Mme Andikot N̄wed Nnyịn Ẹbụp Ẹte . . .

Ndi Akpa Mme Christian Ẹma Ẹsitiene Ẹbre Mbre Ukara?

▪ Mbemiso Jesus ọkọdọkde aka heaven, enye ama eteme mme mbet esie nte ẹkpekwọrọde ikọ, edi iketịn̄ke n̄kpọ ndomokiet iban̄a mbre ukara. (Matthew 28:18-20) Ntre, mme mbet esie ẹkesụk ẹda item oro enye ọkọnọde mmọ ẹdu uwem. Ewe item edi oro? Jesus ọkọdọhọ ete: “Ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.”—Mark 12:17.

Didie ke item emi akan̄wam mme mbet Jesus ẹdụn̄ ke ererimbot edi idịghe ubak ererimbot? Mmọ ẹkenam didie ẹdiọn̄ọ se inyenede Caesar, oro edi, ukara, ye se inyenede Abasi?

Apostle Paul akada ke owo ekededi oro esịnde idem ke mbre ukara inamke item Jesus. N̄wed oro, Beyond Good Intentions—A Biblical View of Politics ọdọhọ ke “Paul ama esida idaha esie nte eyen Rome ọbọ un̄wam ekededi emi ukara Rome ẹkesinọde nditọ Rome, edi enye ikedehedei isịn idem ke mbubehe ukara.”

Nso item ke Paul ọkọnọ ekemmọ Christian? N̄wed enyọn̄ emi aka iso ete: “Mme leta emi Paul ekewetde ọnọ ẹsọk mme Christian ke Corinth, Ephesus, ye Rome ẹkewụt ke enye ikenyeneke udọn̄ ke n̄kpọ ekededi emi aban̄ade mbre ukara.” N̄wed oro ọdọhọ n̄ko ete ke okposụkedi emi Paul “ọkọdọhọde mme Christian ẹsụk ibuot ẹnọ ukara, ke idụhe ndomokiet ke otu ediwak leta esie emi enye ọkọdọhọde ufọkabasi ẹdọhọ ukara ẹnam ọkpọkọm n̄kpọ kiet ẹnọ mmimọ.”—Rome 12:18; 13:1, 5-7.

Mme Christian oro ẹkedude ediwak isua ke Paul ama akakpa ẹkesụk ẹdu uwem ntre—ẹdiọn̄ọ ke Christian ikemeke ndikpono Abasi mfiak nsịn idem ke mbre ukara. Mmọ ẹma ẹsikpono ukara, edi idehedei isịn idem ke mbre ukara. N̄wed emi iketịn̄de iban̄a ke enyọn̄ emi afiak ọdọhọ ete: “Okposụkedi emi akpa mme Christian ẹkesikponode ukara, mmọ ikesịnke idem ke mbre ukara.”

Edi n̄kpọ ama okpụhọde ke n̄kpọ nte isua 300 ẹma ẹkebe tọn̄ọ Christ akakpa. Charles Villa-Vicencio emi esikpepde ukpepn̄kpọ ido ukpono ọdọhọ ete: “Ukara ama okpụhọde ke eyo Constantine, ndien etie nte ini emi ke mme Christian ẹkebụn̄ọ nte ifian̄ ẹdụk utom ukara, ẹdụk ekọn̄, ẹnyụn̄ ẹtọn̄ọ ndikama itie ke ukara.” (Between Christ and Caesar) Nso ikedi utịp? Etisịm n̄kpọ nte isua 400 tọn̄ọ nte Christ akakpa, ido ukpono ẹma ẹnen̄ede ẹsịn idem ke mbre ukara tutu Ukara Rome ẹtọn̄ọ ndinyene ido ukpono idemmọ.

Mfịn, ediwak mme aka ufọkabasi emi ẹdọhọde ke itiene Christ ke ẹdọhọ ikọt mmọ ẹtiene ẹsịn idem ke mbre ukara. Ufọkabasi ekededi emi anamde utọ n̄kpọ oro itieneke Christ, inyụn̄ itieneke akpa mme Christian.