Edinyene Nneme ye Mbọhọidụn̄​—Ndi Jesus Edi Abasi?

MME NTIENSE JEHOVAH ẹsima ndineme Bible ye mme mbọhọidụn̄ mmọ. Ndi enyene n̄kpọ emi mîn̄wan̄ake fi ke Bible? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, kûmen̄e ndibụp mmọ ke ini osobode ye mmọ. Mmọ ẹyema ndineme n̄kpọ emi ye afo.

Se itienede emi edi nte nneme oro Mme Ntiense Jehovah ẹsinyenede ye mme mbọhọidụn̄ mmọ esitiede. Ẹyak ida ke Ntiense emi ekerede Gloria aka ufọk mme Maria.

Ẹdọhọ ke Mbufo Inịmke Jesus ke Akpanikọ

Maria: Pastọ nnyịn ọdọhọ ke Mme Ntiense Jehovah inịmke Jesus ke akpanikọ. Ndi ntre?

Gloria: Nyom ndinam fi ọfiọk ke nnyịn imenịm Jesus ke akpanikọ. Ke nditịm ntịn̄, nnyịn ikam inịm ke owo eke mîbuọtke idem ye Jesus ikemeke-keme ndinyene edinyan̄a.

Maria: Se nnyụn̄ nnịmde okịm edi oro.

Gloria: Ọwọrọ afo ye ami inịm ukem n̄kpọ. Enem mi ndifiọk oro. Edi emekeme ndikere, ‘Edieke Mme Ntiense Jehovah ẹnịmde Jesus ke akpanikọ, ntak ndien emi mme owo ẹdọhọde ke mmọ inịmke?’

Maria: Etie nte ọbọ mi ikọ ke inua; nsidi ntak?

Gloria: Ke nditịn̄ ibio ibio, nnyịn imenen̄ede inyene mbuọtidem ke Jesus, edi nnyịn inịmke kpukpru se mme owo ẹtịn̄de ẹban̄a enye.

Maria: Nte nso ye nso?

Gloria: Ndusụk owo ẹdọhọ ke Jesus okonyụn̄ etie nte eti owo ekededi. Nnyịn inịmke utọ ikọ oro.

Maria: Ami n̄ko nnịmke.

Gloria: Ọwọrọ nnyịn mbiba inyene ekikere kiet ke n̄kpọ mbiba emi. N̄kpọ efen edi ke Mme Ntiense Jehovah inịmke ukpepn̄kpọ ekededi emi atuahade ye se Jesus ke idemesie eketịn̄de ndiwụt ke imọ ye Ete imọ idịghe n̄ka.

Maria: Nte ewe?

Gloria: Ediwak ufọkabasi ẹdọhọ ke Jesus edi Abasi. Anaedi emesikop n̄kpọ ntre ke ufọkabasi mbufo.

Maria: Ih nan̄a, pastọ nnyịn ọdọhọ ke Abasi ye Jesus ẹdi kiet.

Gloria: Ndi ukereke ke mfọnn̄kan usụn̄ ndidiọn̄ọ owo emi Jesus edide edi ndikop se enye ke idemesie eketịn̄de?

Maria: Ntre ke edi.

Nso ke Jesus Eketịn̄?

Gloria: Kop se Jesus ke idemesie eketịn̄de mi ke John 6:38: “N̄koto heaven nsụhọde ndi, idịghe man ndinam uduak idemmi, edi man ndinam uduak enye emi ọkọdọn̄de  mi.” Ndi ekere ke Jesus ekpetịn̄ ikọ ntem edieke enye ekpedide Abasi?

Maria: Itie oro in̄wan̄ake mi.

Gloria: N̄kọ omokụt ke Jesus ọkọdọhọ ke imọ ikedịghe ndinam uduak imọ.

Maria: Enye ọkọdọhọ ke ikedi ndinam uduak Enye emi ọkọdọn̄de imọ.

Gloria: Edieke Jesus ekpedide Abasi, anie ndien ọkọdọn̄ enye utom mi ke isọn̄? Ndien ntak emi Jesus ekenyịmede ndika utom oro?

Maria: Ọtọn̄ọ ndin̄wan̄a mi ndien. Edi itie Bible kiet emi kpọt ikemeke ndinam mi nnịm ke Jesus idịghe Abasi.

Gloria: Ọfọn, yak ise n̄kpọ en̄wen emi Jesus eketịn̄de. Enye ama afiak etịn̄ mbiet ikọ oro isụk ikotde do ke John 7:16. Mbọk kot itie oro ise.

