam oyom enye ama Abasi ke esịt esie—idịghe ndinam n̄kpọ Abasi sia onyụn̄ ọdọhọde enye anam.” Edieke anamde ntem, eyen fo ‘ọyọsọn̄ọ ada ke mbuọtidem’ onyụn̄ odu uwem nte Bible etemede, idịghe nte afo etemede. *—1 Peter 5:9.

[Mme Ikọ Idakisọn̄]

BỤP IDEMFO ETE . . .

▪ Didie ke nsinam n̄kpọ ke ini eyen mi eyịkde se nnịmde ke akpanikọ?

▪ Didie ke ibuotikọ emi ekeme ndin̄wam mi ndiọn̄ọ se n̄kpanamde edieke emi etịbede?

[Ekebe ke page 19]

Ndi Ẹbian̄a Fi?

Nsu: Mme owo ẹdọhọ ke Mme Ntiense Jehovah ẹsikpakpak nditọ mmọ ẹmen ẹka ido ukpono mmọ.

Akpanikọ: Mme Ntiense Jehovah ẹsidomo ndin̄wam nditọ mmọ ẹma Abasi nte Bible ọdọhọde mme ete ẹnam. (Ephesus 6:4) Edi mmọ ẹfiọk ke ini eyen mmimọ okponde owo, ke enye enyene ndibiere nte idituakde ibuot inọ Abasi.—Rome 14:12; Galatia 6:5.

[Ekebe/Ndise ke page 20]

Nyene Ime!

 Ndineme nneme ye eyen fo emi ama okokpon owo enen̄ede oyom ime. Edi ndinam emi ayada akakan ufọn edi—oro edi, anam enye ọbuọt idem ke afo. N̄kaiferi kiet ọdọhọ ete: “Mma ntịn̄ nnọ ete mi mbubreyo usen kiet nte ke mmenyene ufan erenowo, nsinyụn̄ ndịbe nneme nneme ye mme owo ke Intanet, ye nte ke mma nduak ndifehe n̄kpọn̄ ufọk. Ete mi ama enyene ime, iyatke esịt ndomo esisịt tutu ineme nneme oro ikụre. Ndiọn̄ọke m̀mê odu ete en̄wen emi ekpenyenede utọ ime oro, etie okop adiaha esie ọdọhọde ke ima itịm erenowo inua, isinyụn̄ inọ enye etop ke fon kpukpru minit, ndien enye iyatke esịt isio n̄kpo. Nte ete mi akanamde n̄kpọ usen oro anam n̄keme nditịn̄ se ededi nnọ enye. Mmokụt ke enye enen̄ede oyom ndin̄wam mi.”

[Ekebe ke page 21]

Ufọn Edinyene Akwaowo Oro An̄wamde

Ndusụk ini, akwa owo emi mîdịghe iman mbufo ekeme ndisịn udọn̄ nnọ eyen fo. Ndi ọmọfiọk owo emi enen̄erede ọsọn̄ idem ke n̄kan̄ eke spirit, emi ekpekemede ndin̄wam eyen fo? Ntak emi mûdiomike man enye esidu ye eyen fo? Emi iwọrọke ke amasana utom fo ayak ọnọ owo en̄wen. Edi kere ban̄a Timothy. Enye ama enen̄ede ọbọ ufọn oto uwụtn̄kpọ apostle Paul, ndien Paul ama onyụn̄ enen̄ede ọbọ ufọn ndisan̄a kiet ye Timothy nnam utom.—Philippi 2:20, 22. *

[Ikọ Idakisọn̄]