Leta Russia

Ndiyom N̄kpọuto ke Ikpọ Obot Altay

EKEDI ke ediye usen kiet ke ọfiọn̄ May ke Altay Republic—ata ediye obio ke ikpehe edem usụk ye edem usiahautịn Siberia. Ima ida ke winde ikụt ndiye akai; inyụn̄ ikụt ndiye etịn̄e obot emi snow ofụkde. Obio mbon Altay emi etiede obot obot mi odu ke ata esịt esịt Asia, ndien mme andidụn̄ Altay ẹnyene n̄ko usem mmọ. Mmọ ẹnen̄ede ẹmehe ye Ikpọ Obot Altay emi ẹkotde ẹdian ikọ mbon Mongolia ye Turkey oro ọwọrọde “n̄kpọ ndiye nte gold.”

Iyọhọke isua ifan̄ ami ye n̄wan mi ikekpep Usem Idiọn̄ọ Mbon Russia inyụn̄ itọn̄ọ ndika n̄kese mme esop ye n̄kpri otu Mme Ntiense Jehovah emi mme inan ẹdude. Mme owo emi ẹtode n̄kpọ nte ekpụk 170 ke idụt emi ẹdiana kiet ẹsem usem Russia. Orụk usem en̄wen, oro edi Usem Idiọn̄ọ Mbon Russia, adian mme inan ke idụt emi ọtọkiet. Mme inan do ẹnen̄ede ẹdiana kiet. Ama enem ediwak mmọ ndikama nnyịn esen nnyụn̄ nnọ nnyịn mbụk uwem mmọ. Se ẹsiwakde ndinam ke Altay edi emi.

Ẹma ẹdọhọ nnyịn ke Gorno-Altaysk nte ke inan ifan̄ mmọdo ke ekpri obio kiet emi oyomde usụn̄ ke n̄kpọ nte kilomita 250. Imọfiọk ke Mme Ntiense ifan̄ ẹdu do, edi mmọ ndomokiet ifiọkke usem idiọn̄ọ. Ima ikere iban̄a nte n̄kpọ etiede ye mmọ inyụn̄ ibiere ndiwat n̄koyom mmọ. Nduaidem nnyịn ama otụk Yury ye Tatyana ebe ye n̄wan emi ẹnyụn̄ ẹdide inan, emi ẹkenyịmede nditiene nnyịn n̄ka. Ima itan̄ mme DVD usem idiọn̄ọ ye n̄kpọ emi ididade ibre mmọ idọn̄ ke ekpri bọs nnyịn. Ima inyụn̄ imen akamba n̄kpọ udọn̄ udia, idọn̄ bred emi ẹdọn̄de ndien ye ukọkọk nsat unam ke esịt, inyụn̄ itan̄ udia mbon Russia eken emi ẹdade ikọn̄ ye bia mbakara ẹnam. Ke akpatre, ima ifiọn̄ọ ibọk mbufụk ke idem, ke ọfọn̄, ye ikpaukot nnyịn sia mbufụk esinamde mme owo ẹdọn̄ọ udọn̄ọ mfre emi ẹkotde encephalitis etieti ke obio emi.

N̄wọn̄ọde n̄wọn̄ọde usụn̄ obot emi ikawatde ẹma ẹye tutu. Ufuọn̄ ndinem flawa emi ikokopde ama enem nnyịn n̄ko. Emi ama ọsọn̄ọ nnyịn idem! Esịt ama enem nnyịn ndikụt udịm edop Siberia ẹtade mbiet ke obot oro. Mbon Altay ẹdụn̄ ke mme ufọk oro ẹdade eto ẹbọp ẹnyụn̄ ẹkọn̄de tian ke enyọn̄. N̄kpri ufọk emi ẹnyenede nditụn̄ọ itiokiet ye ọkọm emi ebietde ikoso ẹnyụn̄ ẹyọyọhọ ebiet emi. Ndusụk mmọ ẹbiet mme tent emi ẹdade ikpọketo ẹfụk. Ediwak mbon Altay ẹsidụn̄ ke n̄kpri tent emi ọtọn̄ọde ke May esịm September, ndien ekem ẹwọrọ ẹkedụn̄ ke ufọk ke ini ukwọedịm.