Maria: “Jesus ọbọrọ mmọ ete: ‘Se ami n̄kpepde idịghe okịm, edi enyene enye emi ọkọdọn̄de mi.’”

Gloria: Sọsọn̄ọ ufan. Ndi itien̄wed oro ọdọhọ ke Jesus ekekpep ekikere idemesie?

Maria: Ihih, ọdọhọ ke ekekpep se Ete ọkọdọn̄de enye.

Gloria: Afo emenen. Ntre owo ekeme ndibụp ete: ‘Anie ọkọdọn̄ Jesus? N̄ko anie ọkọnọ enye akpanikọ emi enye ekekpepde?’ Ndi ukereke ke Owo oro okpon akan Jesus? N̄kọ eteutom esikpon akan eyenutom.

Maria: Nneme emi ọtọn̄ọ ndinem mi-o. Ndiọn̄ọke ke utọ itie ntre mmọdo ke Bible.

Gloria: Kere n̄ko ban̄a se Jesus eketịn̄de ke John 14:28 ete: “Mbufo ẹma ẹkop ẹte n̄kọdọhọ mbufo, Mmọn̄ nnyọn̄ ndien nyafiak ntiene mbufo. Edieke mbufo ẹmade mi, mbufo ẹkpedara nte ke ami nnyọn̄ ntiene Ete, koro Ete omokpon akan mi.” Jesus eketịn̄ nso aban̄a Ete esie ke itie Bible oro?

Maria: Ọkọdọhọ ke Ete omokpon akan imọ. Oro ọwọrọ ke enye idịghe n̄ka ye Abasi.

Gloria: Nnennen. Se n̄ko se Jesus eketịn̄de ke Matthew 28:18. Itie Bible oro okot ete: “Ẹnọ mi ofụri odudu ke heaven ye ke isọn̄.” Nso ke Jesus eketịn̄ aban̄a odudu ke itie Bible emi?

Maria: Enye ọkọdọhọ ke ẹnọ imọ ofụri odudu.

Gloria: Edieke Jesus ekpedide Abasi, ntak emi Owo en̄wen ọkpọnọde enye odudu? N̄ko anie ọkọnọ enye odudu?

Maria: Mfiọkke.

Jesus Ọkọbọn̄ Akam Ọnọ Anie?

Gloria: Enyene n̄kpọ en̄wen emi Jesus akanamde, emi enye mîkpakanamke edieke enye ekpedide Abasi.

Maria: Nso idi oro?

Gloria: Ekedi ke ini enye akanade baptism. Ẹwet ke Luke 3:21, 22. Mbọk ndi akpama ndikot itie oro ke Bible fo?

Maria: “Edikem ke ini kpukpru owo ẹma ẹkena baptism, Jesus n̄ko onyụn̄ anade baptism, ndien nte enye ọbọn̄de akam, enyọn̄ eberede ndien edisana spirit osụhọde ke mbiet ibiom edidoro enye ke idem, ndien uyo oto ke heaven ọwọrọ ete: ‘Afo edi edima Eyen mi; mmenyịme fi.’”

Gloria: Ndi omokụt se Jesus akanamde ke ini enye akanade baptism?

Maria: Ih, ọkọbọn̄ akam.

Gloria: Edi owo ekeme ndikere, ‘Edieke Jesus ekpedide Abasi, anie ke enye ọkọbọn̄ akam ọnọ ndien?’

Maria: Ọmọfiọk eti mbụme edi oro. Nyobụp pastọ nnyịn.

Gloria: Ke adianade do, omokụt ke Jesus ama ọkọwọrọ ke mmọn̄, ke Owo ama etie ke heaven etịn̄ ikọ ye enye. Ndi emeti se Owo oro ọkọdọhọde?

Maria: Ọkọdọhọ ke Jesus edi edima Eyen imọ.

Gloria: Afo emenen. Edi edieke Jesus ekpedide Abasi, anie ndien eketie ke heaven etịn̄ ikọ oro?

Maria: Ọmọfiọk akanam n̄kereke n̄kpọ n̄ka n̄kan̄ oro.

 Ntak Emi Ẹkotde Mmọ “Ete” ye “Eyen”?

Gloria: Enyene n̄kpọ en̄wen emi nyomde ekere aban̄a: Imokot ke Bible nte ke Jesus okokot Abasi, Ete esie eke heaven. Ke ini Jesus akanade baptism, uyo ama oto ke heaven ọdọhọ ke Jesus edi Eyen imọ. N̄ko-n̄ko, Jesus ke idemesie ọkọdọhọ ke imọ idi Eyen Abasi. Ọfọn yak mbụp fi ise, edieke afo okpoyomde ndiwụt mi owo iba emi ẹdide n̄ka, ndi okpowụt mi ete ye eyen?

