Ndi Ama Ọfiọk?

Nso ikedi “itie ikpe” emi ẹkedade apostle Paul ẹka?

▪ N̄wed Utom 18:12, 13 ọdọhọ ke mme Jew ke Corinth ẹkedọhọ ke Paul ekekpep mme owo ndituak ibuot nnọ Abasi ke usụn̄ en̄wen nte mîkemke ye ibet ẹnyụn̄ ẹda enye ẹka “itie ikpe.” Mbon Corinth eset ẹma ẹnam n̄kpoto ẹkpere ufọt an̄waurua mmọ, emi etiede nte okodu ekpere synagogue. Ẹkesida ke n̄kpoto emi ẹtịn̄ ikọ ẹnọ mme owo. Ẹkeda ndiye nsemnsem mfia ye blu blu itiat ẹnam n̄kpoto emi, ẹnyụn̄ ẹkap ndiye n̄kpọ ẹkanade. Ẹma ẹbon nnyan ndiye n̄kpọitie emi mme owo ẹkemede nditie, ẹnyụn̄ ẹbana itie emi etieti.

Etie nte ebiet emi ke ẹkeda apostle Paul ẹka man enye akada ke iso ikpe Gallio, andikara Achaia. Mi ke mbon ukara ẹkesitie ẹkpe ikpe ẹnyụn̄ ẹnam mbon oro ẹkesopde idem do ẹfiọk se mmimọ ibierede.

Mbon Greece ẹkesiwak ndidụk kpukpru mbono mmọ ke iso utọ n̄kpoto emi. Ikọ Greek oro “itie ikpe” ke Matthew 27:19 ye John 19:13 edi n̄kpoto oro Pontius Pilate akadade etịn̄ ikọ ye otuowo ke ini enye ekekpede ikpe Jesus.—Utom 12:21.

Ntak emi usụn̄ oro ẹkewotde Jesus akanamde ndusụk mme Jew ẹtuak ukot ẹduọ?

▪ Apostle Paul ọkọdọhọ akpa mme Christian ete: “Nnyịn ikwọrọ Christ oro ẹkekọn̄de ke eto, emi edide n̄kpọ iduọ ọnọ mme Jew onyụn̄ edide ndisịme ọnọ mme idụt.” (1 Corinth 1:23) Ntak emi usụn̄ oro ẹkewotde Jesus akanamde ndusụk mme Jew ẹtuak ukot ẹduọ?

Kop se Ben Witherington III, ataifiọk kiet ke Ufọt Ufọt Edem Usiahautịn, emi esiwetde n̄kpọ aban̄a Bible, etịn̄de aban̄a nte mme Jew ẹkedade usụn̄ oro ẹkewotde Jesus: “Emi ekedi ata ndiọkn̄kan usụn̄ ndiwot owo ini oro. Owo ikadaha utọ n̄kpa oro nte n̄kpa usụn̄ Abasi.” Witherington aka iso ete: “Mbon eyo oro ẹkeda nte ẹkewotde owo ẹdiọn̄ọ utọ owo emi owo ekedide. Ntre, nte ẹkewotde Jesus anam etie nte ke enye ekedi ata idiọk ibak emi okoyomde iduọ ukara, owo emi okodotde ndibọ ufen emi ẹsinọde ifịn emi ẹsọn̄de ibuot.” Nte mbon eyo oro ẹkedade utọ n̄kpa oro owụt ke mme akpa mbet Jesus ikpọkọdọhọke mme owo ke Jesus akakpa ntem ekem eset edieke mbụk emi mîkpedịghe akpanikọ.