Nte Ekpedide Ata Christian ye Eti Owo ke Obio

AKPAN n̄kpọ iba ewe ke Jesus akanam ke isọn̄? Akpa, Jesus okodomo ndikpụhọde mme owo, utu ke ndikpụhọde ukara. Ke uwụtn̄kpọ, se se enye eketịn̄de mi ke Ukwọrọikọ esie ke Obot. Mbemiso enye ọkọdọhọde ke mme mbet imọ ẹkpetie nte inụn̄ ye un̄wana, enye ama ọdọhọ mbon oro ẹkekopde ukwọrọikọ esie ete ke mbon oro “ẹkerede ẹban̄a unana mmọ ke n̄kan̄ eke spirit” ẹkop ata inemesịt. Enye ama ọdọhọ n̄ko ete ke ‘mmọ oro ẹnyenede ifụre ifụre ido, mmọ oro esịt asanade, ye mme anam emem’ ẹkop inemesịt. (Matthew 5:1-11) Jesus ama an̄wam mme mbet esie ẹkụt ke ọfọn mmọ ẹse n̄kpọ nte Abasi esede ẹnyụn̄ ẹnam n̄kpọ Abasi ke ofụri esịt.

Ọyọhọ iba, ke ini Jesus okokụtde nte mme owo ẹbọde ufen, mbọm ama esinam enye tutu enye anam n̄kpọ man ufen mmọ efere. Akpan utom esie ikedịghe nditre ufen. (Matthew 20:30-34) Ke uwụtn̄kpọ, enye ama esikọk mme owo udọn̄ọ, edi mme owo ẹkesụk ẹdọdọn̄ọ. (Luke 6:17-19) Enye ama esinyụn̄ an̄wam mbon oro ẹfiomode ẹnyụn̄ ẹfịkde, edi mfiomo ye ufịk ẹkesụk ẹdodu. Enye ama esinọ mme owo udia, edi akan̄ okosụk ọnọnọmọ mme owo.—Mark 6:41-44.

Anam Mme Owo Ẹkpụhọde Onyụn̄ Anam Ufen Mmọ Efere

Ntak emi Jesus okodomode ndikpụhọde mme owo nnyụn̄ nnam ufen mmọ efere utu ke ndikpụhọde ukara nnyụn̄ ntre ufen ererimbot emi? Enye ama ọdiọn̄ọ ke Abasi aduak ndida Obio Ubọn̄ esie ke ini iso nsio ukara owo mfep nnyụn̄ ntre kpukpru ufen ererimbot emi. (Luke 4:43; 8:1) Ntak edi oro ke ini emi mme mbet ẹkedọhọde Jesus amana etie ọkọk mme owo udọn̄ọ, Jesus ọkọbọrọ mmọ ete: “Ẹyak nnyịn ika ebiet en̄wen, ikodụk mme obio oro ẹdude ẹkpere, man n̄kọkwọrọ ikọ do n̄ko, koro n̄kọwọrọ ndi kaban̄a uduak emi.” (Mark 1:32-38) Jesus ama esin̄wam mbon oro ẹbọde ufen, edi akpan utom esie ekedi ndikwọrọ ikọ.

Mme Ntiense Jehovah ẹnam utom ukwọrọikọ mmọ mfịn nte Jesus akanamde. Mmọ ẹsin̄wam mme owo oro ẹbọde ufen man ufen mmọ efere esisịt. Edi mmọ idomoke nditre utụk ye ufịk ke ererimbot emi. Mmọ ẹnịm ke Obio Ubọn̄ Abasi kpọt editre kpukpru ufen ke ererimbot emi. (Matthew 6:10) Ukem nte Jesus, mmọ idomoke ndikpụhọde ukara, edi ẹkam ẹdomo ndikpụhọde mme owo. Se idinen̄erede in̄wam nnyịn edi oro sia akpan mfịna ubonowo idịghe ukara, akam edi edu owo.

Nti Owo ke Obio

Mme Ntiense Jehovah ẹdiọn̄ọ ke mmimọ inyene ndidu eti uwem ke obio. Ntem mmọ ẹsinịm ibet ukara ẹnyụn̄ ẹnam se ukara ẹdọhọde. Mmọ ẹsikọkwọrọ ẹnyụn̄ ẹwewet ke mme n̄wed mmọ ẹte mme owo ẹnịm ibet ukara. Edi ke ini ukara ẹdọhọde ẹnam se Abasi akpande, mmọ ẹsikop  “uyo Abasi nte andikara utu ke uyo owo.”—Utom 5:29; Rome 13:1-7.

Mme Ntiense Jehovah ẹsika ẹkekpep mme owo Bible ke mfọn. Emi anam ata ediwak owo ẹkpụhọde. Ke uwụtn̄kpọ, kpukpru isua, ukwọrọikọ Mme Ntiense Jehovah anam ata ediwak mbon emi ẹkesin̄wọn̄de sika, ikọn̄ekpo, ẹsịnde un̄wọn̄, ẹkpade mmịn, ẹbrede mbre mfọniso, ẹnyụn̄ ẹsan̄ade an̄wa, ẹtre kpukpru ndiọi uwem emi. Ndida item Bible ndu uwem anam mmọ ẹdu eti uwem.—Se ibuotikọ oro, “Bible Okpụhọde Mme Owo” ke page 18.

Ke adianade do, se Mme Ntiense Jehovah ẹkpepde ke Bible anam ubon mmọ ọfọn. Emi anam kpukpru owo ke ubon, kpa ye nditọwọn̄, ẹnen̄ede ẹkpono kiet eken, ẹnyụn̄ ẹdiọn̄ọ nte ẹkpetịn̄de ikọ ye owo. Se isinamde ufọk ọfọn edi emi. Ndien ufọk ama ọfọn, obio ọfọn.

Ke ama okokot magazine emi edisịm mi, ndi emekere ke Bible enyịme mme Christian ẹtiene ẹbre mbre ukara? Inyịmeke. Edi ndi emi ọwọrọ ke ikpanaha Christian etiene oyom ufọn obio esie? Ihih. Nso ndien ke mme Christian ẹkpenam ndiwụt ke imoyom ufọn obio mmimọ? Edi mmọ nditie nte inụn̄ ye un̄wana ererimbot nte Jesus ọkọdọhọde.

Mbon emi ẹnamde item Christ emi ẹyebọ ufọn, ubon mmọ ye ofụri obio n̄ko ẹyebọ ufọn. Mme Ntiense Jehovah ke edem mbufo ẹyekop inemesịt ndinam fi ọfiọk nte mmimọ isikpepde owo Bible ke mfọn. *

[Ikọ Idakisọn̄]

[Se ẹwetde ke ikpọ abisi ke page 10]

Utu ke ndikpụhọde ukara, Jesus akakam oyom usụn̄ ndikpụhọde mme owo

[Se ẹwetde ke ikpọ abisi ke page 11]

Mme Ntiense Jehovah ẹdiọn̄ọ ke mmimọ inyene ndidu eti uwem ke obio