Kpep Nditọ Fo

“Enye Ama Ọsọn̄ọ Eyịre ye Jehovah”

NDI akanam ẹdọhọ fi ọsọn̄ọ eyịre ke n̄kpọ?— * Emi ọwọrọ ndida n̄kpọ oro ke akpan n̄kpọ. Yak ineme iban̄a owo emi Bible ọdọhọde ke “enye ama ọsọn̄ọ eyịre ye Jehovah,” ata Abasi. Owo oro ekere Hezekiah. Yak ise se ikemede ndikpep nto enye.

N̄kpọ iketịmke ifọn ye Hezekiah ke ini enye ekedide ekpri. Ahaz ete esie emi ekedide edidem Judah ama etre ndituak ibuot nnọ Jehovah. Ahaz akada iso ke ukpono ndem ke ini Hezekiah ekedide ekpri. Ahaz ama akam owot eyen esie—eyeneka Hezekiah—ọfọp ke ikan̄ nte uwa ọnọ ndem emi!

Kpa ye oro Ahaz akakade iso anam idiọk n̄kpọ, Hezekiah ama okop uyo Jehovah. Ndi emekere ke emi ama emem utom ọnọ enye?— Ekeme ndidi ikememke. Edi Hezekiah iketreke ndikop uyo nnọ Abasi. Yak ikpep se ikan̄wamde enye ọsọn̄ọ eyịre ye Jehovah, inyụn̄ ise nte ikemede ndisọn̄ọ nyịre ye Abasi mfịn.

Hezekiah ama ekpep aban̄a mbon en̄wen emi ẹkesọn̄ọde ẹyịre ye Jehovah. David ekedi kiet ke otu mmọ. Kpa ye oro David okodude uwem ata ediwak isua mbemiso Hezekiah, enye ama esikpep aban̄a David ke N̄wed Abasi. David ama ewet ete: “Edieke ete mi ye eka mi ẹkpekpọn̄de mi, Jehovah ekpemen mi akama.”

Ndi ọmọfiọk se ikan̄wamde David okop uyo Jehovah?— Mbuọtidem akan̄wam enye! Enye ama etịm enịm ke akpanikọ nte ke edieke  imọ ikopde uyo Jehovah Abasi, ke enye ayan̄wam imọ. David ama enen̄ede enịm emi ke akpanikọ! Ndikere mban̄a David ama an̄wam Hezekiah ọsọn̄ọ eyịre ye Jehovah onyụn̄ okop uyo esie. Jehovah ayan̄wam fi n̄ko edieke ọsọn̄ọde eyịre ye enye onyụn̄ okopde uyo esie.

Edi nso ke akpanam edieke ete m̀mê eka fi mîtuakke ibuot inọ Jehovah?— Abasi ọdọhọ nditọ ẹkop uyo mme ete ye eka mmọ. Ntem ana afo okop uyo ete ye eka fo. Edi edieke ete ye eka fo ẹdọhọde fi anam n̄kpọ oro Abasi ọdọhọde mme owo ẹkûnam, ana afo etịn̄ ọnọ mmọ ntak emi afo mûkemeke ndinam oro. Inaha afo osu nsu, eyịp inọ, m̀mê anam n̄kpọ en̄wen oro Abasi ọdọhọde ke ifọnke, inamke n̄kpọ m̀mê anie ọdọhọ fi anam. Ana afo okop uyo Abasi!

Odu nti owo emi anade ikpebe. Idịghe David ikpọn̄ ke Hezekiah ekekpebe. Jotham ete ete esie ekedi eti owo n̄ko. Kpa ye oro Jotham akakpade mbemiso Hezekiah amana, enye ama ekpep n̄kpọ aban̄a Jotham, kpa nte nnyịn isikpepde n̄ko ke Bible nnyịn mfịn. Ndi ọmọfiọk mbon en̄wen emi ikpekpebede nti uwụtn̄kpọ mmọ?—

Edi akpanikọ nte ke Bible etịn̄ ndusụk ndudue emi Hezekiah, David, Jotham, ye mbon efen ẹkenamde. Edi mmọ ẹma ẹma Jehovah, ẹnyịme mme ndudue mmọ, ẹnyụn̄ ẹdomo ndinam se inende. Ti ete ke Jesus Eyen Abasi ikpọn̄-ikpọn̄ ọkọfọn ama. Yak inen̄ede ikpep iban̄a enye inyụn̄ itiene uwụtn̄kpọ esie.

Kot ke Bible fo

2 Ndidem 18:6; 2 Chronicle 28:1-3

Psalm 27:10; Ephesus 6:1; Colossae 3:20

2 Chronicle 27:1, 2; 1 Peter 2:21

[Ikọ Idakisọn̄]