Ndi Ọdiọk Ndibụp Ekpo?

Toto ke uyen, Barbara * ama esikụt n̄kukụt, okop mme uyo, onyụn̄ enen̄ede enịm nte ke isinyene nneme ye mme iman imọ oro ẹkekpan̄ade. Enye ye Joachim ebe esie ẹma ẹsikot n̄wed ubụpekpo ẹnyụn̄ ẹdiọn̄ọ ndida kad utịn̄ ini iso ntịn̄ ini iso. Kad emi okowụt ke mmọ ẹyenyene okụk, ndien mmọ ẹma ẹnyene okụk ke mbubehe mmọ. Usen kiet kad oro ama owụt mmọ ke ndiọi owo ẹmọn̄ ẹdi ufọk mmọ, onyụn̄ owụt nte mmọ ẹkpekpemede idem.

OKPOSỤKEDI emi mme owo mînen̄ekede ima n̄kpọ aban̄ade ifọt, mme owo ke ẹsụk ẹmama ndinyene ndedịbe odudu. Ediwak owo ke ererimbot ẹnyene n̄kpọ n̄kpemeidem, ẹnyene obukpọk umụm ndomo, mîdịghe ẹsika idiọn̄ man ẹketịn̄ se iditịbede ke ini iso inọ mmọ m̀mê man ẹkpeme idem. N̄wedmbụk n̄kpọntịbe Germany oro ẹkotde Focus ọkọdọhọ ke ibuotikọ oro “Kọmputa ye Satan” ete: “Intanet edinam mme owo ẹdọdiọn̄ ẹnam n̄kpọ ẹban̄a ifọt.”

Ndi ọmọdiọn̄ọ se Bible etịn̄de aban̄a ubụpekpo? Se enye etịn̄de aban̄a n̄kpọ emi ekeme ndikpa fi idem.

Se Bible Etịn̄de Aban̄a Ubụpekpo

Abasi okowụk ikọt esie ke Israel eset ete: “Kûyak ẹkụt owo ekededi ke otu fo emi . . . ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiaidiọn̄, m̀mê owo emi ọkọkde nduọhọ ọnọ owo m̀mê obụp ekpo m̀mê etịn̄ ini iso m̀mê owo ekededi emi akade okobụp mme akpan̄kpa n̄kpọ. Koro kpukpru owo eke ẹnamde n̄kpọ emi ẹdi mbubiam n̄kpọ ke enyịn Jehovah.” (Deuteronomy 18:10-12) Nso ikanam ẹnọ utọ ọkpọsọn̄ item emi ẹban̄a mme edinam ubụpekpo?

Nte mbụk oro ikọnọde ke ntọn̄ọ owụtde, ediwak owo ẹnịm ke akpanikọ ẹte ke mme odu-uwem ẹkeme ndinyene nneme ye mme akpan̄kpa ye nte ke mmọ mme akpan̄kpa ẹsitịn̄ se iditịbede ẹnọ mme owo. Se ediwak ido ukpono ẹkpepde nte ke mbon emi ẹkpan̄ade ẹsika iso ẹdu uwem ke obio ekpo anam mme owo ẹnịm utọ n̄kpọ emi ke akpanikọ. Edi idịghe se Bible ekpepde edi oro. Enye ọdọhọ ete:  “Amaedi mme akpan̄kpa, mmọ ifiọkke baba n̄kpọ kiet.” (Ecclesiastes 9:5) Bible ọdọhọ ke n̄kpa onyụn̄ etie nte owo ndide ọkpọsọn̄ idap, idiọn̄ọke se itịbede ke ini enye osụk edede do. * (Matthew 9:18, 24; John 11:11-14) Ke edide ntre, owo ekeme ndibụp ete, Nso kaban̄a mbon oro ẹsikade ubụpekpo? Mmanie ẹsitịn̄ ikọ oro ẹnọ mmọ?

Ndinyene Nneme ye Mme Spirit

Mme Gospel ẹsian nnyịn nte ke Jesus ama enyene nneme ye mme spirit ke ini enye okodude ke isọn̄. Ke uwụtn̄kpọ, n̄wed Mark 1:23, 24 etịn̄ nte “ndedehe spirit” ọkọdọhọde Jesus ete: “Mmetịm mfiọk owo emi afo edide.” Mme spirit ẹnyụn̄ ẹfiọk fi n̄ko. Edi ndi afo ọmọdiọn̄ọ mmọ?

Mbemiso Abasi okobotde mme owo, enye ama obot ediwak angel. (Job 38:4-7) Orụk uwem emi mme angel ẹdude akan eke mme owo. (Mme Hebrew 2:6, 7) Mmọ ẹkop odudu ẹnyụn̄ ẹnen̄ede ẹdiọn̄ọ n̄kpọ, ẹkenyụn̄ ẹbot mmọ man mmọ ẹnam uduak Abasi. Andiwet psalm ọkọkwọ ete: “Ẹtoro Jehovah, O mbufo mme angel esie emi ẹkopde odudu, emi ẹnamde ikọ esie.”—Psalm 103:20.

