Mme Andikot N̄wed Nnyịn Ẹbụp Ẹte . . .

Ndi Bible Ekpep ke Abasi Edi Ita-ke-Kiet?

▪ Kop se ndusụk owo ẹkpepde mi ẹban̄a Abasi-Ita-ke-Kiet: “Owo ita ẹdu ke Abasi kiet. Ndisana owo ita emi ẹdi Abasi Ete, Abasi Eyen, ye Abasi Edisana Spirit. Abasi Ete isọn̄ọke inyụn̄ ikponke ikan Abasi Eyen, m̀mê Abasi Edisana Spirit. Ndisana owo ita emi ẹdi ukem ke kpukpru usụn̄.” Ndi se Bible ekpepde edi emi?

Ẹsiwak ndida Matthew 28:19 nsọn̄ọ ukpepn̄kpọ emi. Bible ọdọhọ ke itie oro ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit.” Edi akpanikọ nte ke ẹsiak Ete, Eyen, ye edisana spirit ke itien̄wed emi. Edi owo itịn̄ke n̄kpọ ndomokiet iban̄a mmọ ndidi kiet. Jesus ọkọdọn̄ mme anditiene enye emi ẹkedide mme Jew ẹkekpep mme owo n̄kpọ ẹnyụn̄ ẹnịm mmọ baptism ke enyịn̄ Ete, ye Eyen ye edisana spirit. Nso ke mme Jew ẹkenịm ke akpanikọ?

Ke ini ẹkenọde idụt Israel Ibet, emi edide ubak Bible, ẹma ẹwụk mmọ ẹte: “Kûnyene abasi efen ukọrọ ye ami.” (Deuteronomy 5:7) Owo ifan̄ ẹketịn̄ ikọ do? Deuteronomy 6:4 ọbọrọ nte etịmde an̄wan̄a ete: “O Israel, ẹkop: Jehovah Abasi nnyịn edi Jehovah kiet”—idịghe owo ita-ke-kiet. Ikebịghike ẹkenyan̄a nditọ Israel ẹsio ke Egypt, ndien nditọ Egypt ẹkesituak ibuot ẹnọ Osiris, Isis, ye Horus (emi ẹwụtde mi ke ubọk ufien) ye mme adiana-ita abasi eken. Ke ntre, ẹkewụk nditọ Israel ẹte ẹtuak ibuot ẹnọ Abasi kiet kpọt. Ntak akanade ewụhọ emi enen̄ede an̄wan̄a mme owo? Dr. J. H. Hertz emi edide rabbi ọdọhọ ete: “Ẹkewụk mme owo ẹte ẹkpono Abasi kiet kpọt man mmọ ẹkûdodomo ndikpono ediwak abasi. Shema owụt ke ukpepn̄kpọ abasi-ita-ke-kiet emi mme ufọkabasi ẹkpepde ikemke ye N̄wed Abasi.” *

Sia Jesus akamanade nte eyen Jew, ẹma ẹkpep enye ndinịm ibet emi. Ke ini Satan okodomode enye ke enye ama akana baptism, enye ọkọdọhọ ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’” (Matthew 4:10; Deuteronomy 6:13) Imekeme ndikpep ekese n̄kpọ nto emi. Akpa, Satan okoyom ndinam Jesus etre ndituak ibuot nnọ Jehovah. Emi ikpọwọrọke n̄kpọ ndomokiet edieke Jesus ye Abasi ẹkpedide n̄ka. Ọyọhọ iba, Jesus ama anam an̄wan̄a nte ke Abasi kiet kpọt odu, ndien ke ana ẹtuak ibuot ẹnọ “enye ikpọn̄.” Edieke enye ekpekedide kiet ke otu Abasi-Ita-ke-Kiet, enye ọkpọkọdọhọ ẹtuak ibuot ẹnọ “nnyịn.”

Ke ini mme owo ẹdide ẹditịm ẹfiọk Abasi ẹnyụn̄ ẹyom ndinam n̄kpọ esie, ẹsinịm mmọ baptism ẹsịn “ke enyịn̄ Ete ye Eyen ye edisana spirit.” (Matthew 28:19) Mmọ ẹsidiọn̄ọ ẹnyụn̄ ẹnyịme ke Jehovah edi akakan andikara ẹnyụn̄ ẹnyịme udeme oro Jesus Christ enyenede ke ndinam uduak Jehovah osu. (Psalm 83:18; Matthew 28:18) Mmọ n̄ko ẹdiọn̄ọ ufọn edisana spirit Abasi, emi edide anamutom odudu Abasi, ye se Abasi esidade enye anam.—Genesis 1:2; Galatia 5:22, 23; 2 Peter 1:21.

Ukpepn̄kpọ emi etịmede mme owo ke ata ediwak isua idahaemi. Edi itịmekede mme mbet Jesus, sia enye ama ekpep mmọ akpanikọ onyụn̄ ọdọhọ mmọ ẹtuak ibuot ẹnọ “ata Abasi kierakiet,” kpa Jehovah.—John 17:3.

[Ikọ Idakisọn̄]

[Ebiet Ẹdade ndise ẹto ke page 23]

Musée du Louvre, Paris