Ekem ye Ifiọk Ntaifiọk

“Nte n̄kewetke n̄wed emi esịnede item ye ifiọk nnọ fi ini kiet ko, man n̄wụt fi nte ikọ akpanikọ enyenede nsọn̄ọ, man afo ada ikọ akpanikọ afiak ọsọk owo emi ọdọn̄de fi?”—MME N̄KE 22:20, 21.

DIDIE KE BIBLE ANANA MBIET? Mme n̄wed eyo eset ẹsiwak ndisịne se ntaifiọk eyomfịn ẹkụtde ke inenke. Idem ke eyomfịn, mme ewet n̄wed esidi anam anam ẹfiak ẹsion̄o n̄wed mmọ man ẹkekem ye ifiọk eyomfịn. Edi Bible ọdọhọ ke Andibot akanam ẹwet imọ ye nte ke se ẹkewetde emi “odu ke nsinsi.”—1 Peter 1:25.

UWỤTN̄KPỌ: Ibet Moses ama owụk nditọ Israel ete ẹtịbi isọn̄ ẹfụk ndek mmọ “ke edem itienna.” (Deuteronomy 23:12, 13) Edieke mmọ ẹketụkde okpo owo m̀mê unam oro ama akakpa, akana mmọ ẹyet ọfọn̄ mmọ. (Leviticus 11:27, 28; Numbers 19:14-16) Ẹma ẹsisio mbon akpamfia ini oro ẹnịm nsannsan tutu ẹkụt ke udọn̄ọ oro idibehe owo.—Leviticus 13:1-8.

SE MBIAUSỌBỌ EYOMFỊN ẸDỌHỌDE: Ndisidịp ndek, ndiyet ubọk, nnyụn̄ nnịm owo emi udọn̄ọ esie ekemede ndibe owo nsannsan osụk edi ata eti usụn̄ nditre udọn̄ọ m̀mê ndinam udọn̄ọ okûbe owo. Itieutom United States emi akpande udọn̄ọ nditara ọdọhọ ete edieke eti itie oro ẹdịpde ndek mîdụhe, yak “ẹtịbi isọn̄ ke ebiet emi oyomde usụn̄ ke nsụhọde n̄kaha mita 30 ọkpọn̄ mmọn̄ ẹnam ndek ekem ẹfụk.” Esop Kaban̄a Nsọn̄idem Ererimbot ọdọhọ ke ini mme owo ẹdịpde ndek mmọ ntem, ke mmọ idisọpke idọn̄ọ utọrọ. N̄kpọ nte isua 200 emi ẹkebede, mbiausọbọ ẹma ẹdikụt ke mmimọ ima isinọ ediwak mbon emi ikọsọbọde idem udọn̄ọ edieke mmimọ mîyetke ubọk ke ima ikotụk okpo owo. Itieutom United States emi akpande udọn̄ọ nditara ọdọhọ ke ndiyet ubọk “osụk edi mfọnn̄kan usụn̄ ndikpan udọn̄ọ nditara.” Nso kaban̄a edisio mbon akpamfia m̀mê mbon udọn̄ọ eken nnịm nsannsan nte Bible etemede? N̄wed kiet emi ekerede Saudi Medical Journal ọdọhọ ke “ndondo oro udọn̄ọ emi esibede ediwak owo odụkde obio, ke n̄kukụre n̄kpọ emi ẹkemede ndinam mbak udọn̄ọ oro editara edi ndinịm mbon udọn̄ọ emi nsannsan.”

AFO EKERE DIDIE? Ndi emekere ke odu n̄wed ido ukpono ekededi emi ekemde ye ifiọk ntaifiọk eyomfịn? Okûkam udi Bible inyeneke mbiet?

[Se ẹwetde ke ikpọ abisi ke page 6]

“Idụhe owo emi idem mîdikpaha ndikụt utọ ibet usanaidem emi ẹkewetde ke Bible toto ke eyo Moses.”​—MANUAL OF TROPICAL MEDICINE, EMI DR. ALDO CASTELLANI YE ALBERT J. CHALMERS ẸWETDE