Bible asian nnyịn nte ke nte ini akakade, ndusụk angel emi ẹma ẹtọn̄ọ ndidụk ndụk emi Abasi mîkenyịmeke mmọ ẹdụk ye mme owo. Nso ikedi uduak mmọ? Akpa angel emi akanamde oro ama abian̄a Eve, onyụn̄ adian̄ade enye ye ebe esie ọkpọn̄ Abasi emi edide Andibot mmọ. Ndinam emi akanam enye edi Satan kpa Devil, ọdọk-edidọk ye andibiọn̄ọ Abasi.—Genesis 3:1-6.

Nte ini akakade, mme angel en̄wen ẹma “[ẹkpọn̄] nnennen ebietidụn̄ mmọ” ke heaven, ẹmen idem owo ẹsịne, ẹnyụn̄ ẹtọn̄ọ ndidu ye ndiye iban mi ke isọn̄. (Jude 6; Genesis 6:1, 2) Mme ọsọn̄ibuot angel emi ye nditọ ntịme uduot oro mmọ ẹkebonde ẹma ẹfiomo ubonowo idiọk idiọk tutu ‘afai ọyọhọ ke isọn̄.’ Etie nte afo ememehe ye mbụk Bible oro aban̄ade nte Abasi okosobode idiọk ye afai afai ererimbot oro ke Ukwọ eyo Noah.—Genesis 6:3, 4, 11-13.

Mmọn̄ ukwọ oro ama anam mme angel emi ẹyak idem eke owo ẹnịm ẹfiak ẹnyọn̄ heaven, edi Andibot ikayakke mmọ ẹbe ẹdụk. Utu ke oro, enye ama ọkọbi mmọ etem ke ebiet emi etiede nte “n̄kịmn̄kịm ukpe.” (2 Peter 2:4, 5) Bible ọdọhọ ke mme ọsọn̄ibuot angel emi ẹdi “mme demon.” (James 2:19) Mme demon emi ẹsinọ mbiaibọk odudu ẹda ẹnam utom mmọ.

Se Mme Demon Ẹyomde

Ndiọi spirit oro ẹsinemede nneme ye mme owo ẹyom ndinam mmọ ẹtre ndituak ibuot nnọ Jehovah, kpa ata Abasi. Se mmọ ẹdọhọde nte inọde mme owo, idem odudu emi mme obụpekpo ẹdọhọde ke imenyene, isiyakke mme owo ẹnyene nnennen ifiọk ẹban̄a Abasi ẹnyụn̄ ẹsan̄a ẹkpere enye.

Se Satan emi edide etubom mme demon akadade odomo Jesus owụt n̄kpọ en̄wen emi mme demon ẹsiyomde. Enye ọkọdọhọ Jesus ke iyọnọ enye “kpukpru mme obio ubọn̄ ererimbot ye ubọn̄ mmọ.” Nso ke Satan okoyom Jesus anam? Enye ọkọdọhọ Jesus ‘ọduọ ke isọn̄ atuak ibuot ọnọ imọ.’ Ke akpanikọ, Satan ye mme demon ẹyom mme owo ẹtuak ibuot ẹnọ mmimọ. Edi Jesus ikenyịmeke  ndikpọn̄ Abasi nnyụn̄ ntre ndituak ibuot nnọ enye.—Matthew 4:8-10.

Ndiọi spirit m̀mê demon isiwakke ndidomo owo ntre nnennen nnennen mfịn. Utu ke oro mmọ ẹda nsio nsio n̄kari n̄kari usụn̄, utọ nte ubreidiọn̄, mfa, ibọk, edikot n̄wed ekaubọk, kad utịn̄ ini iso, ẹbian̄a mbon oro mîtịmke ifiọk mmọ. Kûyak ẹda mme utọ n̄kpọ oro ẹbian̄a fi sia mme n̄kpọ emi idịghe sụk ikpîkpu usụn̄ unyene nneme ye mme spirit. Mme demon ẹsida emi ẹtap mme owo man mmọ ẹtre ndituak ibuot nnọ Jehovah. Ndien edieke mmọ mîkemeke ndiwọn̄ọde mme owo n̄kpọn̄ Jehovah, mmọ ẹsifịna ẹnyụn̄ ẹtụhọde mbon emi ẹduọde ẹdụk afia mmọ. Edieke edide utọ n̄kpọ emi etịbe ọnọ fi, nso ke akpanam man ọbọhọ mmọ?

