Ẹyak Ibụp Jesus

Ediwak mme aka ufọkabasi ẹkere ke akpana ufọkabasi ẹsitiene ẹbre mbre ukara. Mmọ ẹkere ẹte ke ufọkabasi ẹkeme ndikọk mfịna ubonowo. Edi ndusụk owo ẹkere ke ikpanaha ufọkabasi ẹtiene ẹbre mbre ukara. Afo ekere didie? Ndi emekere ke akpana ufọkabasi ẹtiene ẹbre mbre ukara?

JESUS CHRIST ọwọrọ etop akan ke kpukpru ido ukpono. Ntem, kere nte ikpobụpde enye mbụme emi, Ndi akpana ufọkabasi ẹtiene ẹbre mbre ukara? Afo ekere ke enye ọkpọbọrọ didie? Ke ini enye okodude ke isọn̄, enye ama ọbọrọ mbụme oro ke ikọ ye ke edinam. Ke uwụtn̄kpọ, ke ọwọrọetop Ukwọrọikọ esie oro ke Obot, enye ama ọnọ item oro edin̄wamde mme mbet esie ẹdiọn̄ọ nte mmọ ẹkpedude uwem ke obio mmọ. Ẹyak ineme ndisụk n̄kpọ emi enye ekekpepde do.

 N̄wam Mbon En̄wen

Jesus ama etịn̄ nte mme mbet esie ẹkpedude uwem ke ererimbot. Enye ọkọdọhọ ete: “Mbufo ẹdi inụn̄ isọn̄; edi edieke inụn̄ adabade, didie ke ẹkeme ndinam enye afiak enyene inem? Ifọnke ke baba n̄kpọ kiet ibọhọke nditop enye nduọk ke an̄wa man mme owo ẹdịghi ke ikpat. Mbufo ẹdi un̄wana ererimbot. . . . Ẹyak un̄wana mbufo ayama ke iso owo, man mmọ ẹkpekụt nti utom mbufo ẹnyụn̄ ẹnọ Ete mbufo emi odude ke heaven ubọn̄.” (Matthew 5:13-16) Ntak emi Jesus ekemende mme mbet esie odomo ye inụn̄ ye un̄wana?

Jesus ọkọdọhọ ke mme mbet imọ ẹdi inụn̄ ofụri isọn̄, idịghe inọ ndusụk owo kpọt; onyụn̄ ọdọhọ ke mmọ ẹdi un̄wana ẹnọ kpukpru mbon oro ẹyomde nditịm n̄kụt n̄kpọ, idịghe inọ ibat ibat owo. Se Jesus eketịn̄de owụt ke enye ikoyomke mbet imọ ẹwọrọ ẹkpọn̄ mme owo ẹkedụn̄ mmọ mmọ. Ntak emi idọhọde ntre?

Yak ifiak ise uwụtn̄kpọ Jesus emi ise: Inụn̄ idinyeneke ufọn edieke owo mîsịnke enye omụm ke udia. Utuenikan̄ n̄ko idinyeneke ufọn edieke owo mîdomoke enye inịm ke ebiet emi mme owo ẹdude. Ntak edi oro akanam Jesus mîdọhọke mme mbet esie ẹwọrọ ẹkpọn̄ mme owo ẹkedụn̄ mmọ mmọ. Utu ke oro, ana mme Christian ẹdụn̄ ye mme owo man ẹkeme ndin̄wam mmọ, kpa nte anade ẹsịn inụn̄ ke udia man enye enyene ufọn, ẹnyụn̄ ẹdomo ikan̄ ẹnịm ke ebiet emi mme owo ẹdude man ẹda ẹkụt usụn̄.

“Idịghe Ubak Ererimbot”

Jesus ndikọdọhọ ke mme mbet esiemmọ ẹdi un̄wana ererimbot anam mme owo ẹkere m̀mê mme Christian ẹkpese didie mbre ukara. Mbemiso ẹwotde Jesus, enye ama ọbọn̄ akam oro edinamde n̄kpọ emi an̄wan̄a ọnọ Abasi. Enye ọkọbọn̄ akam emi ke ibuot mme mbet esie ete: “Mben̄eke nte osio mmọ ke ererimbot, edi mben̄e nte ekpeme mmọ ke ntak andidiọk. Mmọ idịghe ubak ererimbot, kpa nte ami mmendịghe ubak ererimbot.” (John 17:15, 16) Didie ndien ke mme Christian ẹkeme nditiene nnọ un̄wam ke obio mmọ ẹdi idịghe ubak ererimbot? Enyene mbụme ita emi ẹdinamde ifiọk ibọrọ mbụme emi. Mmọ ẹdi:

• Didie ke Jesus ekese mbre ukara?

• Ndi akpana ata mme Christian ẹbre mbre ukara?

• Nso ufọn ke ukpepn̄kpọ Christ enyene ke idem mme owo?

[Se ẹwetde ke ikpọ abisi ke page 4]

Se Jesus eketịn̄de owụt ke enye ikoyomke mbet imọ ẹwọrọ ẹkpọn̄ mme owo ẹkedụn̄ mmọ mmọ