‘Emi Ọwọrọ Nsinsi Uwem’

“Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—JOHN 17:3.

IFIỌK ekeme ndinyan̄a owo. Ke ini Nouhou emi ekedide eyen ọfiọn̄ duop ọkọduọde udọn̄ọ, eka esie emi esinamde utom ke ufọkibọk ke Niger ama ọdiọn̄ọ se akpanamde. Enye ama ada suka ye inụn̄ esịn ke mmọn̄ emi asanade anam mmọn̄uwem ọnọ eyen esie. Mbon UNICEF ẹkedọhọ ke “idem ọkọsọp ọsọn̄ eyen oro sia eka ama ọfiọk se akpanamde onyụn̄ ọsọsọp emen enye aka ufọkibọk.”

Ifiọk Bible ekeme ndinyan̄a owo n̄ko. Moses emi ekedide akpa owo emi ekewetde Bible ọkọdọhọ ete: “Enye [idịghe] ikọ eke mînyeneke ufọn inọ mbufo, edi ọwọrọ uwem mbufo, ndien mbufo ẹdida ikọ emi ẹnam mme usen mbufo ẹbịghi.” (Deuteronomy 32:47) Ndi Bible ekeme ndinam owo odu uwem ebịghi? Didie ke enye ọwọrọ uwem ọnọ nnyịn?

Ibuotikọ ition oro isụk ikụrede mi ẹwụt ke idụhe n̄wed en̄wen ekededi ke ẹsiode Bible ẹfep emi mme ntịn̄nnịm ikọ esie ẹdide se ẹberide edem, emi kpukpru se enye etịn̄de edide akpanikọ, emi ekemde ye ifiọk ntaifiọk, emi odude ke n̄kemuyo, onyụn̄ ọnọde owo nti item. Mme n̄kpọ emi ẹwụt ke Bible inyeneke mbiet. Ntem, ke ini enye owụtde nte ikpodude uwem ke nsinsi, ndi emi ikpanamke nnyịn itetịm idụn̄ọde enye?

Nnyịn imesịn udọn̄ inọ fi ite aka iso ekpep nte nnennen ifiọk Bible ekemede ndinam fi enyene emem idahaemi onyụn̄ okop inemesịt ke ini iso. Mme Ntiense Jehovah ẹyenem esịt ndiwụt fi se akpanamde man enyene utọ ifiọk oro.

[Ekebe/​Ndise ke page 9]

N̄kpọ en̄wen emi anamde Bible okpụhọde ye mme n̄wed en̄wen edi nte ke enye kpọt ekeme nditịm mbọrọ ikpọ mbụme oro isibụpde nte:

• Ntak emi idude ke isọn̄ emi?

• Ntak emi ufen okponde ntem ke isọn̄?

• Ndi nyafiak n̄kụt iman mi oro ẹkekpan̄ade?

Oyokụt ibọrọ mbụme emi ke n̄wed Nso ke Bible Enen̄ede Ekpep, emi Mme Ntiense Jehovah ẹsiode.