Maria: Ihih, n̄kpowụt fi amanamba.

Gloria: Nnennen. N̄kọ emeti ke Jesus okokot Abasi, Ete, okot idemesie Eyen. Afo ekere ke nso ke Jesus okoyom ndikpep mme owo? Ndi ete ekeme ndidi n̄ka ye eyen?

Maria: Ikọ fo an̄wan̄a mi ndien. Jesus okoyom nnyịn ifiọk ke imọ idịghe n̄ka ye Ete imọ, ke Ete okpon onyụn̄ enyene odudu akan imọ.

Gloria: Afo emenen. Mbọk yak mfiak mbụp fi ise: Edieke afo ọdiọn̄ọde ke ete idịghe n̄ka ye eyen, ndi emekere ke edieke Jesus emi ekedide Akwa Andikpep ekpedide n̄ka ye Abasi, ke enye okpokokot Abasi, Ete?

Maria: Ihih, ikpokotke, okpokokot enye “eyeneka mi.”

Gloria: Edi enye okokot Abasi, Ete, okot idemesie Eyen.

Maria: Mmokụt ndien.

Nso ke Mme Akpa Mbet Jesus Ẹketịn̄?

Gloria: Edieke enyenede ini, n̄kpama ndiwụt fi n̄kpọ en̄wen ke Bible kaban̄a se isụk inemede emi.

Maria: Ọfọn, wụt mi ise.

Gloria: Edieke Jesus ekpedide Abasi ke akpan, ndi ukereke ke mme mbet esie ẹkpekedọhọ ke enye edi Abasi?

Maria: Ih, ẹkpekedọhọ.

Gloria: Edi idụhe ebiet ndomokiet ke N̄wed Abasi emi owụtde ke mmọ ẹma ẹkpep utọ n̄kpọ oro. Se se Paul, kpa kiet ke otu akpa mme anditiene Jesus eketịn̄de mi. Ke Philippi 2:9, Paul ama etịn̄ se Abasi akanamde ke Jesus ama akakpa onyụn̄ eset, ete: “Abasi ekemenede enye enịm ke itie emi okon̄de onyụn̄ ọnọ enye enyịn̄ oro okon̄de akan kpukpru enyịn̄.” Mbọk itie Bible oro ọdọhọ ke Abasi akanam nso ọnọ Jesus?

Maria: Ọdọhọ ke Abasi ama emenede enye enịm ke itie emi okon̄de akan akpa itie esie.

Gloria: Ntre ke edi. Edi kere ise, edieke Jesus ekpekedide n̄ka ye Abasi mbemiso enye akpade, ndien Abasi emenede enye enịm ke itie emi okon̄de akan akpa itie esie, oro ọkpọwọrọ ke enye akam okpon itie idahaemi akan Abasi. Ndi emekere ke enyene owo ekededi emi okponde itie akan Abasi?

Maria: Tutu amama, utọ owo oro idụhe!

Gloria: Afo emenen. Ọfọn, ke ekerede aban̄a kpukpru se inemede emi, ndi ọkpọdọhọ ke Bible ekpep nte ke Jesus edi Abasi?

Maria: Ihih, Bible ọdọhọ ke enye edi Eyen Abasi.

Gloria: Nnennen. Ufan, nyom ndinam fi ọfiọk ke Mme Ntiense Jehovah ẹkpono Jesus ata etieti. Nnyịn inịm ke Jesus edi Messiah oro ẹken̄wọn̄ọde, ye nte ke n̄kpa esie anam kpukpru mbon oro ẹmade Abasi ẹkeme ndinyene edinyan̄a.

Maria: Se nnyụn̄ nnịmde edi oro.

Gloria: Edi afo emekeme ndikere m̀mê nso ke ikpanam ndiwụt ke imenem esịt nte Jesus akakpade ọnọ nnyịn. *

Maria: Se nsụk n̄kerede edi oro.

Gloria: Nyama ndifiak ndi urua en̄wen man ndida Bible n̄wụt fi. Ndi oyodu ke ufọk ini ntem urua en̄wen?

Maria: Ih, nyodu.

Gloria: Ọfọn, tie sụn̄, tutu urua en̄wen.

[Ikọ Idakisọn̄]