Ndi Akpana Ata Mme Christian Ẹbre Mbre Ukara?

ATA mme Christian isibreke mbre ukara. Ntak-a? Sia mmọ ẹtienede uwụtn̄kpọ Jesus. Enye ọkọdọhọ ete ke ‘imọ idịghe ubak ererimbot,’ onyụn̄ ọdọhọ mme mbet esie ete: ‘Mbufo idịghe ubak ererimbot.’ (John 15:19; 17:14) Kere ban̄a ndusụk ntak emi mme Christian mîkpetieneke ibre mbre ukara.

1. Owo ikemeke ndikara idem. Bible ọdọhọ ke owo ikemeke, inyụn̄ inyeneke unen ndikara idemesie. Prọfet Jeremiah ekewet ete: “Ikam isịneke ke ubọk owo eke asan̄ade ndinen̄ede ikpatisan̄ esiemmọ.”—Jeremiah 10:23.

Kpa nte Abasi mîkọnọhọ owo mba ndida mfe, enye n̄ko ikọnọhọ owo ukeme ndikara idem. David Fromkin emi edide prọfesọ ufọkn̄wed ntaifiọk etịn̄ ntak emi ukara mîsifọnke ete: “Mme andikara ẹsinam ndudue sia mmọ ẹdide owo, ndien se mmọ ẹduakde onyụn̄ ekeme ndikpu. Enyene se owo ekemede ndinam, onyụn̄ enyene se owo mîkemeke ndinam.” (The Question of Government) Ntak edi oro Bible ọdọhọde nnyịn ikûbuọt idem ye owo.—Psalm 146:3.

2. Mme demon ẹkara ererimbot emi. Ke ini Satan ọkọdọhọde Jesus ke imọn̄ iyak enye akara ererimbot emi, Jesus ikọdọhọke ke enye inyeneke unen ndinọ imọ utọ odudu oro. Ke nditịm ntịn̄, Jesus okokot Satan “andikara ererimbot emi.” Isua ifan̄ ke oro ebede, apostle Paul ama ọdọhọ ke Satan edi “abasi editịm n̄kpọ emi.” (John 14:30; 2 Corinth 4:4) Paul ama ewet n̄wed ọnọ ẹsọk ekemmọ Christian ete: “Nnyịn imenyene en̄wan ndin̄wana . . . ye mme andikara ekịm ererimbot emi, ye odudu ndiọi spirit ke enyọn̄.” (Ephesus 6:12) Ndiọi spirit emi, m̀mê mme demon ẹkara ererimbot emi, idịghe mme owo. Didie ke ndidiọn̄ọ emi akpanam ise mbre ukara?

Ẹyak ise uwụtn̄kpọ emi ise: Kpasụk nte oyobio ye awawa ẹsiberide ubom ke akpa, ntre ke mme okopodudu ndiọi spirit emi ẹdide mme demon ẹsitohode ndutịm ukaraidem. Ndien kpa nte mme awat ubom mîkemeke ndiwọn̄ọde ukot ofụm m̀mê awawa,  kpasụk ntre n̄ko, mme andikara ikemeke ndikpan mme demon ndinam se mmọ ẹyomde. Mme demon emi ẹnen̄ede ẹyom ndibiat mme owo nnyụn̄ nnam mmọ ẹnen̄ede ẹbọ ufen. (Ediyarade 12:12) Ke ntem, owo emi enyenede odudu akan Satan ye mme demon kpọt ekeme ndikara ererimbot emi ọfọn. Ndien edi Jehovah Abasi ke idemesie edinam emi.—Psalm 83:18; Jeremiah 10:7, 10.

3. Ata mme Christian ẹda ẹnọ Obio Ubọn̄ Abasi. Jesus ye mme mbet esie ẹma ẹdiọn̄ọ ke Abasi ayada ukara eke heaven edi man edikara ofụri isọn̄ ke ini esie ama ekem. Bible okot ukara emi Obio Ubọn̄ Abasi, onyụn̄ etịn̄ ke Abasi emek Jesus Christ ndikara nte Edidem ke Obio Ubọn̄ oro. (Ediyarade 11:15) Jesus akada “eti mbụk obio ubọn̄ Abasi” nte akpan ibuotikọ ukwọrọikọ esie, sia Obio Ubọn̄ oro edinamde ufọn inọ ubonowo. (Luke 4:43) Enye ama onyụn̄ ekpep mme mbet esie ndibọn̄ akam nte: “Yak obio ubọn̄ fo edi.” Ntak-a? Koro Obio Ubọn̄ oro ama edi, ẹyenam uduak Abasi ke isọn̄ nte ẹnamde ke heaven.—Matthew 6:9, 10.

Nso ndien iditịbe inọ mme ukara ubọkowo? Bible ọdọhọ ete ke ẹyesobo ukara “ofụri isọn̄” ẹfep. (Ediyarade 16:14; 19:19-21) Edieke owo enen̄erede enịm ke akpanikọ nte ke Obio Ubọn̄ Abasi ọmọn̄ osobo kpukpru ukara owo efep, ikpowụtke ifiọk enye nditiene nsịn idem ke utọ ukara oro. Edieke enye oyomde ndida nnọ ukara oro ẹma ẹkebiere ikpe ẹnọ ẹnyụn̄ ẹyom ndisobo mfep mi, emi ọkpọwọrọ ndin̄wana ye Abasi.

Kpa ye oro ata mme Christian mîsitieneke ibre mbre ukara, ndi oro ọwọrọ ke mmọ isiyomke ndinam n̄kpọ ndomokiet nnọ obio mmọ? Nnyịn imọn̄ ibọrọ mbụme emi ke ibuotikọ oro etienede.

[Se ẹwetde ke ikpọ abisi ke page 7]

Mme Ntiense Jehovah ẹda ẹnọ Obio Ubọn̄ Abasi, utu ke ukara owo