Mme Ntiense emi ẹdude ke obio oro ẹma  ẹdara nnyịn etieti ẹnyụn̄ ẹda nnyịn ẹka ufọk ebe ye n̄wan oro ẹdide inan do. Esịt ama enem mmọ ndikụt nnyịn, mmọ ẹma ẹnen̄ede ẹyom ndidiọn̄ọ ebiet emi itode ye se nnyịn inamde. Ima ididiọn̄ọ ke mmọ ẹnyene kọmputa, ndien ke ini ikosiode DVD idi, mmọ ẹma ẹyịre ẹte isịn. Ini kiet ini kiet, kpukpru owo ẹma ẹtre ndinam idiọn̄ọ; eketie nte n̄kpọ eke nnyịn mîdụhe do aba. Enyịn kpukpru owo okowụhọ ke se ẹkesiode oro, ndien ke ini ke ini mmọ ẹtiene ẹnam ndusụk idiọn̄ọ emi ẹkekụtde ke DVD oro ẹnyụn̄ ẹkop inemesịt. Ikememke utom ndinam mmọ ẹbet ke esisịt ini man ẹfiak ẹketọn̄ọ ke ntọn̄ọ emi ẹwụtde ndise Paradise isọn̄, edi ima ikeme ndinam emi ke akpatre. Do ke nnyịn ikeneme se Abasi edinamde inọ ubonowo ye utọ mbon emi ẹdidude uwem ke nsinsi ke utọ ebiet emi ẹwutde ke ndise oro. Nte mmọ ẹkenyenede udọn̄ ama enem nnyịn esịt. Ke ima ikoyom ndinyọn̄, mmọ ẹma ẹdọhọ nnyịn ke ebe ye n̄wan efen mmọdo ke obio in̄wan̄ oro ekperede, emi ẹkemede ndiwat hour ifan̄ kpọt nsịm.

Ima ifiak itọn̄ọ isan̄ inyụn̄ ibe usụn̄ emi ẹsiakde ẹbe ikpọ obot, inyụn̄ ibe ke n̄wọn̄ọde n̄wọn̄ọde usụn̄ emi adade ekesịm ekpri obio en̄wen. Ima ikụt ubon kiet emi kpukpru owo ẹdide inan do—ebe, ye n̄wan, ye eka an̄wan, ye ekpri akpan mmọ—ndien mmọ ẹma ẹnem esịt ndikụt nnyịn okposụkedi emi nnyịn mîkọdọhọke mmọ ke imọn̄ idi. Ima ibe ekpri usụn̄ idụk ufọk obukpọk mmọ, ndien ufọk oro ama ọfuọn̄ etieti. Ekpri ekara odudu ama odu ke obom ufọk oro, emi utịn ye un̄wana ẹkesitode ẹdụk. Itie usan̄uyo ye mfiọk mbakara emi ẹdade kọrikọri ẹnam ẹdu ke nditụn̄ọ n̄kan̄ kiet, ndien mmọ ẹma ẹfụk ndiye ndatndat ọfọn̄mbri ke ibibene. Ete oro ye n̄wan esie ẹma ẹda nsio nsio udia mbon Altay ẹkama nnyịn esen. Ima ibụp mmọ m̀mê akanam mmọ ẹkere nte ikpedide ufan Abasi. Mmọ ẹma ẹnen̄ede ẹkere mbụme emi. Eka an̄wan ete oro ama ọdọhọ nnyịn ke ini imọ ikedide ekpri, ke ama odu ini emi ikemende udia ika itie kiet ke obot oro ikawa inọ mme abasi. Enye ama adian do ete: “Nnen̄ekede ndiọn̄ọ se n̄kanamde oro. Se mbon nnyịn ẹkesinamde edi oro.”

Ima iwụt DVD emi aban̄ade nte owo ekemede ndidi ufan Abasi ndien iso ama ayama kpukpru owo ndise. Ọdọn̄ mmọ ndika iso nnyene nneme Bible, edi mmọ ẹdinam emi didie? Kpa ye oro ẹkemede ndiwet n̄kpọ ke fon nnọ ẹsọk mme inan, ukwak emi utọ etop emi esisan̄ade idụhe ke ebiet ndomokiet ke obio oro. Ntem ima idọhọ ke iyesiwet mmọ leta.

Eyo ama ọtọn̄ọ ndikụt ini ikọmde mmọ unyọn̄ inyụn̄ itọn̄ọde uwat anyan usụn̄ ndinyọn̄ ndi Gorno-Altaysk. Okposụkedi idem ekememde nnyịn, esịt ama enem nnyịn. Nte ini akakade, ima ibụp Mme Ntiense do iban̄a ubon emi, mmọ ẹnyụn̄ ẹdọhọ ke urua iba ke ọfiọn̄, ke ete oro esika akwa obio oro odude ekpere ndien eyenete an̄wan kiet emi ọdiọn̄ọde usem idiọn̄ọ esikpep Bible ye enye onyụn̄ akabade se ẹnemede ke mbono esop ọnọ enye. Esịt enem nnyịn didie ntem ndifiọk ke se ikanamde ama enyene ufọn!

Ndika n̄koyom mme inan oro ẹnyenede eti esịt onyụn̄ etie nte ndika n̄koyom n̄kpọuto oro edịbede ke ikpọ obot. Ediwak hour oro nnyịn isibiatde iyom n̄kpọuto isitakke-tak ke ini ikụtde n̄kpọuto oro ke unana idotenyịn. Ikpọ obot Altay edisụk iyeye nnyịn onyụn̄ anam iti mbon oro ikosobode do.