Se Akpanamde man Ọbọhọ Mme Demon

Fiọk ete ke mme spirit emi ẹsinemede nneme ye mme owo ẹdi mme asua Abasi, emi ẹtiede ẹbet nsobo. (Jude 6) Mmọ ẹdi mbon abian̄a, ẹnam nte idi mbon emi ẹkekpan̄ade. Ekpetie fi didie ke idem edieke owo emi ọdọhọde ke idi ufan fo edide owo abian̄a emi oyomde ndisio fi uyo ke inua mfak itiat? Nso ke akpanam edieke edide edidiọn̄ọ ke owo emi esidade eneme nneme ke Intanet edi ata idiọk akpara? Ndiduọ ndụk afia mme demon akam ọdiọk akan oro. Oyom anam ofụri se ekemede man etre utọ n̄kpọ emi. Nso ke akpanam?

Ke ndusụk mbon Ephesus ẹma ẹkediọn̄ọ se N̄wed Abasi ekpepde aban̄a ubụpekpo, mmọ ẹma ẹkụt ke ana mmimọ ifọp n̄wed ubụpekpo mmimọ kpa ye oro mme n̄wed oro ẹkesọn̄de urua etieti. Mmọ ẹma “ẹfọp mmọ ke iso kpukpru owo.” (Utom 19:19, 20) Mfịn idịghe mme n̄wed, n̄kpọ n̄kpemeidem, obukpọk ndomo, ye n̄kpọ ntre kpọt ke ẹsida ẹnam ubụpekpo, edi ẹsida n̄ko mme cd ye n̄kpọmbre ilektrọnik. Fehe kpọn̄ n̄kpọ ekededi oro ekemede ndinyene ebuana ye ubụpekpo.

Idịghe emeti ebe ye n̄wan oro ikenemede iban̄a ke ntọn̄ọ ibuotikọ emi? Kad utịn̄ ini iso mmọ ama owụt mmọ ke ndiọi iban ẹyedi ufọk mmọ, edi yak mmọ ẹkûkpan̄ utọn̄ unọ iban oro ẹkûnyụn̄ ẹbọ mmọ baba n̄kpọ kiet. Edi ke ini Connie ye Gudrun, emi ẹdide Mme Ntiense Jehovah ẹkekade ufọk mmọ ẹkedọhọ ke ikada eti mbụk aban̄ade Abasi isọk mmọ, Joachim ye Barbara ẹma ẹnyịme ndikpan̄ utọn̄. Mmọ ẹma ẹdineme ẹban̄a ubụpekpo, ndien Connie ye Gudrun ẹma ẹwụt mmọ se N̄wed Abasi etịn̄de aban̄a ubụpekpo. Ekem, ẹma ẹtọn̄ọ ndisikpep mmọ Bible.

Ikebịghike Joachim ye Barbara ẹma ẹbiere nditre kpukpru edinam ubụpekpo. Mme Ntiense oro ẹma ẹdọhọ mmọ ẹte ke ekeme ndidi ndiọi spirit oro idinemke esịt. Ke akpanikọ, mme demon oro ẹma ẹsitụhọde Joachim ye Barbara ẹnyụn̄ ẹnam uwem ọsọn̄ ye mmọ. Ndịk ama esinam mmọ kpukpru okoneyo tutu mmọ ẹwọrọ ẹkedụn̄ ke ufọk en̄wen ẹnyụn̄ ẹbọ emem. Ikọ emi ke Philippi 4:13 emi ọsọn̄ọ mmọ idem ke ofụri ini emi: “Mmenyene ukeme ndinam kpukpru n̄kpọ ebe ke enye emi ọnọde mi odudu.” Jehovah ama ọdiọn̄ mmọ sia mmọ ẹkesọn̄ọde ẹda, ndien nte ini akakade, ndiọi spirit oro ikofiomoke mmọ aba. Mfịn, Joachim ye Barbara ẹnem esịt ndituak ibuot nnọ Jehovah ata Abasi.

N̄wed Abasi ọdọhọ kpukpru mbon oro ẹyomde Jehovah ọdiọn̄ mmọ ete: “Ẹsụk idem ẹnọ Abasi; edi ẹbiọn̄ọ Devil, ndien enye eyefehe ọkpọn̄ mbufo. Ẹsan̄a ẹkpere Abasi, ndien enye ayasan̄a ekpere mbufo.” (James 4:7, 8) Jehovah Abasi ekeme ndin̄wam fi, enye oyonyụn̄ an̄wam fi ọbọhọ odudu mme demon edieke oyomde enye an̄wam fi. Ke ẹkerede ẹban̄a nte Jehovah akan̄wamde mmọ ẹbọhọ ubụpekpo, Joachim ye Barbara ẹnen̄ede ẹnyịme se Psalm 121:2 emi etịn̄de ete: “Un̄wam mi oto Jehovah.”

[Mme Ikọ Idakisọn̄]

[Se ẹwetde ẹban̄a ndise ke page 21]

Ubụpekpo iyakke mme owo ẹdi ufan Abasi

[Se ẹwetde ẹban̄a ndise ke page 22]

“Ẹsan̄a ẹkpere Abasi, ndien enye ayasan̄a ekpere mbufo.”—JAMES 4:8