‘Idịghe Ubak Ererimbot’

“Ererimbot amasua mmọ, koro mmọ mîdịghe ubak ererimbot, kpa nte ami mmendịghe ubak ererimbot.”—JOHN 17:14.

Se Emi Ọwọrọde: Sia Jesus mîkedịghe ubak ererimbot, enye iketieneke ibuana ke mme mbubehe ukara ye obio. Enye ọkọdọhọ ete: “Obio ubọn̄ mi idịghe ubak ererimbot emi. Edieke obio ubọn̄ mi ekpedide ubak ererimbot emi, mme asan̄autom mi ẹkpen̄wana mbak ẹdiyak mi ẹsịn mme Jew ke ubọk. Edi, obio ubọn̄ mi itoho ebiet emi.” (John 18:36) Enye ama ọdọhọ mme mbet esie n̄ko ete ẹtre mme edu emi Ikọ Abasi akpande.—Matthew 20:25-27.

Nte Mme Akpa Christian Ẹkenamde Emi: Jonathan Dymond, emi esiwetde n̄kpọ aban̄a ido ukpono, ekewet ete ke mme akpa Christian “iketieneke in̄wana [ekọn̄]; inamke n̄kpọ m̀mê nso ikedi utịp, edide esuene, m̀mê n̄kpọkọbi, m̀mê n̄kpa.” Mmọ ẹma ẹmek ndibọ ufen utu ke ndin̄wana ekọn̄. Edu uwem mmọ n̄ko ama owụt ke mmọ ẹkedi isio. Ẹkedọhọ mme Christian ẹte: “Sia mbufo mîsan̄ake aba ye mmọ ke usụn̄ emi idụk ukem okpụk etịme etịme uwem oro, idem akpa mmọ, mmọ ẹnyụn̄ ẹka iso ẹsụn̄i mbufo.” (1 Peter 4:4) Ewetmbụk oro Will Durant ama ewet ete ke “mme Christian ke ẹkenọ oyom-inemesịt ererimbot mme okpono ndem oro afanikọn̄ ebe ke mbak-Abasi mmọ ye edisana uwem mmọ.”

Mmanie Ẹnam Emi Mfịn? New Catholic Encyclopedia ọdọhọ ke ọdiọk Christian “nditre ndika ekọn̄.” Ibuotikọ kiet ke magazine Reformierte Presse ọdọhọ ke N̄ka Unen Mbon Africa ekewet aban̄a ofụri orụk oro ẹkewotde ke Rwanda nte ke kpukpru ufọkabasi ẹma ẹtiene ẹbuana “ke ẹsiode Mme Ntiense Jehovah ẹfep.”

Ke ini andikpep akamba ufọkn̄wed kiet ekekpepde aban̄a nte mbon Nazi ẹkesobode mme Jew, enye ama eseme nte ke “idụhe otu m̀mê n̄ka emi ẹkeyatde esịt ẹban̄a akpakịp nsu, ibak, ye uwotowo oro.” Edi ke ama ekese se idude ke Itie Ubon N̄kpọeset United States, emi ẹbonde n̄kpọ emi ẹban̄ade nsobo mme Jew oro, enye ekewet ete: “Mmedifiọk ndien akpanikọ.” Enye ama edifiọk nte ke Mme Ntiense Jehovah ẹma ẹsọn̄ọ ẹda kpa ye oro ẹkefiomode mmọ idiọk idiọk.

Edu uwem mmọ ndien-e? Magazine U.S. Catholic ọdọhọ ete: “Mfịn ediwak n̄kparawa owo ke Catholic imaha se ufọkabasi ọdọhọde ete yak owo iba okûdụn̄ ọtọkiet mbemiso ẹdọde ndọ, ẹkûnyụn̄ ẹnyene ebuana idan̄.” Magazine oro obụk nte deacon ufọkabasi kiet ọkọdọhọde ete: “Ata ediwak owo—n̄kpọ nte mbahade iba ke otu mbon oro ẹdide ndinam ndọ—ẹma ẹdodụn̄ ọtọkiet mbemiso ẹdọde ndọ.” The New Encyclopædia Britannica ọdọhọ ke Mme Ntiense Jehovah “ẹdu uwem nte Bible etemede.”